અષ્ટાવક્ર ગીતા · અધ્યાય 10

વિહાય વૈરિણં કામમ્ અર્થં ચાનર્થસઙ્કુલમ્
ધર્મમ્ અપ્ય્ એતયોર્ હેતું સર્વત્રાનાદરં કુરુ ॥

સ્વપ્નેન્દ્રજાલવત્ પશ્ય દિનાનિ ત્રીણિ પઞ્ચ વા
મિત્રક્ષેત્રધનાગાર દારદાયાદિસમ્પદઃ ॥

યત્ર યત્ર ભવેત્ તૃષ્ણા, સંસારં વિદ્ધિ તત્ર વૈ
પ્રૌઢવૈરાગ્યમ્ આશ્રિત્ય વીતતૃષ્ણઃ સુખી ભવ ॥

તૃષ્ણામાત્રાત્મકો બન્ધસ્, તન્નાશો મોક્ષ ઉચ્યતે
ભવાસંસક્તિમાત્રેણ પ્રાપ્તિતુષ્ટિર્ મુહુર્મુહુઃ ॥

ત્વમ્ એકશ્ ચેતનઃ શુદ્ધો જડં વિશ્વમ્ અસત્ તથા
અવિદ્યાપિ ન કિંચિત્ સા કા બુભુત્સા તથાપિ તે ॥

રાજ્યં સુતાઃ કલત્રાણિ શરીરાણિ સુખાનિ ચ
સંસક્તસ્યાપિ નષ્ટાનિ તવ જન્મનિ જન્મનિ ॥

અલમ્ અર્થેન કામેન સુકૃતેનાપિ કર્મણા
એભ્યઃ સંસારકાન્તારે ન વિશ્રાન્તમ્ અભૂન્ મનઃ ॥

કૃતં ન કતિ જન્માનિ કાયેન મનસા ગિરા
દુઃખમ્ આયાસદં કર્મ તદ્ અદ્યાપ્ય્ ઉપરમ્યતામ્ ॥