ભાગવત પુરાણ · અધ્યાય 06.08

ભ્પ્_06.08.001।0 શ્રીરાજોવાચ
યયા ગુપ્તઃ સહસ્રાક્ષઃ સવાહાન્ રિપુસૈનિકાન્ ।
ક્રીડન્નિવ વિનિર્જિત્ય ત્રિલોક્યા બુભુજે શ્રિયમ્

ભગવંસ્તન્ મમાખ્યાહિ વર્મ નારાયણાત્મકમ્ ।
યથાતતાયિનઃ શત્રૂન્ યેન ગુપ્તો ઽજયન્ મૃધે

ભ્પ્_06.08.003।0 શ્રીબાદરાયણિરુવાચ
વૃતઃ પુરોહિતસ્ત્વાષ્ટ્રો મહેન્દ્રાયાનુપૃચ્છતે ।
નારાયણાખ્યં વર્માહ તદિહૈકમનાઃ શૃણુ

ભ્પ્_06.08.004।0 શ્રીવિશ્વરૂપ ઉવાચ
ધૌતાઙ્ઘ્રિપાણિરાચમ્ય સપવિત્ર ઉદઙ્મુખઃ ।
કૃતસ્વાઙ્ગકરન્યાસો મન્ત્રાભ્યાં વાગ્યતઃ શુચિઃ

નારાયણપરં વર્મ સન્નહ્યેદ્ભય આગતે ।
પાદયોર્જાનુનોરૂર્વોરુદરે હૃદ્ય્ અથોરસિ

મુખે શિરસ્ય્ આનુપૂર્વ્યાદોંકારાદીનિ વિન્યસેત્ ।
ઓં નમો નારાયણાયેતિ વિપર્યયમથાપિ વા

કરન્યાસં તતઃ કુર્યાદ્દ્વાદશાક્ષરવિદ્યયા ।
પ્રણવાદિયકારાન્તમઙ્ગુલ્યઙ્ગુષ્ઠપર્વસુ

ન્યસેદ્ધૃદય ઓંકારં વિકારમનુ મૂર્ધનિ ।
ષકારં તુ ભ્રુવોર્મધ્યે ણકારં શિખયા ન્યસેત્

વેકારં નેત્રયોર્યુઞ્જ્યાન્ નકારં સર્વસન્ધિષુ ।
મકારમસ્ત્રમુદ્દિશ્ય મન્ત્રમૂર્તિર્ભવેદ્બુધઃ

સવિસર્ગં ફડન્તં તત્ સર્વદિક્ષુ વિનિર્દિશેત્ ।
ઓં વિષ્ણવે નમ ઇતિ

આત્માનં પરમં ધ્યાયેદ્ધ્યેયં ષટ્શક્તિભિર્યુતમ્ ।
વિદ્યાતેજસ્તપોમૂર્તિમિમં મન્ત્રમુદાહરેત્

ઓં હરિર્વિદધ્યાન્ મમ સર્વરક્ષાં ન્યસ્તાઙ્ઘ્રિપદ્મઃ પતગેન્દ્રપૃષ્ઠે ।
દરારિચર્માસિગદેષુચાપ પાશાન્ દધાનો ઽષ્ટગુણો ઽષ્ટબાહુઃ

જલેષુ માં રક્ષતુ મત્સ્યમૂર્તિર્ યાદોગણેભ્યો વરુણસ્ય પાશાત્ ।
સ્થલેષુ માયાવટુવામનો ઽવ્યાત્ ત્રિવિક્રમઃ ખે ઽવતુ વિશ્વરૂપઃ

દુર્ગેષ્વટવ્યાજિમુખાદિષુ પ્રભુઃ પાયાન્ નૃસિંહો ઽસુરયૂથપારિઃ ।
વિમુઞ્ચતો યસ્ય મહાટ્ટહાસં દિશો વિનેદુર્ન્યપતંશ્ચ ગર્ભાઃ

