ભાગવત પુરાણ · અધ્યાય 06.19

ભ્પ્_06.19.001।0 શ્રીરાજોવાચ
વ્રતં પુંસવનં બ્રહ્મન્ ભવતા યદુદીરિતમ્ ।
તસ્ય વેદિતુમિચ્છામિ યેન વિષ્ણુઃ પ્રસીદતિ

ભ્પ્_06.19.002।0 શ્રીશુક ઉવાચ
શુક્લે માર્ગશિરે પક્ષે યોષિદ્ભર્તુરનુજ્ઞયા ।
આરભેત વ્રતમિદં સાર્વકામિકમાદિતઃ

નિશમ્ય મરુતાં જન્મ બ્રાહ્મણાન્ અનુમન્ત્ર્ય ચ ।
સ્નાત્વા શુક્લદતી શુક્લે વસીતાલઙ્કૃતામ્બરે ।
પૂજયેત્ પ્રાતરાશાત્ પ્રાગ્ ભગવન્તં શ્રિયા સહ

અલં તે નિરપેક્ષાય પૂર્ણકામ નમો ઽસ્તુ તે ।
મહાવિભૂતિપતયે નમઃ સકલસિદ્ધયે

યથા ત્વં કૃપયા ભૂત્યા તેજસા મહિમૌજસા ।
જુષ્ટ ઈશ ગુણૈઃ સર્વૈસ્તતો ઽસિ ભગવાન્ પ્રભુઃ

વિષ્ણુપત્નિ મહામાયે મહાપુરુષલક્ષણે ।
પ્રીયેથા મે મહાભાગે લોકમાતર્નમો ઽસ્તુ તે

ઓં નમો ભગવતે મહાપુરુષાય મહાનુભાવાય મહાવિભૂતિપતયે સહ મહાવિભૂતિભિર્બલિમુપહરામીતિ અનેનાહરહર્મન્ત્રેણ વિષ્ણોરાવાહનાર્ઘ્યપાદ્યોપસ્પર્શનસ્નાનવાસૌપવીતવિભૂષણગન્ધપુષ્પધૂપદીપોપહારાદ્યુપચારાન્ સુસમાહિતોપાહરેત્

_*
હવિઃશેષં ચ જુહુયાદનલે દ્વાદશાહુતીઃ ।
ઓં નમો ભગવતે મહાપુરુષાય મહાવિભૂતિપતયે સ્વાહેતિ

શ્રિયં વિષ્ણું ચ વરદાવાશિષાં પ્રભવાવુભૌ ।
ભક્ત્યા સમ્પૂજયેન્ નિત્યં યદીચ્છેત્ સર્વસમ્પદઃ

પ્રણમેદ્દણ્ડવદ્ભૂમૌ ભક્તિપ્રહ્વેણ ચેતસા ।
દશવારં જપેન્ મન્ત્રં તતઃ સ્તોત્રમુદીરયેત્

યુવાં તુ વિશ્વસ્ય વિભૂ જગતઃ કારણં પરમ્ ।
ઇયં હિ પ્રકૃતિઃ સૂક્ષ્મા માયાશક્તિર્દુરત્યયા

તસ્યા અધીશ્વરઃ સાક્ષાત્ ત્વમેવ પુરુષઃ પરઃ ।
ત્વં સર્વયજ્ઞ ઇજ્યેયં ક્રિયેયં ફલભુગ્ ભવાન્

ગુણવ્યક્તિરિયં દેવી વ્યઞ્જકો ગુણભુગ્ ભવાન્ ।
ત્વં હિ સર્વશરીર્ય્ આત્મા શ્રીઃ શરીરેન્દ્રિયાશયાઃ ।
નામરૂપે ભગવતી પ્રત્યયસ્ત્વમપાશ્રયઃ

