અષ્ટાવક્ર ગીતા · અધ્યાય 12

કાયકૃત્યાસહઃ પૂર્વં તતો વાગ્વિસ્તરાસહઃ
અથ ચિન્તાસહસ્ તસ્માદ્ એવમ્ એવાહમ્ આસ્થિતઃ ॥

પ્રીત્યભાવેન શબ્દાદેર્ અદૃશ્યત્વેન ચાત્મનઃ
વિક્ષેપૈકાગ્રહૃદય એવમ્ એવાહં આસ્થિતઃ ॥

સમાધ્યાસાદિવિક્ષિપ્તૌ વ્યવહારઃ સમાધયે
એવં વિલોક્ય નિયમમ્ એવમ્ એવાહમ્ આસ્થિતઃ ॥

હેયોપાદેયવિરહાદ્ એવં હર્ષવિષાદયોઃ
અભાવાદ્ અદ્ય હે બ્રહ્મન્ન્ એવમ્ એવાહમ્ આસ્થિતઃ ॥

આશ્રમાનાશ્રમં ધ્યાનં ચિત્તસ્વીકૃતવર્જનમ્
વિકલ્પં મમ વીક્ષ્યૈતૈર્ એવમ્ એવાહમ્ આસ્થિતઃ ॥

કર્માનુષ્ઠાનમ્ અજ્ઞાનાદ્ યથૈવોપરમસ્ તથા
બુદ્ધ્વા સંયગ્ ઇદં તત્ત્વમ્ એવમ્ એવાહમ્ આસ્થિતઃ ॥

અચિન્ત્યં ચિન્ત્યમાનો ઽપિ ચિન્તારૂપં ભજત્ય્ અસૌ
ત્યક્ત્વા તદ્ભાવનં તસ્માદ્ એવમ્ એવાહમ્ આસ્થિતઃ ॥

એવમ્ એવ કૃતં યેન સ કૃતાર્થો ભવેદ્ અસૌ
એવમ્ એવ સ્વભાવો યઃ સ કૃતાર્થો ભવેદ્ અસૌ ॥