રક્ષત્વસૌ માધ્વનિ યજ્ઞકલ્પઃ સ્વદંષ્ટ્રયોન્નીતધરો વરાહઃ ।
રામો ઽદ્રિકૂટેષ્વથ વિપ્રવાસે સલક્ષ્મણો ઽવ્યાદ્ભરતાગ્રજો ઽસ્માન્

મામુગ્રધર્માદખિલાત્ પ્રમાદાન્ નારાયણઃ પાતુ નરશ્ચ હાસાત્ ।
દત્તસ્ત્વયોગાદથ યોગનાથઃ પાયાદ્ગુણેશઃ કપિલઃ કર્મબન્ધાત્

સનત્કુમારો ઽવતુ કામદેવાદ્ ધયશીર્ષા માં પથિ દેવહેલનાત્ ।
દેવર્ષિવર્યઃ પુરુષાર્ચનાન્તરાત્ કૂર્મો હરિર્માં નિરયાદશેષાત્

ધન્વન્તરિર્ભગવાન્ પાત્વપથ્યાદ્ દ્વન્દ્વાદ્ભયાદૃષભો નિર્જિતાત્મા ।
યજ્ઞશ્ચ લોકાદવતાજ્ જનાન્તાદ્ બલો ગણાત્ ક્રોધવશાદહીન્દ્રઃ

દ્વૈપાયનો ભગવાન્ અપ્રબોધાદ્ બુદ્ધસ્તુ પાષણ્ડગણપ્રમાદાત્ ।
કલ્કિઃ કલેઃ કાલમલાત્ પ્રપાતુ ધર્માવનાયોરુકૃતાવતારઃ

માં કેશવો ગદયા પ્રાતરવ્યાદ્ ગોવિન્દ આસઙ્ગવમાત્તવેણુઃ ।
નારાયણઃ પ્રાહ્ણ ઉદાત્તશક્તિર્ મધ્યન્દિને વિષ્ણુરરીન્દ્રપાણિઃ

દેવો ઽપરાહ્ણે મધુહોગ્રધન્વા સાયં ત્રિધામાવતુ માધવો મામ્ ।
દોષે હૃષીકેશ ઉતાર્ધરાત્રે નિશીથ એકો ઽવતુ પદ્મનાભઃ

શ્રીવત્સધામાપરરાત્ર ઈશઃ પ્રત્યૂષ ઈશો ઽસિધરો જનાર્દનઃ ।
દામોદરો ઽવ્યાદનુસન્ધ્યં પ્રભાતે વિશ્વેશ્વરો ભગવાન્ કાલમૂર્તિઃ

ચક્રં યુગાન્તાનલતિગ્મનેમિ ભ્રમત્ સમન્તાદ્ભગવત્પ્રયુક્તમ્ ।
દન્દગ્ધિ દન્દગ્ધ્ય્ અરિસૈન્યમાશુ કક્ષં યથા વાતસખો હુતાશઃ

ગદે ઽશનિસ્પર્શનવિસ્ફુલિઙ્ગે નિષ્પિણ્ઢિ નિષ્પિણ્ઢ્ય્ અજિતપ્રિયાસિ ।
કુષ્માણ્ડવૈનાયકયક્ષરક્ષો ભૂતગ્રહાંશ્ચૂર્ણય ચૂર્ણયારીન્

ત્વં યાતુધાનપ્રમથપ્રેતમાતૃ પિશાચવિપ્રગ્રહઘોરદૃષ્ટીન્ ।
દરેન્દ્ર વિદ્રાવય કૃષ્ણપૂરિતો ભીમસ્વનો ઽરેર્હૃદયાનિ કમ્પયન્

ત્વં તિગ્મધારાસિવરારિસૈન્યમ્ ઈશપ્રયુક્તો મમ છિન્ધિ છિન્ધિ ।
ચક્ષૂંષિ ચર્મન્ છતચન્દ્ર છાદય દ્વિષામઘોનાં હર પાપચક્ષુષામ્

યન્ નો ભયં ગ્રહેભ્યો ઽભૂત્ કેતુભ્યો નૃભ્ય એવ ચ ।
સરીસૃપેભ્યો દંષ્ટ્રિભ્યો ભૂતેભ્યો ઽંહોભ્ય એવ ચ

