ભૈરવાનુકરણસ્તોત્ર · શ્લોક 1-20

ચિતિભૂમિસમાશ્રયણાશ્ ચિતિભૂતિં શ્રયત મા મુધા ભ્રમત ।
પ્રથયન્ન્ ઇતિ ભક્તિમતાં જયતિ શિવો ઽનુગ્રહપ્રવણઃ ॥

ચિદ્ભૈરવમ્ એવ પરં પરમામૃતરૂપમ્ એકમ્ અતિદીપ્તમ્ ।
ઉલ્લસિતકરણચક્રગ્રસ્તસમસ્તં શિવં વન્દે ॥

સ્તુત્યઃ સ્તોતા સ્તુતિર્ ઇતિ યદ્ અપિ વિભિન્નં ન કિંચિદ્ અસ્તીહ ।
મૃષતિ યથા યદ્ રૂપં ચિદ્રૂપતયા તથા ભવત્ય્ એતત્ ॥

વિગલિતસર્વવિભેદં સર્વવિભેદાત્મ ચિદ્ઘનાનન્દમ્ ।
યત્ તવ તત્ત્વં ભગવંસ્ તસ્યાનુકૃતિં ત્વદાકૃતિં વન્દે ॥

રેખાપુરુષઃ પુરુષં વર્ણલિપિર્ વર્ણસંચયં યદ્વત્ ।
તદ્વત્ વિચિત્રરૂપં ત્વામ્ આકારો વ્યનક્તિ પરમાત્મન્ ॥

તત્રાવિકલ્પમ્ એવ ત્વાં ચિદ્રૂપં સમાવિશ્ય ।
વિમૃશામઃ કિમ્ અપિ મનાઙ્ ન હિ તત્ત્વં કલ્પનાવિષયઃ ॥

સ્વાત્મપ્રભાં વિધાય વાગ્દેવીં વિષયકુસુમકૢપ્તાર્ચઃ ।
પ્રથમોન્મેષં ગુરુમ્ અથ વન્દિત્વા હૃદયમ્ આવિશ્ય ॥

સ્તૌમિ વિમૃશન્ મહેશ્વરમ્ આત્માનં સ્વં ચિદેકઘનમ્ ।
સ્રાવિતપાશકદમ્બકમ્ એતસ્મિન્ દેહદેવગૃહે ॥

ચિત્યાનન્દેચ્છાવિત્કરણાખ્યાઃ શક્તયો જયન્તિ વિભો ।
સૂક્ષ્મસ્થૂલભિદાપ્તા વક્ત્રત્વં બ્રહ્મમુણ્ડભિધા ॥

સર્વજ્ઞતાદિવિષયં હૃદયાદિકમ્ અઙ્ગષટ્કં તે ।
સકલં સદાશિવાન્તં પ્રેતાત્મતયા તવાસનં સ્વામિન્ ॥

પરમપ્રકાશવપુષો વિમર્શશક્તિઃ પ્રભો પરા દેવી ।
અસ્યા એવ પ્રસરઃ સર્વા બ્રાહ્મ્યાદિકા દેવ્યઃ ॥

દહનજલામૃતલેખાવિષાદિ બિભ્રત્ ત્વમ્ આદિશસ્ય્ એતત્ ।
વિશ્વં વિરુદ્ધમ્ અપિ સચ્ચિદ્રૂપે મયિ વિરુધ્યતે નૈતત્ ॥

સંવિત્સૂત્રનિલીનો નિઃસારો માતૃનિવહો ઽયમ્ ।
કરણમુણ્ડમાલભારિન્ દર્શયસીતીવ નઃ સ્વામિન્ ॥

પશ્યત પશ્યત પાશા વિષમાસ્ ત ઇમે બહિષ્કૃતાઃ શશ્વત્ ।
ઇત્ય્ અન્ત્રધારણમિષત્ કથયંસ્ ત્વં નઃ સમાભાસિ ॥

માયાપટઃ સરાગો વ્યોમ્નિ પરે ઽસ્મિન્ સ એષ નિક્ષિપ્તઃ ।
ઇતિ ગજચર્મ સરક્તં મૂર્ધ્નિ વહન્ કથયસીશ ॥

અન્તઃશક્તિકૃપાણીમ્ વ્યનક્ષિ સંસૃતિવિભેદિનીમ્ અસિના ।
નિજશક્તિમહિમસ્વીકૃતસમસ્તવિશ્વા હિ વીરવરાઃ ॥

ભવભયહન્તા સો ઽહમ્ સાનાથ્યે ઽવસ્થિતો ઽસ્મિ મા ભૈષ્ટ ।
ઇત્ય્ આસ્ફોટિતખેટકદર્શનતો દિશસિ નઃ સ્વામિન્ ॥

નિજશક્તિપાશવલિતશ્ ચિદ્વપુષા કલ્યતે મયા કાલઃ ।
ઇતિ પાશધારણવશાત્ પ્રથયસિ નઃ કાલકાલસ્ ત્વમ્ ॥

ભેદમયમ્ અખિલમ્ એતન્ નિજશક્ત્યૈવાક્ષિપામિ સંહર્તુમ્ ।
ઇત્ય્ અઙ્કુશધારણતઃ સ્ફુટયતિ પરભૈરવો ઽસ્માકમ્ ॥

કોદણ્ડારૂધશરપ્રદર્શનાદ્ બ્રહ્મવિષ્ણુરુદ્રેશાન્ ।
સસદાખ્યશિવાઞ્ છક્ત્યા કારણહરિણં ભિનત્સિ મૃગવત્ ત્વમ્ ॥