Bhagavadbhaktistotra · શ્લોક 41-60

શાન્તાત્મનાપિ ભવતા ભગવન્ પ્રસહ્ય નેત્રોદ્ભવેન દહતા દહનેન કામમ્ ।
અલ્પીયસો ઽપિ મહતાં સમતિક્રમસ્ય મન્યે જનાય વિષમઃ કથિતો વિપાકઃ ॥

સ્નેહાદ્ વિધાય દયિતાં વપુષો ઽર્ધભાગે ધુર્યસ્ તથાપિ ભગવઞ્ છમિનાં ત્વમ્ એવ ।
ત્રૈલોક્યવિસ્મયકૃતાં તવ ચેષ્ટિતાનામ્ અદ્યાપિ કશ્ચિદ્ અપિ નાનુકૃતિં કરોતિ ॥

ઉચ્ચૈસ્ તિરઃકૃતમ્ ઇદમ્ ભુવનં સમસ્તં યોગપ્રભાવજનિતેન બલેન યેન ।
તસ્ય પ્રજાપતિસુતસ્ય હૃતઃ પ્રસહ્ય ગર્વસ્ ત્વયેતિ બત કસ્ય ન વિસ્મયો ઽત્ર ॥

અઙ્ગુષ્ઠકેન ભવતા વિનિપીડિતસ્ય યસ્યાસવો ન વિગતાઃ સહસા કથંચિત્ ।
યત્નાત્ સ એવ વિજિતો હરિણા ચિરેણ નીત્યા દશાનન ઇતિ ક્વ નુ વિસ્મયો ઽયમ્ ॥

મન્દાકિની કનકપઙ્કજપારિજાત- પુષ્પાધિવાસિતજલા નભસઃ પતન્તી ।
લગ્ના તુષારકણિકેવ જટાગ્રભાગે કેનાપરેણ ભવતેવ ધૃતાનુગૃહ્ય ॥

આસ્તાં તવાન્યદ્ અપિ તાવદ્ અતુલ્યકક્ષ્યમ્ ઐશ્વર્યમ્ ઈશ્વરપદસ્ય નિમિત્તભૂતમ્ ।
ત્વચ્છેપસો ઽપિ ભગવન્ ન ગતો ઽવસાનં વિષ્ણુઃ પિતામહયુતઃ કિમ્ ઉતાપરસ્ય ॥

શ્વેતસ્ય મૃત્યુદમનાન્તરવર્તિનો ઽપિ સૂનાપશોર્ ઇવ વધાવસરે સ્થિતસ્ય ।
ત્રાણં નિગૃહ્ય ભવતા યદ્ અકારિ તસ્ય તત્ કસ્ય વિસ્મયમ્ અલં ન કરોતિ લોકે ॥

પ્રીતેન યદ્વદ્ ઉપમન્યુર્ અપાસ્તમન્યુઃ ક્ષીરોદસંવિભજનેન કૃતસ્ ત્વયાસૌ ।
તદ્વદ્ વિભો યદિ જગત્ય્ અપરો ઽસિ કશ્ચિન્ નિર્મુચ્ય મત્સરમ્ અમી પ્રવદન્તિ સન્તઃ ॥

વૃત્રદ્વિષઃ સકુલિશસ્ય ભુજસ્ય શક્તિર્ ઉત્તમ્ભિતા વિહસતા ભવતા તથૈવ ।
પૂષ્ણસ્ તથૈવ દશનેષુ ભગસ્ય ચાક્ષ્ણોર્ દક્ષસ્ય ચ ક્રતુફલે મમતા નિરસ્તા ॥

વિષ્ણુપ્રજાપતિપુરન્દરલોકપાલૈસ્ તિર્યક્સુરાસુરનરૈર્ અપરૈશ્ ચ દિવ્યૈઃ ।
લોકે યથા પશુપતે તવ કલ્પિતાનિ સ્થાનાનિ તદ્વદ્ અપરસ્ય વદન્તુ કસ્ય ॥

