ભાગવત પુરાણ · અધ્યાય 06.11

ભ્પ્_06.11.001।0 શ્રીશુક ઉવાચ
ત એવં શંસતો ધર્મં વચઃ પત્યુરચેતસઃ ।
નૈવાગૃહ્ણન્ત સમ્ભ્રાન્તાઃ પલાયનપરા નૃપ

વિશીર્યમાણાં પૃતનામાસુરીમસુરર્ષભઃ ।
કાલાનુકૂલૈસ્ત્રિદશૈઃ કાલ્યમાનામનાથવત્

દૃષ્ટ્વાતપ્યત સઙ્ક્રુદ્ધ ઇન્દ્રશત્રુરમર્ષિતઃ ।
તાન્ નિવાર્યૌજસા રાજન્ નિર્ભર્ત્સ્યેદમુવાચ હ

કિં વ ઉચ્ચરિતૈર્માતુર્ધાવદ્ભિઃ પૃષ્ઠતો હતૈઃ ।
ન હિ ભીતવધઃ શ્લાઘ્યો ન સ્વર્ગ્યઃ શૂરમાનિનામ્

યદિ વઃ પ્રધને શ્રદ્ધા સારં વા ક્ષુલ્લકા હૃદિ ।
અગ્રે તિષ્ઠત માત્રં મે ન ચેદ્ગ્રામ્યસુખે સ્પૃહા

એવં સુરગણાન્ ક્રુદ્ધો ભીષયન્ વપુષા રિપૂન્ ।
વ્યનદત્ સુમહાપ્રાણો યેન લોકા વિચેતસઃ

તેન દેવગણાઃ સર્વે વૃત્રવિસ્ફોટનેન વૈ ।
નિપેતુર્મૂર્ચ્છિતા ભૂમૌ યથૈવાશનિના હતાઃ

મમર્દ પદ્ભ્યાં સુરસૈન્યમાતુરં નિમીલિતાક્ષં રણરઙ્ગદુર્મદઃ ।
ગાં કમ્પયન્નુદ્યતશૂલ ઓજસા નાલં વનં યૂથપતિર્યથોન્મદઃ

વિલોક્ય તં વજ્રધરો ઽત્યમર્ષિતઃ સ્વશત્રવે ઽભિદ્રવતે મહાગદામ્ ।
ચિક્ષેપ તામાપતતીં સુદુઃસહાં જગ્રાહ વામેન કરેણ લીલયા

સ ઇન્દ્રશત્રુઃ કુપિતો ભૃશં તયા મહેન્દ્રવાહં ગદયોરુવિક્રમઃ ।
જઘાન કુમ્ભસ્થલ ઉન્નદન્ મૃધે તત્ કર્મ સર્વે સમપૂજયન્ નૃપ

ઐરાવતો વૃત્રગદાભિમૃષ્ટો વિઘૂર્ણિતો ઽદ્રિઃ કુલિશાહતો યથા ।
અપાસરદ્ભિન્નમુખઃ સહેન્દ્રો મુઞ્ચન્નસૃક્ સપ્તધનુર્ભૃશાર્તઃ

ન સન્નવાહાય વિષણ્ણચેતસે પ્રાયુઙ્ક્ત ભૂયઃ સ ગદાં મહાત્મા ।
ઇન્દ્રો ઽમૃતસ્યન્દિકરાભિમર્શ વીતવ્યથક્ષતવાહો ઽવતસ્થે

સ તં નૃપેન્દ્રાહવકામ્યયા રિપું વજ્રાયુધં ભ્રાતૃહણં વિલોક્ય ।
સ્મરંશ્ચ તત્કર્મ નૃશંસમંહઃ શોકેન મોહેન હસન્ જગાદ

ભ્પ્_06.11.014।0 શ્રીવૃત્ર ઉવાચ
દિષ્ટ્યા ભવાન્ મે સમવસ્થિતો રિપુર્ યો બ્રહ્મહા ગુરુહા ભ્રાતૃહા ચ ।
દિષ્ટ્યાનૃણો ઽદ્યાહમસત્તમ ત્વયા મચ્છૂલનિર્ભિન્નદૃષદ્ધૃદાચિરાત્

