Bhagavadbhaktistotra · શ્લોક 61-65

યા સા જગત્પરિભવસ્ય નિમિત્તભૂતા હેતુઃ સ્વયં સુરપતેર્ અપિ લાઘવસ્ય ।
સા માં વિડમ્બયતિ નાથ સદૈવ તૃષ્ણા ભિન્ધિ પ્રસહ્ય ભગવન્ ન પુનર્ભવાય ॥

યેનાવૃતઃ પશુર્ અયં હૃતબોધશક્તિસ્ તત્ત્વં ન વેત્તિ જગતે હિતમ્ આત્મને વા ।
છિન્ધિ પ્રસહ્ય ભગવન્ મમ તત્ સમસ્તમ્ અજ્ઞાનજં તિમિરમ્ અસ્તુ મહાપ્રકાશઃ ॥

સર્વાપદાં નિલયમ્ અધ્રુવમ્ અસ્વતન્ત્રમ્ આસન્નપાતમ્ અવિવેકમ્ અસારસંજ્ઞમ્ ।
યાવચ્ છરીરકમ્ ઇદમ્ ન વિપદ્યતે મે તાવન્ નિયોજય વિભો કુશલક્રિયાસુ ॥

યત્ ખિદ્યતે કમલયોનિર્ અપિ સ્તુવાનઃ સાક્ષાચ્ ચતુર્ભિર્ અપિ નામ મુખૈર્ ભવન્તમ્ ।
તત્ કે વયં તવ ગુણસ્તવનક્રિયાસુ ભક્તિઃ પ્રમાણમ્ ઇતિ સર્વમ્ ઇદં ક્ષમસ્વ ॥

કૃત્વા મયા તવ નુતિં જગદેકબન્ધો ભક્ત્યા સ્વબુદ્ધિસદૃશીમ્ અવધૂતનામ્ન ।
પુણ્યં યદ્ અલ્પમ્ અપિ કિંચિદ્ ઉપાત્તમ્ અત્ર લોકસ્ય તેન ભગવંસ્ ત્વયિ ભક્તિર્ અસ્તુ ॥