અષ્ટાઙ્ગનિઘણ્ટુ · શ્લોક 381-400

સર્વંસહા વસુમતી વસુધોર્વ્યચલા સ્મૃતા
વિશ્વમ્ભરા રસાનન્તા ગોત્રા કુઃ પૃથિવી ક્ષમા ॥

અવની ભૂતધાત્રી ચ વિપુલા સાગરામ્બરા
સૂરો હંસો રવિર્ ભાનુઃ પતંગો ઽર્કો દિવાકરઃ ॥

પ્રદ્યોતનો દિનમણિઃ ખદ્યોતો દ્યુમણિસ્તથા ॥

બ્રધ્નઃ પ્રભાકરો ભાસ્વાન્ દ્વાદશાત્મા દિવાકરઃ
સવિતા ચ સહસ્રાંશુર્ માર્તણ્ડશ્ ચ વિકર્તનઃ ॥

કર્મસાક્ષી જગચ્ચક્ષુર્ અંશુમાલી ત્રયીતનુઃ
વિભાવસુર્ ગ્રહપતિસ્ ત્વિષાંપતિર્ અહર્પતિઃ ॥

શીતાંશુર્ ઇન્દુશ્ ચન્દ્રમાઃ શશી ચન્દ્રો નિશાકરઃ
વિધુઃ સુધાંશુઃ શુભ્રાંશુર્ ઓષધીશો નિશાપતિઃ ॥

અબ્જો જૈવાતૃકઃ સોમો ગ્લૌર્ મૃગાઙ્કઃ કલાનિધિઃ
દ્વિજરાજઃ શશધરો નક્ષત્રેશઃ ક્ષપાકરઃ ॥

અઙ્ગારકઃ કુજો ભૌમો રૌહિણેયો બુધો દ્વિજઃ
ગુરુર્ બૃહસ્પતિર્ મન્ત્રી ચોશના ભાર્ગવઃ કવિઃ ॥

શનિઃ પઙ્ગુઃ સૂર્યપુત્રઃ સૈંહિકેયો વિધુંતુદઃ
તમસ્તુ રાહુઃ સ્વર્ભાનુઃ કેતુસ્તુ ધ્વજનામકઃ ॥

ઉડુ નક્ષત્રમૃક્ષં ભં દોષા નક્તં નિશા ક્ષપા
ક્ષણદા યામિની રાત્રિસ્ ત્રિયામા ચોરવલ્લભા ॥

દિનાહની વાસરશ્ ચ ઘસ્રો ભાસ્કરવલ્લભઃ
શમ્ભુર્ ઈશઃ પશુપતિઃ શિવઃ શૂલી મહેશ્વરઃ ॥

ઈશ્વરઃ શર્વઃ ઈશાનઃ શંકરશ્ ચન્દ્રશેખરઃ
ભૂતેશઃ ખણ્ડપરશુર્ ગિરીશો ગિરિશો મૃડઃ ॥

મૃત્યુંજયઃ કૃત્તિવાસાઃ પિનાકી પ્રમથાધિપઃ
ઉગ્રઃ કપર્દી શ્રીકણ્ઠઃ શિતિકણ્ઠઃ કપાલભૃત્ ॥

વામદેવો મહાદેવો વિરૂપાક્ષસ્ત્રિલોચનઃ
કૃશાનુરેતાઃ સર્વજ્ઞો ધૂર્જટિર્ નીલલોહિતઃ ॥

હરઃ સ્મરહરો ભર્ગસ્ ત્ર્યમ્બકસ્ત્રિપુરાન્તકઃ
ગઙ્ગાધરો ઽન્ધકરિપુઃ ક્રતુધ્વંસી વૃષધ્વજઃ ॥

વ્યોમકેશો ભવો ભીમઃ સ્થાણૂ રુદ્ર ઉમાપતિઃ
ઉમા કાત્યાયની ગૌરી કાલી હૈમવતીશ્વરી ॥

શિવાપર્ણા ભવાની ચ પાર્વતી ચણ્ડિકામ્બિકા
અજો હરિર્ વાસુદેવો દૈત્યારિઃ પુરુષોત્તમઃ ॥

વિષ્ણુર્ નારાયણઃ કૃષ્ણો વૈકુણ્ઠો વિષ્ટરશ્રવાઃ
દામોદરો હૃષીકેશઃ કેશવો માધવઃ સ્વભૂઃ ॥

પીતામ્બરો ઽચ્યુતઃ શાર્ઙ્ગી વિષ્વક્સેનો જનાર્દનઃ
ઉપેન્દ્ર ઇન્દ્રાવરજશ્ ચક્રપાણિશ્ ચતુર્ભુજઃ ॥

લક્ષ્મી પદ્માલયા પદ્મા કમલા શ્રીર્ હરિપ્રિયા
ઇન્દિરા લોકમાતા મા ક્ષીરાબ્ધિતનયા રમા ॥