અષ્ટાઙ્ગનિઘણ્ટુ · શ્લોક 101-120

કાસીસં પાંશુધાવાખ્યં દ્વિતીયં પુષ્પસંજ્ઞકમ્
સૈન્ધવં માણિમન્થં ચ નાદેયં લવણોત્તમમ્ ॥

શિલાજં ધાતુજં જ્ઞેયં મન્દરોત્થં શિલાજતુ
પાર્વતં શૈલનિર્યાસઃ ગિરિજં ચ શિલાહ્વયમ્ ॥

વેલ્લન્તરારણિકબૂકવૃષાશ્મભેદ ગોકણ્ટકોત્કટસહાચરબાણકાશાઃ
વૃક્ષાદનીનલકુશાદ્વયગુણ્ઠગુન્દ્રા ભલ્લૂકમોરટકુરણ્ટકરમ્ભપાર્થાઃ ॥

વર્ગો વીરતરાદ્યો ઽયં હન્તિ વાતકૃતાન્ ગદાન્
અશ્મરીશર્કરામૂત્ર કૃચ્છ્રાઘાતરુજાહરઃ ॥

વેલ્લન્તરો વીરતરુર્ ગણે વીરતરાદિકે
વસુકઃ સ્થૂલપુષ્પશ્ ચ બુકશ્ ચેશ્વરમલ્લિકા ॥

સિંહાસ્યઃ કર્કટશ્ ચૈવ વૃષકશ્ ચાટરૂષકઃ
વેણુપત્રી વૃષા પાર્વી પર્વણી વંશપત્રિકા ॥

અશ્મભેદી શિલાભેદી જ્ઞેયા પાષાણભેદિકા
ઉત્કટા સૂક્ષ્મપત્રા ચ દીર્ઘલોહિતયષ્ટિકા ॥

શરેક્ષુકુસુમૌ બાણઃ સ કાણ્ડેક્ષુનિભાઙ્ઘ્રિકઃ
શ્વેતચામરકઃ કાશો ગુન્દ્રા સ્યાદ્ ગુચ્છપુષ્પિકા ॥

વૃક્ષાદની તુ શિખરો વન્દાકઃ કામવૃક્ષકઃ
મૃદુપુષ્પો ઽથ સુષિરો નદીસ્થો નલકો નલઃ ॥

ગુણ્ઠો વૃત્તતૃણઃ શુણ્ઠઃ શૃઙ્ગવેરાભમૂલકઃ
ભલ્લૂકો ભૂતવૃક્ષશ્ ચ શ્યોનાકશ્ ચૈવ ટુણ્ટુકઃ ॥

શ્રીહસ્તિની કુરટકા પિચુકઃ શિતિવારકઃ
કૃષ્ણસૂક્ષ્મફલા યુક્ત પુષ્પા મસ્તકમઞ્જરી ॥

કરમ્ભઃ કર્કશો યુગ્મ ફલા ચોત્તમકન્યકા
કપોતવઙ્કા વરદા રવિભક્તા સુવર્ચલા ॥

રોધ્રશાબરકરોધ્રપલાશાઃ જિઙ્ગિણીસરલકટ્ફલયુક્તાઃ
કુત્સિતામ્બકદલીગતશોકાઃ સૈલવાલુપરિપેલવમોચાઃ ॥

એષ રોધ્રાદિકો નામ મેદઃકફહરો ગણઃ
યોનિદોષહરઃ સ્તમ્ભી વર્ણ્યો વિષવિનાશનઃ ॥

લોધ્રાદૌ તિલ્વકો લોધ્રસ્ તિરીટઃ પટ્ટિકાહ્વયઃ
દ્વિતીયઃ શાબરઃ શ્વેતો ઘનત્વક્ ચાક્ષિભેષજઃ ॥

જિઙ્ગિણી ઝિઙ્ગિણી જ્ઞેયા મોચકી ગુડમઞ્જરી
પૂતિકાષ્ઠં દેવવૃક્ષઃ સરલો દેવદારુકઃ ॥

સુરકાષ્ઠં ભદ્રદારુઃ દેવપર્યાયવાચકઃ
સુગન્ધા સુવહા રાસ્ના યુક્તાહ્વા ગન્ધનાકુલી ॥

સુરભિશ્ ચ કદમ્બશ્ ચ કુઞ્ચિતાઙ્ગો હરિપ્રિયઃ
રમ્ભા તુ કદલી મોચા વૃત્તપુષ્પાંશુમત્ફલા ॥

અશોકો વિગતશોકઃ સુભગસ્ તામ્રપલ્લવઃ
એલવાલુકમ્ ઐલેયં બાલેયં હરિવાલુકમ્ ॥

કુટન્નટં પ્લવંગં ચ વિતુન્નં પરિપેલવમ્
સુરભિઃ સલ્લકી મોચા મહારમ્ભા ગજપ્રિયા ॥