ભાગવત પુરાણ · અધ્યાય 09.21

ભ્પ્_09.21.001।0 શ્રીશુક ઉવાચ
વિતથસ્ય સુતાન્ મન્યોર્બૃહત્ક્ષત્રો જયસ્તતઃ ।
મહાવીર્યો નરો ગર્ગઃ સઙ્કૃતિસ્તુ નરાત્મજઃ

ગુરુશ્ચ રન્તિદેવશ્ચ સઙ્કૃતેઃ પાણ્ડુનન્દન ।
રન્તિદેવસ્ય મહિમા ઇહામુત્ર ચ ગીયતે

વિયદ્વિત્તસ્ય દદતો લબ્ધં લબ્ધં બુભુક્ષતઃ ।
નિષ્કિઞ્ચનસ્ય ધીરસ્ય સકુટુમ્બસ્ય સીદતઃ

વ્યતીયુરષ્ટચત્વારિંશદહાન્યપિબતઃ કિલ ।
ઘૃતપાયસસંયાવં તોયં પ્રાતરુપસ્થિતમ્

કૃચ્છ્રપ્રાપ્તકુટુમ્બસ્ય ક્ષુત્તૃડ્ભ્યાં જાતવેપથોઃ ।
અતિથિર્બ્રાહ્મણઃ કાલે ભોક્તુકામસ્ય ચાગમત્

તસ્મૈ સંવ્યભજત્ સો ઽન્નમાદૃત્ય શ્રદ્ધયાન્વિતઃ ।
હરિં સર્વત્ર સમ્પશ્યન્ સ ભુક્ત્વા પ્રયયૌ દ્વિજઃ

અથાન્યો ભોક્ષ્યમાણસ્ય વિભક્તસ્ય મહીપતેઃ ।
વિભક્તં વ્યભજત્ તસ્મૈ વૃષલાય હરિં સ્મરન્

યાતે શૂદ્રે તમન્યો ઽગાદતિથિઃ શ્વભિરાવૃતઃ ।
રાજન્ મે દીયતામન્નં સગણાય બુભુક્ષતે

સ આદૃત્યાવશિષ્ટં યદ્બહુમાનપુરસ્કૃતમ્ ।
તચ્ ચ દત્ત્વા નમશ્ચક્રે શ્વભ્યઃ શ્વપતયે વિભુઃ

પાનીયમાત્રમુચ્છેષં તચ્ ચૈકપરિતર્પણમ્ ।
પાસ્યતઃ પુલ્કસો ઽભ્યાગાદપો દેહ્યશુભાય મે

તસ્ય તાં કરુણાં વાચં નિશમ્ય વિપુલશ્રમામ્ ।
કૃપયા ભૃશસન્તપ્ત ઇદમાહામૃતં વચઃ

ન કામયે ઽહં ગતિમીશ્વરાત્ પરામ્ અષ્ટર્દ્ધિયુક્તામપુનર્ભવં વા ।
આર્તિં પ્રપદ્યે ઽખિલદેહભાજામ્ અન્તઃસ્થિતો યેન ભવન્ત્યદુઃખાઃ

ક્ષુત્તૃટ્શ્રમો ગાત્રપરિભ્રમશ્ચ દૈન્યં ક્લમઃ શોકવિષાદમોહાઃ ।
સર્વે નિવૃત્તાઃ કૃપણસ્ય જન્તોર્ જિજીવિષોર્જીવજલાર્પણાન્ મે

ઇતિ પ્રભાષ્ય પાનીયં મ્રિયમાણઃ પિપાસયા ।
પુલ્કસાયાદદાદ્ધીરો નિસર્ગકરુણો નૃપઃ

તસ્ય ત્રિભુવનાધીશાઃ ફલદાઃ ફલમિચ્છતામ્ ।
આત્માનં દર્શયાં ચક્રુર્માયા વિષ્ણુવિનિર્મિતાઃ

સ વૈ તેભ્યો નમસ્કૃત્ય નિઃસઙ્ગો વિગતસ્પૃહઃ ।
વાસુદેવે ભગવતિ ભક્ત્યા ચક્રે મનઃ પરમ્

ઈશ્વરાલમ્બનં ચિત્તં કુર્વતો ઽનન્યરાધસઃ ।
માયા ગુણમયી રાજન્ સ્વપ્નવત્ પ્રત્યલીયત

તત્પ્રસઙ્ગાનુભાવેન રન્તિદેવાનુવર્તિનઃ ।
અભવન્ યોગિનઃ સર્વે નારાયણપરાયણાઃ

ગર્ગાચ્ છિનિસ્તતો ગાર્ગ્યઃ ક્ષત્રાદ્બ્રહ્મ હ્યવર્તત ।
દુરિતક્ષયો મહાવીર્યાત્ તસ્ય ત્રય્યારુણિઃ કવિઃ