શક્રાત્મજસ્ય નિજશાર્ઙ્ગરથાઙ્ગપાણૌ કૃષ્ણે સ્થિતે ઽપિ શકલીકૃતદાનવેન્દ્રે ।
દ્રોણાપગેયકૃપકર્ણભયાર્દિતસ્ય શાં શાંકર ત્વમ્ અકૃથ ભૃશમ્ અર્જુનસ્ય ॥

આરાધિતેન ભગવન્ ભવતા હિરણ્ય- વૃષ્ટિં મરુત્તનૃપતેઃ કિરતા યિયક્ષોઃ ।
યે ખ્યાપિતા જગતિ ભક્તજનપ્રસાદાસ્ તન્ નાસ્તુતં તવ વિભો પરમેશ્વરત્વમ્ ॥

તીવ્રવ્રતસ્ય કણધૂમનિપાતતપ્ત- સર્વેન્દ્રિયસ્ય ભવતા ભૃગુનન્દનસ્ય ।
તુષ્ટેન શર્મ યદ્ અકારિ તદા સ શુક્રઃ શીતોષ્ણવાતજલદૈર્ દિવિ ભાસમાનઃ ॥

એતાનિ પાસિ ભુવનાનિ યદા વિગૃહ્ય સેયં વિભૂતિર્ અતુલા તવ તાવદ્ આસ્તામ્ ।
દક્ષપ્રસૂતિમ્ અપિ તે ભ્વનત્રયે ઽસ્મિન્ કશ્ચિન્ ન વેત્તિ ભવતા સહ કો વિવાદઃ ॥

ઉન્માર્ગવર્તિ ગુણદોષવિવેકમન્દમ્ ઉગ્રં મલીમસમ્ અસંયતમ્ અલ્પસારમ્ ।
ભીતાર્થિનાશન દયાપર લોકનાથ દેવ પ્રસીદ મમ ચિત્તમ્ ઇદં પ્રશાધિ ॥

એતાનિ દેવ ચપલાનિ દુરાશયાનિ લુબ્ધાનિ રમ્યવિષયોપનિબન્ધનાનિ ।
દુર્દાન્તવાજિસદૃશાન્ય્ અવિધેયભાવાદ્ વશ્યાનિ મે કુરુ સદૈવ ષડિન્દ્રિયાનિ ॥

નન્દીશ્વરસ્ય મનુજસ્ય સતો ઽતિકાષ્ઠં કાલેન મૃત્યુમ્ અચિરેણ નિનીષિતસ્ય ।
સર્વાત્મના સમતયા યદ્ અકારિ તુષ્ટ્યા નાશ્ચર્યમ્ એતદ્ અભવન્ ન ચ ભાવિ નાસ્તિ ॥

સંસારપાશવશમ્ એતદ્ અનીશમ્ ઈશ મિથ્યા કુતર્કતિમિરોપહતપ્રકાશમ્ ।
ચેતો મમ ક્ષપિતમન્મથ દગ્ધકાલ સત્સેવિતે પથિ નિયોજય દેવદેવ ॥

કાયાનુબન્ધિભિર્ અનેકવિધૈર્ અપાયૈ રાગાદિભિશ્ ચ મનસિ પ્રતિલબ્ધભાવૈઃ ।
મૂઢઃ પૃથક્ પૃથગ્ અહમ્ પ્રવિલુપ્યમાનસ્ ત્વત્તઃ પરં કથય કં શરણં વ્રજામિ ॥

આયાસકેન ખલુ કામપિશાચકેન ક્રોધગ્રહેણ ચ પુનર્ નિરવગ્રહેણ ।
ગ્રસ્તસ્ય વિક્લવધિયઃ પ્રવિમુક્તિહેતોર્ યત્ કૃત્યમ્ અત્ર મમ તત્ર તવૈવ શક્તિઃ ॥