ભાગવત પુરાણ · અધ્યાય 04.27

ભ્પ્_04.27.001।0 નારદ ઉવાચ
ઇત્થં પુરઞ્જનં સધ્ર્યગ્ વશમાનીય વિભ્રમૈઃ ।
પુરઞ્જની મહારાજ રેમે રમયતી પતિમ્

સ રાજા મહિષીં રાજન્ સુસ્નાતાં રુચિરાનનામ્ ।
કૃત-સ્વસ્ત્યયનાં તૃપ્તામ્ અભ્યનન્દદ્ ઉપાગતામ્

તયોપગૂઢઃ પરિરબ્ધ-કન્ધરો રહો ઽનુમન્ત્રૈર્ અપકૃષ્ટ-ચેતનઃ ।
ન કાલ-રંહો બુબુધે દુરત્યયં દિવા નિશેતિ પ્રમદા-પરિગ્રહઃ

શયાન ઉન્નદ્ધ-મદો મહા-મના મહાર્હ-તલ્પે મહિષી-ભુજોપધિઃ ।
તામ્ એવ વીરો મનુતે પરં યતસ્ તમો-ઽભિભૂતો ન નિજં પરં ચ યત્

તયૈવં રમમાણસ્ય કામ-કશ્મલ-ચેતસઃ ।
ક્ષણાર્ધમ્ ઇવ રાજેન્દ્ર વ્યતિક્રાન્તં નવં વયઃ

તસ્યામ્ અજનયત્ પુત્રાન્ પુરઞ્જન્યાં પુરઞ્જનઃ ।
શતાન્ય્ એકાદશ વિરાડ્ આયુષો ઽર્ધમ્ અથાત્યગાત્

દુહિતૄર્ દશોત્તર-શતં પિતૃ-માતૃ-યશસ્કરીઃ ।
શીલૌદાર્ય-ગુણોપેતાઃ પૌરઞ્જન્યઃ પ્રજા-પતે

સ પઞ્ચાલ-પતિઃ પુત્રાન્ પિતૃ-વંશ-વિવર્ધનાન્ ।
દારૈઃ સંયોજયામ્ આસ દુહિતૄઃ સદૃશૈર્ વરૈઃ

પુત્રાણાં ચાભવન્ પુત્રા એકૈકસ્ય શતં શતમ્ ।
યૈર્ વૈ પૌરઞ્જનો વંશઃ પઞ્ચાલેષુ સમેધિતઃ

તેષુ તદ્-રિક્થ-હારેષુ ગૃહ-કોશાનુજીવિષુ ।
નિરૂઢેન મમત્વેન વિષયેષ્વ્ અન્વબધ્યત

ઈજે ચ ક્રતુભિર્ ઘોરૈર્ દીક્ષિતઃ પશુ-મારકૈઃ ।
દેવાન્ પિતૄન્ ભૂત-પતીન્ નાના-કામો યથા ભવાન્

યુક્તેષ્વ્ એવં પ્રમત્તસ્ય કુટુમ્બાસક્ત-ચેતસઃ ।
આસસાદ સ વૈ કાલો યો ઽપ્રિયઃ પ્રિય-યોષિતામ્

ચણ્ડવેગ ઇતિ ખ્યાતો ગન્ધર્વાધિપતિર્ નૃપ ।
ગન્ધર્વાસ્ તસ્ય બલિનઃ ષષ્ટ્ય્-ઉત્તર-શત-ત્રયમ્

ગન્ધર્વ્યસ્ તાદૃશીર્ અસ્ય મૈથુન્યશ્ ચ સિતાસિતાઃ ।
પરિવૃત્ત્યા વિલુમ્પન્તિ સર્વ-કામ-વિનિર્મિતામ્

તે ચણ્ડવેગાનુચરાઃ પુરઞ્જન-પુરં યદા ।
હર્તુમ્ આરેભિરે તત્ર પ્રત્યષેધત્ પ્રજાગરઃ

સ સપ્તભિઃ શતૈર્ એકો વિંશત્યા ચ શતં સમાઃ ।
પુરઞ્જન-પુરાધ્યક્ષો ગન્ધર્વૈર્ યુયુધે બલી

ક્ષીયમાણે સ્વ-સમ્બન્ધે એકસ્મિન્ બહુભિર્ યુધા ।
ચિન્તાં પરાં જગામાર્તઃ સ-રાષ્ટ્ર-પુર-બાન્ધવઃ

સ એવ પુર્યાં મધુ-ભુક્ પઞ્ચાલેષુ સ્વ-પાર્ષદૈઃ ।
ઉપનીતં બલિં ગૃહ્ણન્ સ્ત્રી-જિતો નાવિદદ્ ભયમ્

કાલસ્ય દુહિતા કાચિત્ ત્રિ-લોકીં વરમ્ ઇચ્છતી ।
પર્યટન્તી ન બર્હિષ્મન્ પ્રત્યનન્દત કશ્ચન

દૌર્ભાગ્યેનાત્મનો લોકે વિશ્રુતા દુર્ભગેતિ સા ।
યા તુષ્ટા રાજર્ષયે તુ વૃતાદાત્ પૂરવે વરમ્

કદાચિદ્ અટમાના સા બ્રહ્મ-લોકાન્ મહીં ગતમ્ ।
વવ્રે બૃહદ્-વ્રતં માં તુ જાનતી કામ-મોહિતા

મયિ સંરભ્ય વિપુલ- મદાચ્ છાપં સુદુઃસહમ્ ।
સ્થાતુમ્ અર્હસિ નૈકત્ર મદ્-યાચ્ઞા-વિમુખો મુને

તતો વિહત-સઙ્કલ્પા કન્યકા યવનેશ્વરમ્ ।
મયોપદિષ્ટમ્ આસાદ્ય વવ્રે નામ્ના ભયં પતિમ્

ઋષભં યવનાનાં ત્વાં વૃણે વીરેપ્સિતં પતિમ્ ।
સઙ્કલ્પસ્ ત્વયિ ભૂતાનાં કૃતઃ કિલ ન રિષ્યતિ

દ્વાવ્ ઇમાવ્ અનુશોચન્તિ બાલાવ્ અસદ્-અવગ્રહૌ ।
યલ્ લોક-શાસ્ત્રોપનતં ન રાતિ ન તદ્ ઇચ્છતિ

અથો ભજસ્વ માં ભદ્ર ભજન્તીં મે દયાં કુરુ ।
એતાવાન્ પૌરુષો ધર્મો યદ્ આર્તાન્ અનુકમ્પતે

કાલ-કન્યોદિત-વચો નિશમ્ય યવનેશ્વરઃ ।
ચિકીર્ષુર્ દેવ-ગુહ્યં સ સસ્મિતં તામ્ અભાષત

મયા નિરૂપિતસ્ તુભ્યં પતિર્ આત્મ-સમાધિના ।
નાભિનન્દતિ લોકો ઽયં ત્વામ્ અભદ્રામ્ અસમ્મતામ્

ત્વમ્ અવ્યક્ત-ગતિર્ ભુઙ્ક્ષ્વ લોકં કર્મ-વિનિર્મિતમ્ ।
યા હિ મે પૃતના-યુક્તા પ્રજા-નાશં પ્રણેષ્યસિ

પ્રજ્વારો ઽયં મમ ભ્રાતા ત્વં ચ મે ભગિની ભવ ।
ચરામ્ય્ ઉભાભ્યાં લોકે ઽસ્મિન્ન્ અવ્યક્તો ભીમ-સૈનિકઃ