પુષ્કરારુણિરિત્યત્ર યે બ્રાહ્મણગતિં ગતાઃ ।
બૃહત્ક્ષત્રસ્ય પુત્રો ઽભૂદ્ધસ્તી યદ્ધસ્તિનાપુરમ્

અજમીઢો દ્વિમીઢશ્ચ પુરુમીઢશ્ચ હસ્તિનઃ ।
અજમીઢસ્ય વંશ્યાઃ સ્યુઃ પ્રિયમેધાદયો દ્વિજાઃ

અજમીઢાદ્બૃહદિષુસ્તસ્ય પુત્રો બૃહદ્ધનુઃ ।
બૃહત્કાયસ્તતસ્તસ્ય પુત્ર આસીજ્ જયદ્રથઃ

તત્સુતો વિશદસ્તસ્ય સ્યેનજિત્ સમજાયત ।
રુચિરાશ્વો દૃઢહનુઃ કાશ્યો વત્સશ્ચ તત્સુતાઃ

રુચિરાશ્વસુતઃ પારઃ પૃથુસેનસ્તદાત્મજઃ ।
પારસ્ય તનયો નીપસ્તસ્ય પુત્રશતં ત્વ્ અભૂત્

સ કૃત્વ્યાં શુકકન્યાયાં બ્રહ્મદત્તમજીજનત્ ।
યોગી સ ગવિ ભાર્યાયાં વિષ્વક્સેનમધાત્ સુતમ્

જૈગીષવ્યોપદેશેન યોગતન્ત્રં ચકાર હ ।
ઉદક્સેનસ્તતસ્તસ્માદ્ભલ્લાટો બાર્હદીષવાઃ

યવીનરો દ્વિમીઢસ્ય કૃતિમાંસ્તત્સુતઃ સ્મૃતઃ ।
નામ્ના સત્યધૃતિસ્તસ્ય દૃઢનેમિઃ સુપાર્શ્વકૃત્

સુપાર્શ્વાત્ સુમતિસ્તસ્ય પુત્રઃ સન્નતિમાંસ્તતઃ ।
કૃતી હિરણ્યનાભાદ્યો યોગં પ્રાપ્ય જગૌ સ્મ ષટ્

સંહિતાઃ પ્રાચ્યસામ્નાં વૈ નીપો હ્યુદ્ગ્રાયુધસ્તતઃ ।
તસ્ય ક્ષેમ્યઃ સુવીરો ઽથ સુવીરસ્ય રિપુઞ્જયઃ

તતો બહુરથો નામ પુરુમીઢો ઽપ્રજો ઽભવત્ ।
નલિન્યામજમીઢસ્ય નીલઃ શાન્તિસ્તુ તત્સુતઃ

શાન્તેઃ સુશાન્તિસ્તત્પુત્રઃ પુરુજો ઽર્કસ્તતો ઽભવત્ ।
ભર્મ્યાશ્વસ્તનયસ્તસ્ય પઞ્ચાસન્ મુદ્ગલાદયઃ

યવીનરો બૃહદ્વિશ્વઃ કામ્પિલ્લઃ સઞ્જયઃ સુતાઃ ।
ભર્મ્યાશ્વઃ પ્રાહ પુત્રા મે પઞ્ચાનાં રક્ષણાય હિ

વિષયાણામલમિમે ઇતિ પઞ્ચાલસંજ્ઞિતાઃ ।
મુદ્ગલાદ્બ્રહ્મનિર્વૃત્તં ગોત્રં મૌદ્ગલ્યસંજ્ઞિતમ્

મિથુનં મુદ્ગલાદ્ભાર્મ્યાદ્દિવોદાસઃ પુમાન્ અભૂત્ ।
અહલ્યા કન્યકા યસ્યાં શતાનન્દસ્તુ ગૌતમાત્

તસ્ય સત્યધૃતિઃ પુત્રો ધનુર્વેદવિશારદઃ ।
શરદ્વાંસ્તત્સુતો યસ્માદુર્વશીદર્શનાત્ કિલ

શરસ્તમ્બે ઽપતદ્રેતો મિથુનં તદભૂચ્ છુભમ્ ।
તદ્દૃષ્ટ્વા કૃપયાગૃહ્ણાચ્ છાન્તનુર્મૃગયાં ચરન્ ।
કૃપઃ કુમારઃ કન્યા ચ દ્રોણપત્ન્યભવત્ કૃપી