યો નો ઽગ્રજસ્યાત્મવિદો દ્વિજાતેર્ ગુરોરપાપસ્ય ચ દીક્ષિતસ્ય ।
વિશ્રભ્ય ખડ્ગેન શિરાંસ્ય્ અવૃશ્ચત્ પશોરિવાકરુણઃ સ્વર્ગકામઃ

શ્રીહ્રીદયાકીર્તિભિરુજ્ઝિતં ત્વાં સ્વકર્મણા પુરુષાદૈશ્ચ ગર્હ્યમ્ ।
કૃચ્છ્રેણ મચ્છૂલવિભિન્નદેહમ્ અસ્પૃષ્ટવહ્નિં સમદન્તિ ગૃધ્રાઃ

અન્યે ઽનુ યે ત્વેહ નૃશંસમજ્ઞા યદુદ્યતાસ્ત્રાઃ પ્રહરન્તિ મહ્યમ્ ।
તૈર્ભૂતનાથાન્ સગણાન્ નિશાત ત્રિશૂલનિર્ભિન્નગલૈર્યજામિ

અથો હરે મે કુલિશેન વીર હર્તા પ્રમથ્યૈવ શિરો યદીહ ।
તત્રાનૃણો ભૂતબલિં વિધાય મનસ્વિનાં પાદરજઃ પ્રપત્સ્યે

સુરેશ કસ્માન્ ન હિનોષિ વજ્રં પુરઃ સ્થિતે વૈરિણિ મય્ય્ અમોઘમ્ ।
મા સંશયિષ્ઠા ન ગદેવ વજ્રઃ સ્યાન્ નિષ્ફલઃ કૃપણાર્થેવ યાચ્ઞા

નન્વેષ વજ્રસ્તવ શક્ર તેજસા હરેર્દધીચેસ્તપસા ચ તેજિતઃ ।
તેનૈવ શત્રું જહિ વિષ્ણુયન્ત્રિતો યતો હરિર્વિજયઃ શ્રીર્ગુણાસ્તતઃ

અહં સમાધાય મનો યથાહ નઃ સઙ્કર્ષણસ્તચ્ચરણારવિન્દે ।
ત્વદ્વજ્રરંહોલુલિતગ્રામ્યપાશો ગતિં મુનેર્યામ્ય્ અપવિદ્ધલોકઃ

પુંસાં કિલૈકાન્તધિયાં સ્વકાનાં યાઃ સમ્પદો દિવિ ભૂમૌ રસાયામ્ ।
ન રાતિ યદ્દ્વેષ ઉદ્વેગ આધિર્ મદઃ કલિર્વ્યસનં સમ્પ્રયાસઃ

ત્રૈવર્ગિકાયાસવિઘાતમસ્મત્ પતિર્વિધત્તે પુરુષસ્ય શક્ર ।
તતો ઽનુમેયો ભગવત્પ્રસાદો યો દુર્લભો ઽકિઞ્ચનગોચરો ઽન્યૈઃ

અહં હરે તવ પાદૈકમૂલ દાસાનુદાસો ભવિતાસ્મિ ભૂયઃ ।
મનઃ સ્મરેતાસુપતેર્ગુણાંસ્તે ગૃણીત વાક્ કર્મ કરોતુ કાયઃ

ન નાકપૃષ્ઠં ન ચ પારમેષ્ઠ્યં ન સાર્વભૌમં ન રસાધિપત્યમ્ ।
ન યોગસિદ્ધીરપુનર્ભવં વા સમઞ્જસ ત્વા વિરહય્ય કાઙ્ક્ષે

અજાતપક્ષા ઇવ માતરં ખગાઃ સ્તન્યં યથા વત્સતરાઃ ક્ષુધાર્તાઃ ।
પ્રિયં પ્રિયેવ વ્યુષિતં વિષણ્ણા મનો ઽરવિન્દાક્ષ દિદૃક્ષતે ત્વામ્

મમોત્તમશ્લોકજનેષુ સખ્યં સંસારચક્રે ભ્રમતઃ સ્વકર્મભિઃ ।
ત્વન્માયયાત્માત્મજદારગેહેષ્વ્ આસક્તચિત્તસ્ય ન નાથ ભૂયાત્