અષ્ટાવક્ર ગીતા · અધ્યાય 11

ભાવાભાવવિકારશ્ ચ સ્વભાવાદ્ ઇતિ નિશ્ચયી
નિર્વિકારો ગતક્લેશઃ સુખેનૈવોપશામ્યતિ ॥

ઈશ્વરઃ સર્વનિર્માતા નેહાન્ય ઇતિ નિશ્ચયી
અન્તર્ગલિતસર્વાશઃ શાન્તઃ ક્વાપિ ન સજ્જતે ॥

આપદઃ સમ્પદઃ કાલે દૈવાદ્ એવેતિ નિશ્ચયી
તૃપ્તઃ સ્વસ્થેન્દ્રિયો નિત્યં ન વાઞ્છતિ ન શોચતિ ॥

સુખદુઃખે જન્મમૃત્યૂ દૈવાદ્ એવેતિ નિશ્ચયી
સાધ્યાદર્શી નિરાયાસઃ કુર્વન્ન્ અપિ ન લિપ્યતે ॥

ચિન્તયા જાયતે દુઃખં નાન્યથેહેતિ નિશ્ચયી
તયા હીનઃ સુખી શાન્તઃ સર્વત્ર ગલિતસ્પૃહઃ ॥

નાહં દેહો ન મે દેહો બોધો ઽહમ્ ઇતિ નિશ્ચયી
કૈવલ્યમ્ ઇવ સંપ્રાપ્તો ન સ્મરત્ય્ અકૃતં કૃતમ્ ॥

આબ્રહ્મસ્તમ્બપર્યન્તમ્ અહમ્ એવેતિ નિશ્ચયી
નિર્વિકલ્પઃ શુચિઃ શાન્તઃ પ્રાપ્તાપ્રાપ્તવિનિર્વૃતઃ ॥

નાનાશ્ચર્યમ્ ઇદં વિશ્વં ન કિંચિદ્ ઇતિ નિશ્ચયી
નિર્વાસનઃ સ્ફૂર્તિમાત્રો ન કિંચિદ્ ઇવ શામ્યતિ ॥