ભાગવત પુરાણ · અધ્યાય 09.17

ભ્પ્_09.17.001।0 શ્રીબાદરાયણિરુવાચ
યઃ પુરૂરવસઃ પુત્ર આયુસ્તસ્યાભવન્ સુતાઃ ।
નહુષઃ ક્ષત્રવૃદ્ધશ્ચ રજી રાભશ્ચ વીર્યવાન્

અનેના ઇતિ રાજેન્દ્ર શૃણુ ક્ષત્રવૃધો ઽન્વયમ્ ।
ક્ષત્રવૃદ્ધસુતસ્યાસન્ સુહોત્રસ્યાત્મજાસ્ત્રયઃ

કાશ્યઃ કુશો ગૃત્સમદ ઇતિ ગૃત્સમદાદભૂત્ ।
શુનકઃ શૌનકો યસ્ય બહ્વૃચપ્રવરો મુનિઃ

કાશ્યસ્ય કાશિસ્તત્પુત્રો રાષ્ટ્રો દીર્ઘતમઃપિતા ।
ધન્વન્તરિર્દીર્ઘતમસ આયુર્વેદપ્રવર્તકઃ

યજ્ઞભુગ્ વાસુદેવાંશઃ સ્મૃતમાત્રાર્તિનાશનઃ ।
તત્પુત્રઃ કેતુમાન્ અસ્ય જજ્ઞે ભીમરથસ્તતઃ

દિવોદાસો દ્યુમાંસ્તસ્માત્ પ્રતર્દન ઇતિ સ્મૃતઃ ।
સ એવ શત્રુજિદ્વત્સ ઋતધ્વજ ઇતીરિતઃ ।
તથા કુવલયાશ્વેતિ પ્રોક્તો ઽલર્કાદયસ્તતઃ

ષષ્ટિં વર્ષસહસ્રાણિ ષષ્ટિં વર્ષશતાનિ ચ ।
નાલર્કાદપરો રાજન્ બુભુજે મેદિનીં યુવા

અલર્કાત્ સન્તતિસ્તસ્માત્ સુનીથો ઽથ નિકેતનઃ ।
ધર્મકેતુઃ સુતસ્તસ્માત્ સત્યકેતુરજાયત

ધૃષ્ટકેતુસ્તતસ્તસ્માત્ સુકુમારઃ ક્ષિતીશ્વરઃ ।
વીતિહોત્રો ઽસ્ય ભર્ગો ઽતો ભાર્ગભૂમિરભૂન્ નૃપ

ઇતીમે કાશયો ભૂપાઃ ક્ષત્રવૃદ્ધાન્વયાયિનઃ ।
રાભસ્ય રભસઃ પુત્રો ગમ્ભીરશ્ચાક્રિયસ્તતઃ

તદ્ગોત્રં બ્રહ્મવિજ્ જજ્ઞે શૃણુ વંશમનેનસઃ ।
શુદ્ધસ્તતઃ શુચિસ્તસ્માચ્ ચિત્રકૃદ્ધર્મસારથિઃ

તતઃ શાન્તરજો જજ્ઞે કૃતકૃત્યઃ સ આત્મવાન્ ।
રજેઃ પઞ્ચશતાન્યાસન્ પુત્રાણામમિતૌજસામ્

દેવૈરભ્યર્થિતો દૈત્યાન્ હત્વેન્દ્રાયાદદાદ્દિવમ્ ।
ઇન્દ્રસ્તસ્મૈ પુનર્દત્ત્વા ગૃહીત્વા ચરણૌ રજેઃ

આત્માનમર્પયામાસ પ્રહ્રાદાદ્યરિશઙ્કિતઃ ।
પિતર્યુપરતે પુત્રા યાચમાનાય નો દદુઃ

ત્રિવિષ્ટપં મહેન્દ્રાય યજ્ઞભાગાન્ સમાદદુઃ ।
ગુરુણા હૂયમાને ઽગ્નૌ બલભિત્ તનયાન્ રજેઃ

અવધીદ્ભ્રંશિતાન્ માર્ગાન્ ન કશ્ચિદવશેષિતઃ ।
કુશાત્ પ્રતિઃ ક્ષાત્રવૃદ્ધાત્ સઞ્જયસ્તત્સુતો જયઃ

તતઃ કૃતઃ કૃતસ્યાપિ જજ્ઞે હર્યબલો નૃપઃ ।
સહદેવસ્તતો હીનો જયસેનસ્તુ તત્સુતઃ

સઙ્કૃતિસ્તસ્ય ચ જયઃ ક્ષત્રધર્મા મહારથઃ ।
ક્ષત્રવૃદ્ધાન્વયા ભૂપા ઇમે શૃણ્વ્ અથ નાહુષાન્