ભગવદ્ગીતા · અધ્યાય 94

શ્રીધરઃ : કિં ચ ભવાપ્યયાવ્ ઇતિ । ભૂતાનાં ભવાપ્યયૌ સૃષ્ટિ-પ્રલયૌ ત્વત્તઃ સકાશાદ્ એવ ભવતઃ । ઇતિ શ્રુતં મયા । અહં કૃત્સ્નસ્ય જગતઃ પ્રભવઃ પ્રલયસ્ તથા ઇત્ય્ આદૌ । વિસ્તરશઃ પુનઃ પુનઃ । કમલસ્ય પત્રે ઇવ સુપ્રસન્ને વિશાલે અક્ષિણી યસ્ય તવ હે કમલ-પત્રાક્ષ ! માહાત્મ્યમ્ અપિ ચાવ્યયમ્ અક્ષયં શ્રુતમ્ । વિશ્વ-સૃષ્ટ્ય્-આદિ-કર્તૃત્વે ઽપિ સર્વ-નિયન્તૃત્વે ઽપિ શુભાશુભ-કર્મ-કારયિતૃત્વે ઽપિ બન્ધ-મોક્ષાદિ-વિચિત્ર-ફલ-દાતૃત્વે ઽપિ અવિકારાવૈધર્મ્યાસઙ્ગૌદાસીન્યાદિ-લક્ષણમ્ અપરિમિતં મહત્ત્વં ચ શ્રુતમ્ - અવ્યક્તં વ્યક્તિમ્ આપન્નં મન્યન્તે મામ્
અબુદ્ધયઃ ઇતિ । મયા તતમ્ ઇદં સર્વમ્ ઇતિ । ન ચ માં તાનિ કર્માણિ નિબધ્નન્તિ ઇતિ । સમો ઽહં સર્વ-ભૂતેષુ ઇત્ય્ આદિના । અતસ્ ત્વત્-પરતન્ત્રત્વાદ્ અપિ જીવાનામ્ અહં કર્તેત્ય્ આદિર્ મદીયો મોહો વિગત ઇતિ ભાવઃ