ભાગવત પુરાણ · અધ્યાય 06.13

ભ્પ્_06.13.001।0 શ્રીશુક ઉવાચ
વૃત્રે હતે ત્રયો લોકા વિના શક્રેણ ભૂરિદ ।
સપાલા હ્ય્ અભવન્ સદ્યો વિજ્વરા નિર્વૃતેન્દ્રિયાઃ

દેવર્ષિપિતૃભૂતાનિ દૈત્યા દેવાનુગાઃ સ્વયમ્ ।
પ્રતિજગ્મુઃ સ્વધિષ્ણ્યાનિ બ્રહ્મેશેન્દ્રાદયસ્તતઃ

ભ્પ્_06.13.003।0 શ્રીરાજોવાચ
ઇન્દ્રસ્યાનિર્વૃતેર્હેતું શ્રોતુમિચ્છામિ ભો મુને ।
યેનાસન્ સુખિનો દેવા હરેર્દુઃખં કુતો ઽભવત્

ભ્પ્_06.13.004।0 શ્રીશુક ઉવાચ
વૃત્રવિક્રમસંવિગ્નાઃ સર્વે દેવાઃ સહર્ષિભિઃ ।
તદ્વધાયાર્થયન્નિન્દ્રં નૈચ્છદ્ભીતો બૃહદ્વધાત્

ભ્પ્_06.13.005।0 ઇન્દ્ર ઉવાચ
સ્ત્રીભૂદ્રુમજલૈરેનો વિશ્વરૂપવધોદ્ભવમ્ ।
વિભક્તમનુગૃહ્ણદ્ભિર્વૃત્રહત્યાં ક્વ માર્જ્મ્ય્ અહમ્

ભ્પ્_06.13.006।0 શ્રીશુક ઉવાચ
ઋષયસ્તદુપાકર્ણ્ય મહેન્દ્રમિદમબ્રુવન્ ।
યાજયિષ્યામ ભદ્રં તે હયમેધેન મા સ્મ ભૈઃ

હયમેધેન પુરુષં પરમાત્માનમીશ્વરમ્ ।
ઇષ્ટ્વા નારાયણં દેવં મોક્ષ્યસે ઽપિ જગદ્વધાત્

બ્રહ્મહા પિતૃહા ગોઘ્નો માતૃહાચાર્યહાઘવાન્ ।
શ્વાદઃ પુલ્કસકો વાપિ શુદ્ધ્યેરન્ યસ્ય કીર્તનાત્

તમશ્વમેધેન મહામખેન શ્રદ્ધાન્વિતો ઽસ્માભિરનુષ્ઠિતેન ।
હત્વાપિ સબ્રહ્મચરાચરં ત્વં ન લિપ્યસે કિં ખલનિગ્રહેણ

ભ્પ્_06.13.010।0 શ્રીશુક ઉવાચ
એવં સઞ્ચોદિતો વિપ્રૈર્મરુત્વાન્ અહનદ્રિપુમ્ ।
બ્રહ્મહત્યા હતે તસ્મિન્નાસસાદ વૃષાકપિમ્

તયેન્દ્રઃ સ્માસહત્ તાપં નિર્વૃતિર્નામુમાવિશત્ ।
હ્રીમન્તં વાચ્યતાં પ્રાપ્તં સુખયન્ત્ય્ અપિ નો ગુણાઃ

તાં દદર્શાનુધાવન્તીં ચાણ્ડાલીમિવ રૂપિણીમ્ ।
જરયા વેપમાનાઙ્ગીં યક્ષ્મગ્રસ્તામસૃક્પટામ્

વિકીર્ય પલિતાન્ કેશાંસ્તિષ્ઠ તિષ્ઠેતિ ભાષિણીમ્ ।
મીનગન્ધ્યસુગન્ધેન કુર્વતીં માર્ગદૂષણમ્

નભો ગતો દિશઃ સર્વાઃ સહસ્રાક્ષો વિશામ્પતે ।
પ્રાગુદીચીં દિશં તૂર્ણં પ્રવિષ્ટો નૃપ માનસમ્

સ આવસત્ પુષ્કરનાલતન્તૂન્ અલબ્ધભોગો યદિહાગ્નિદૂતઃ ।
વર્ષાણિ સાહસ્રમલક્ષિતો ઽન્તઃ સઞ્ચિન્તયન્ બ્રહ્મવધાદ્વિમોક્ષમ્

તાવત્ ત્રિણાકં નહુષઃ શશાસ વિદ્યાતપોયોગબલાનુભાવઃ ।
સ સમ્પદૈશ્વર્યમદાન્ધબુદ્ધિર્ નીતસ્તિરશ્ચાં ગતિમિન્દ્રપત્ન્યા

તતો ગતો બ્રહ્મગિરોપહૂત ઋતમ્ભરધ્યાનનિવારિતાઘઃ ।
પાપસ્તુ દિગ્દેવતયા હતૌજાસ્ તં નાભ્યભૂદવિતં વિષ્ણુપત્ન્યા

તં ચ બ્રહ્મર્ષયો ઽભ્યેત્ય હયમેધેન ભારત ।
યથાવદ્દીક્ષયાં ચક્રુઃ પુરુષારાધનેન હ

અથેજ્યમાને પુરુષે સર્વદેવમયાત્મનિ ।
અશ્વમેધે મહેન્દ્રેણ વિતતે બ્રહ્મવાદિભિઃ

સ વૈ ત્વાષ્ટ્રવધો ભૂયાન્ અપિ પાપચયો નૃપ ।
નીતસ્તેનૈવ શૂન્યાય નીહાર ઇવ ભાનુના

સ વાજિમેધેન યથોદિતેન વિતાયમાનેન મરીચિમિશ્રૈઃ ।
ઇષ્ટ્વાધિયજ્ઞં પુરુષં પુરાણમ્ ઇન્દ્રો મહાન્ આસ વિધૂતપાપઃ

ઇદં મહાખ્યાનમશેષપાપ્મનાં પ્રક્ષાલનં તીર્થપદાનુકીર્તનમ્ ।
ભક્ત્યુચ્છ્રયં ભક્તજનાનુવર્ણનં મહેન્દ્રમોક્ષં વિજયં મરુત્વતઃ

પઠેયુરાખ્યાનમિદં સદા બુધાઃ શૃણ્વન્ત્ય્ અથો પર્વણિ પર્વણીન્દ્રિયમ્ ।
ધન્યં યશસ્યં નિખિલાઘમોચનં રિપુઞ્જયં સ્વસ્ત્યયનં તથાયુષમ્