યથા યુવાં ત્રિલોકસ્ય વરદૌ પરમેષ્ઠિનૌ ।
તથા મ ઉત્તમશ્લોક સન્તુ સત્યા મહાશિષઃ

ઇત્ય્ અભિષ્ટૂય વરદં શ્રીનિવાસં શ્રિયા સહ ।
તન્ નિઃસાર્યોપહરણં દત્ત્વાચમનમર્ચયેત્

તતઃ સ્તુવીત સ્તોત્રેણ ભક્તિપ્રહ્વેણ ચેતસા ।
યજ્ઞોચ્છિષ્ટમવઘ્રાય પુનરભ્યર્ચયેદ્ધરિમ્

પતિં ચ પરયા ભક્ત્યા મહાપુરુષચેતસા ।
પ્રિયૈસ્તૈસ્તૈરુપનમેત્ પ્રેમશીલઃ સ્વયં પતિઃ ।
બિભૃયાત્ સર્વકર્માણિ પત્ન્યા ઉચ્ચાવચાનિ ચ

કૃતમેકતરેણાપિ દમ્પત્યોરુભયોરપિ ।
પત્ન્યાં કુર્યાદનર્હાયાં પતિરેતત્ સમાહિતઃ

વિષ્ણોર્વ્રતમિદં બિભ્રન્ ન વિહન્યાત્ કથઞ્ચન ।
વિપ્રાન્ સ્ત્રિયો વીરવતીઃ સ્રગ્ગન્ધબલિમણ્ડનૈઃ ।
અર્ચેદહરહર્ભક્ત્યા દેવં નિયમમાસ્થિતા

ઉદ્વાસ્ય દેવં સ્વે ધામ્નિ તન્નિવેદિતમગ્રતઃ ।
અદ્યાદાત્મવિશુદ્ધ્યર્થં સર્વકામસમૃદ્ધયે

એતેન પૂજાવિધિના માસાન્ દ્વાદશ હાયનમ્ ।
નીત્વાથોપરમેત્ સાધ્વી કાર્તિકે ચરમે ઽહનિ

શ્વોભૂતે ઽપ ઉપસ્પૃશ્ય કૃષ્ણમભ્યર્ચ્ય પૂર્વવત્ ।
પયઃશૃતેન જુહુયાચ્ ચરુણા સહ સર્પિષા ।
પાકયજ્ઞવિધાનેન દ્વાદશૈવાહુતીઃ પતિઃ

આશિષઃ શિરસાદાય દ્વિજૈઃ પ્રીતૈઃ સમીરિતાઃ ।
પ્રણમ્ય શિરસા ભક્ત્યા ભુઞ્જીત તદનુજ્ઞયા

આચાર્યમગ્રતઃ કૃત્વા વાગ્યતઃ સહ બન્ધુભિઃ ।
દદ્યાત્ પત્ન્યૈ ચરોઃ શેષં સુપ્રજાસ્ત્વં સુસૌભગમ્

એતચ્ ચરિત્વા વિધિવદ્વ્રતં વિભોર્ અભીપ્સિતાર્થં લભતે પુમાન્ ઇહ ।
સ્ત્રી ચૈતદાસ્થાય લભેત સૌભગં શ્રિયં પ્રજાં જીવપતિં યશો ગૃહમ્

કન્યા ચ વિન્દેત સમગ્રલક્ષણં પતિં ત્વવીરા હતકિલ્બિષાં ગતિમ્ ।
મૃતપ્રજા જીવસુતા ધનેશ્વરી સુદુર્ભગા સુભગા રૂપમગ્ર્યમ્

વિન્દેદ્વિરૂપા વિરુજા વિમુચ્યતે ય આમયાવીન્દ્રિયકલ્યદેહમ્ ।
એતત્ પઠન્નભ્યુદયે ચ કર્મણ્ય્ અનન્તતૃપ્તિઃ પિતૃદેવતાનામ્

તુષ્ટાઃ પ્રયચ્છન્તિ સમસ્તકામાન્ હોમાવસાને હુતભુક્ શ્રીહરિશ્ચ ।
રાજન્ મહન્ મરુતાં જન્મ પુણ્યં દિતેર્વ્રતં ચાભિહિતં મહત્ તે