સર્વાણ્ય્ એતાનિ ભગવન્ નામરૂપાનુકીર્તનાત્ ।
પ્રયાન્તુ સઙ્ક્ષયં સદ્યો યે નઃ શ્રેયઃપ્રતીપકાઃ

ગરુડો ભગવાન્ સ્તોત્ર સ્તોભશ્છન્દોમયઃ પ્રભુઃ ।
રક્ષત્વશેષકૃચ્છ્રેભ્યો વિષ્વક્સેનઃ સ્વનામભિઃ

સર્વાપદ્ભ્યો હરેર્નામ રૂપયાનાયુધાનિ નઃ ।
બુદ્ધીન્દ્રિયમનઃપ્રાણાન્ પાન્તુ પાર્ષદભૂષણાઃ

યથા હિ ભગવાન્ એવ વસ્તુતઃ સદસચ્ ચ યત્ ।
સત્યેનાનેન નઃ સર્વે યાન્તુ નાશમુપદ્રવાઃ

યથૈકાત્મ્યાનુભાવાનાં વિકલ્પરહિતઃ સ્વયમ્ ।
ભૂષણાયુધલિઙ્ગાખ્યા ધત્તે શક્તીઃ સ્વમાયયા

તેનૈવ સત્યમાનેન સર્વજ્ઞો ભગવાન્ હરિઃ ।
પાતુ સર્વૈઃ સ્વરૂપૈર્નઃ સદા સર્વત્ર સર્વગઃ

વિદિક્ષુ દિક્ષૂર્ધ્વમધઃ સમન્તાદ્ અન્તર્બહિર્ભગવાન્ નારસિંહઃ ।
પ્રહાપય લોકભયં સ્વનેન સ્વતેજસા ગ્રસ્તસમસ્તતેજાઃ

મઘવન્નિદમાખ્યાતં વર્મ નારાયણાત્મકમ્ ।
વિજેષ્યસે ઽઞ્જસા યેન દંશિતો ઽસુરયૂથપાન્

એતદ્ધારયમાણસ્તુ યં યં પશ્યતિ ચક્ષુષા ।
પદા વા સંસ્પૃશેત્ સદ્યઃ સાધ્વસાત્ સ વિમુચ્યતે

ન કુતશ્ચિદ્ભયં તસ્ય વિદ્યાં ધારયતો ભવેત્ ।
રાજદસ્યુગ્રહાદિભ્યો વ્યાધ્યાદિભ્યશ્ચ કર્હિચિત્

ઇમાં વિદ્યાં પુરા કશ્ચિત્ કૌશિકો ધારયન્ દ્વિજઃ ।
યોગધારણયા સ્વાઙ્ગં જહૌ સ મરુધન્વનિ

તસ્યોપરિ વિમાનેન ગન્ધર્વપતિરેકદા ।
યયૌ ચિત્રરથઃ સ્ત્રીભિર્વૃતો યત્ર દ્વિજક્ષયઃ

ગગનાન્ ન્યપતત્ સદ્યઃ સવિમાનો હ્ય્ અવાક્શિરાઃ ।
સ વાલિખિલ્યવચનાદસ્થીન્ય્ આદાય વિસ્મિતઃ ।
પ્રાસ્ય પ્રાચીસરસ્વત્યાં સ્નાત્વા ધામ સ્વમન્વગાત્

ભ્પ્_06.08.041।0 શ્રીશુક ઉવાચ
ય ઇદં શૃણુયાત્ કાલે યો ધારયતિ ચાદૃતઃ ।
તં નમસ્યન્તિ ભૂતાનિ મુચ્યતે સર્વતો ભયાત્

એતાં વિદ્યામધિગતો વિશ્વરૂપાચ્ છતક્રતુઃ ।
ત્રૈલોક્યલક્ષ્મીં બુભુજે વિનિર્જિત્ય મૃધે ઽસુરાન્