ભાગવત પુરાણ · અધ્યાય 10.35

ભ્પ્_10.35.001।0 શ્રી-શુક ઉવાચ
ગોપ્યઃ કૃષ્ણે વનં યાતે તમ્ અનુદ્રુત-ચેતસઃ ।
કૃષ્ણ-લીલાઃ પ્રગાયન્ત્યો નિન્યુર્ દુઃખેન વાસરાન્

ભ્પ્_10.35.002।0 શ્રી-ગોપ્ય ઊચુઃ
વામ-બાહુ-કૃત-વામ-કપોલો વલ્ગિત-ભ્રુર્ અધરાર્પિત-વેણુમ્ ।
કોમલાઙ્ગુલિભિર્ આશ્રિત-માર્ગં ગોપ્ય ઈરયતિ યત્ર મુકુન્દઃ

વ્યોમ-યાન-વનિતાઃ સહ સિદ્ધૈર્ વિસ્મિતાસ્ તદ્ ઉપધાર્ય સ-લજ્જાઃ ।
કામ-માર્ગણ-સમર્પિત-ચિત્તાઃ કશ્મલં યયુર્ અપસ્મૃત-નીવ્યઃ

હન્ત ચિત્રમ્ અબલાઃ શૃણુતેદં હાર-હાસ ઉરસિ સ્થિર-વિદ્યુત્ ।
નન્દ-સૂનુર્ અયમ્ આર્ત-જનાનાં નર્મ-દો યર્હિ કૂજિત-વેણુઃ

વૃન્દશો વ્રજ-વૃષા મૃગ-ગાવો વેણુ-વાદ્ય-હૃત-ચેતસ આરાત્ ।
દન્ત-દષ્ટ-કવલા ધૃત-કર્ણા નિદ્રિતા લિખિત-ચિત્રમ્ ઇવાસન્

બર્હિણ-સ્તબક-ધાતુ-પલાશૈર્ બદ્ધ-મલ્લ-પરિબર્હ-વિડમ્બઃ ।
કર્હિચિત્ સ-બલ આલિ સ ગોપૈર્ ગાઃ સમાહ્વયતિ યત્ર મુકુન્દઃ

તર્હિ ભગ્ન-ગતયઃ સરિતો વૈ તત્-પદામ્બુજ-રજો ઽનિલ-નીતમ્ ।
સ્પૃહયતીર્ વયમ્ ઇવાબહુ-પુણ્યાઃ પ્રેમ-વેપિત-ભુજાઃ સ્તિમિતાપઃ

અનુચરૈઃ સમનુવર્ણિત-વીર્ય આદિ-પૂરુષ ઇવાચલ-ભૂતિઃ ।
વન-ચરો ગિરિ-તટેષુ ચરન્તીર્ વેણુનાહ્વયતિ ગાઃ સ યદા હિ

વન-લતાસ્ તરવ આત્મનિ વિષ્ણું વ્યઞ્જયન્ત્ય ઇવ પુષ્પ-ફલાઢ્યાઃ ।
પ્રણત-ભાર-વિટપા મધુ-ધારાઃ પ્રેમ-હૃષ્ટ-તનવો વવૃષુઃ સ્મ

દર્શનીય-તિલકો વન-માલા- દિવ્ય-ગન્ધ-તુલસી-મધુ-મત્તૈઃ ।
અલિ-કુલૈર્ અલઘુ ગીતામ્ અભીષ્ટમ્ આદ્રિયન્ યર્હિ સન્ધિત-વેણુઃ

સરસિ સારસ-હંસ-વિહઙ્ગાશ્ ચારુ-ગીતા-હૃત-ચેતસ એત્ય ।
હરિમ્ ઉપાસત તે યત-ચિત્તા હન્ત મીલિત-દૃશો ધૃત-મૌનાઃ

સહ-બલઃ સ્રગ્-અવતંસ-વિલાસઃ સાનુષુ ક્ષિતિ-ભૃતો વ્રજ-દેવ્યઃ ।
હર્ષયન્ યર્હિ વેણુ-રવેણ જાત-હર્ષ ઉપરમ્ભતિ વિશ્વમ્

મહદ્-અતિક્રમણ-શઙ્કિત-ચેતા મન્દ-મન્દમ્ અનુગર્જતિ મેઘઃ ।
સુહૃદમ્ અભ્યવર્ષત્ સુમનોભિશ્ છાયયા ચ વિદધત્ પ્રતપત્રમ્

