ભાગવત પુરાણ · અધ્યાય 09.13

ભ્પ્_09.13.001।0 શ્રીશુક ઉવાચ
નિમિરિક્ષ્વાકુતનયો વસિષ્ઠમવૃતર્ત્વિજમ્ ।
આરભ્ય સત્રં સો ઽપ્યાહ શક્રેણ પ્રાગ્ વૃતો ઽસ્મિ ભોઃ

તં નિર્વર્ત્યાગમિષ્યામિ તાવન્ માં પ્રતિપાલય ।
તૂષ્ણીમાસીદ્ગૃહપતિઃ સો ઽપીન્દ્રસ્યાકરોન્ મખમ્

નિમિત્તશ્ચલમિદં વિદ્વાન્ સત્રમારભતામાત્મવાન્ ।
ઋત્વિગ્ભિરપરૈસ્તાવન્ નાગમદ્યાવતા ગુરુઃ

શિષ્યવ્યતિક્રમં વીક્ષ્ય તં નિર્વર્ત્યાગતો ગુરુઃ ।
અશપત્ પતતાદ્દેહો નિમેઃ પણ્ડિતમાનિનઃ

નિમિઃ પ્રતિદદૌ શાપં ગુરવે ઽધર્મવર્તિને ।
તવાપિ પતતાદ્દેહો લોભાદ્ધર્મમજાનતઃ

ઇત્યુત્સસર્જ સ્વં દેહં નિમિરધ્યાત્મકોવિદઃ ।
મિત્રાવરુણયોર્જજ્ઞે ઉર્વશ્યાં પ્રપિતામહઃ

ગન્ધવસ્તુષુ તદ્દેહં નિધાય મુનિસત્તમાઃ ।
સમાપ્તે સત્રયાગે ચ દેવાન્ ઊચુઃ સમાગતાન્

રાજ્ઞો જીવતુ દેહો ઽયં પ્રસન્નાઃ પ્રભવો યદિ ।
તથેત્યુક્તે નિમિઃ પ્રાહ મા ભૂન્ મે દેહબન્ધનમ્

યસ્ય યોગં ન વાઞ્છન્તિ વિયોગભયકાતરાઃ ।
ભજન્તિ ચરણામ્ભોજં મુનયો હરિમેધસઃ

દેહં નાવરુરુત્સે ઽહં દુઃખશોકભયાવહમ્ ।
સર્વત્રાસ્ય યતો મૃત્યુર્મત્સ્યાનામુદકે યથા

ભ્પ્_09.13.011।0 દેવા ઊચુઃ
વિદેહ ઉષ્યતાં કામં લોચનેષુ શરીરિણામ્ ।
ઉન્મેષણનિમેષાભ્યાં લક્ષિતો ઽધ્યાત્મસંસ્થિતઃ

અરાજકભયં ન્-ણાં મન્યમાના મહર્ષયઃ ।
દેહં મમન્થુઃ સ્મ નિમેઃ કુમારઃ સમજાયત

જન્મના જનકઃ સો ઽભૂદ્વૈદેહસ્તુ વિદેહજઃ ।
મિથિલો મથનાજ્ જાતો મિથિલા યેન નિર્મિતા

તસ્માદુદાવસુસ્તસ્ય પુત્રો ઽભૂન્ નન્દિવર્ધનઃ ।
તતઃ સુકેતુસ્તસ્યાપિ દેવરાતો મહીપતે

તસ્માદ્બૃહદ્રથસ્તસ્ય મહાવીર્યઃ સુધૃત્પિતા ।
સુધૃતેર્ધૃષ્ટકેતુર્વૈ હર્યશ્વો ઽથ મરુસ્તતઃ

મરોઃ પ્રતીપકસ્તસ્માજ્ જાતઃ કૃતરથો યતઃ ।
દેવમીઢસ્તસ્ય પુત્રો વિશ્રુતો ઽથ મહાધૃતિઃ

કૃતિરાતસ્તતસ્તસ્માન્ મહારોમા ચ તત્સુતઃ ।
સ્વર્ણરોમા સુતસ્તસ્ય હ્રસ્વરોમા વ્યજાયત

તતઃ શીરધ્વજો જજ્ઞે યજ્ઞાર્થં કર્ષતો મહીમ્ ।
સીતા શીરાગ્રતો જાતા તસ્માત્ શીરધ્વજઃ સ્મૃતઃ

કુશધ્વજસ્તસ્ય પુત્રસ્તતો ધર્મધ્વજો નૃપઃ ।
ધર્મધ્વજસ્ય દ્વૌ પુત્રૌ કૃતધ્વજમિતધ્વજૌ

કૃતધ્વજાત્ કેશિધ્વજઃ ખાણ્ડિક્યસ્તુ મિતધ્વજાત્ ।
કૃતધ્વજસુતો રાજન્નાત્મવિદ્યાવિશારદઃ

ખાણ્ડિક્યઃ કર્મતત્ત્વજ્ઞો ભીતઃ કેશિધ્વજાદ્દ્રુતઃ ।
ભાનુમાંસ્તસ્ય પુત્રો ઽભૂચ્ છતદ્યુમ્નસ્તુ તત્સુતઃ

શુચિસ્તુ તનયસ્તસ્માત્ સનદ્વાજઃ સુતો ઽભવત્ ।
ઊર્જકેતુઃ સનદ્વાજાદજો ઽથ પુરુજિત્ સુતઃ

અરિષ્ટનેમિસ્તસ્યાપિ શ્રુતાયુસ્તત્ સુપાર્શ્વકઃ ।
તતશ્ચિત્રરથો યસ્ય ક્ષેમાધિર્મિથિલાધિપઃ

તસ્માત્ સમરથસ્તસ્ય સુતઃ સત્યરથસ્તતઃ ।
આસીદુપગુરુસ્તસ્માદુપગુપ્તો ઽગ્નિસમ્ભવઃ

વસ્વનન્તો ઽથ તત્પુત્રો યુયુધો યત્ સુભાષણઃ ।
શ્રુતસ્તતો જયસ્તસ્માદ્વિજયો ઽસ્માદૃતઃ સુતઃ

શુનકસ્તત્સુતો જજ્ઞે વીતહવ્યો ધૃતિસ્તતઃ ।
બહુલાશ્વો ધૃતેસ્તસ્ય કૃતિરસ્ય મહાવશી

એતે વૈ મૈથિલા રાજન્નાત્મવિદ્યાવિશારદાઃ ।
યોગેશ્વરપ્રસાદેન દ્વન્દ્વૈર્મુક્તા ગૃહેષ્વ્ અપિ