ભગવદ્ગીતા · અધ્યાય 144

બલદેવ :
ગીતાર્થાન્ ઇહ સઙ્ગૃહ્ણન્ હરિર્ અષ્ટાદશે ઽખિલાન્ ।
ભક્તેસ્ તત્ર પ્રપત્તેશ્ ચ સો ઽબ્રવીદ્ અતિગોપ્યતામ્ ॥
સર્વ-કર્માણિ મનસા સન્ન્યસ્યાસ્તે સુખં વશી । (ગીતા 5.13) ઇત્ય્ આદૌ સન્ન્યાસ-શબ્દેન કિમ્ ઉક્તમ્ -- ત્યક્ત્વા કર્મ-ફલાસઙ્ગં (ગીતા 4.20) ઇત્યાદૌ ત્યાગ-શબ્દેન ચ કિમ્ ઉક્તં ભગવતા તત્ર સન્દિહાનો ઽર્જુનઃ પૃચ્છતિ સન્ન્યાસસ્યેતિ । સન્ન્યાસ-ત્યાગ-શબ્દૌ શૈલ-તરુ-શબ્દાવ્ ઇવ વિજાતીયાર્થૌ કિં વા કુરુ-પાણ્ડવ-શબ્દાવ્ ઇવ સજાતીયાર્થૌ । યદ્ય્ આદ્યસ્ તર્હિ સન્ન્યાસસ્ય ત્યાગસ્ય ચ તત્ત્વં પૃથગ્-વેદિતુમ્ ઇચ્છામિ । યદ્યન્તસ્ તર્હિ તત્રાવાન્તરોપાધિ-માત્રં ભેદકં ભાવિ, તચ્ ચ વેદિતુમ્ ઇચ્છામિ । હે મહાબાહો કૃષ્ણ હૃષીકેશેતિ ધી-વૃત્તિ-પ્રેરકત્વાત્ ત્વમ્ એવ મત્-સન્દેહમ્ ઉત્પાદયસિ । કેશિ-નિસૂદનેતિ ત્વં મત્-સન્દેહં કેશિનમ્ ઇવ વિનાશયેતિ

ભ્ગ્ 18.2
શ્રીભગવાન્ ઉવાચ
કામ્યાનાં કર્મણાં ન્યાસં સંન્યાસં કવયો વિદુઃ ।
સર્વકર્મફલત્યાગં પ્રાહુસ્ ત્યાગં વિચક્ષણાઃ