વિવિધ-ગોપ-ચરણેષુ વિદગ્ધો વેણુ-વાદ્ય ઉરુધા નિજ-શિક્ષાઃ ।
તવ સુતઃ સતિ યદાધર-બિમ્બે દત્ત-વેણુર્ અનયત્ સ્વર-જાતીઃ

સવનશસ્ તદ્ ઉપધાર્ય સુરેશાઃ શક્ર-શર્વ-પરમેષ્ઠિ-પુરોગાઃ ।
કવય આનત-કન્ધર-ચિત્તાઃ કશ્મલં યયુર્ અનિશ્ચિત-તત્ત્વાઃ

નિજ-પદાબ્જ-દલૈર્ ધ્વજ-વજ્ર નીરજાઙ્કુશ-વિચિત્ર-લલામૈઃ ।
વ્રજ-ભુવઃ શમયન્ ખુર-તોદં વર્ષ્મ-ધુર્ય-ગતિર્ ઈડિત-વેણુઃ

વ્રજતિ તેન વયં સ-વિલાસ વીક્ષણાર્પિત-મનોભવ-વેગાઃ ।
કુજ-ગતિં ગમિતા ન વિદામઃ કશ્મલેન કવરં વસનં વા

મણિ-ધરઃ ક્વચિદ્ આગણયન્ ગા માલયા દયિત-ગન્ધ-તુલસ્યાઃ ।
પ્રણયિનો ઽનુચરસ્ય કદાંસે પ્રક્ષિપન્ ભુજમ્ અગાયત યત્ર

ક્વણિત-વેણુ-રવ-વઞ્ચિત-ચિત્તાઃ કૃષ્ણમ્ અન્વસત કૃષ્ણ-ગૃહિણ્યઃ ।
ગુણ-ગણાર્ણમ્ અનુગત્ય હરિણ્યો ગોપિકા ઇવ વિમુક્ત-ગૃહાશાઃ

કુન્દ-દામ-કૃત-કૌતુક-વેષો ગોપ-ગોધન-વૃતો યમુનાયામ્ ।
નન્દ-સૂનુર્ અનઘે તવ વત્સો નર્મ-દઃ પ્રણયિણાં વિજહાર

મન્દ-વાયુર્ ઉપવાત્ય્ અનકૂલં માનયન્ મલયજ-સ્પર્શેન ।
વન્દિનસ્ તમ્ ઉપદેવ-ગણા યે વાદ્ય-ગીત-બલિભિઃ પરિવવ્રુઃ

વત્સલો વ્રજ-ગવાં યદ્ અગ-ધ્રો વન્દ્યમાન-ચરણઃ પથિ વૃદ્ધૈઃ ।
કૃત્સ્ન-ગો-ધનમ્ ઉપોહ્ય દિનાન્તે ગીત-વેણુર્ અનુગેડિત-કીર્તિઃ

ઉત્સવં શ્રમ-રુચાપિ દૃશીનામ્ ઉન્નયન્ ખુર-રજશ્-છુરિત-સ્રક્ ।
દિત્સયૈતિ સુહૃદ્-આસિષ એષ દેવકી-જઠર-ભૂર્ ઉડુ-રાજઃ

મદ-વિઘૂર્ણિત-લોચન ઈષત્ માન-દઃ સ્વ-સુહૃદાં વન-માલી ।
બદર-પાણ્ડુ-વદનો મૃદુ-ગણ્ડં મણ્ડયન્ કનક-કુણ્ડલ-લક્ષ્મ્યા

યદુ-પતિર્ દ્વિરદ-રાજ-વિહારો યામિની-પતિર્ ઇવૈષ દિનાન્તે ।
મુદિત-વક્ત્ર ઉપયાતિ દુરન્તં મોચયન્ વ્રજ-ગવાં દિન-તાપમ્

ભ્પ્_10.35.026।0 શ્રી-શુક ઉવાચ
એવં વ્રજ-સ્ત્રિયો રાજન્ કૃષ્ણ-લીલાનુગાયતીઃ ।
રેમિરે ઽહઃસુ તચ્-ચિત્તાસ્ તન્-મનસ્કા મહોદયાઃ