આર્યાસપ્તશતી · શ્લોક 429-448

મમ રાગિણો મનસ્વિનિ કરમ્ અર્પયતો દદાસિ પૃષ્ઠમ્ અપિ ।
યદિ તદ્ અપિ કમલ-બન્ધોર્ ઇવ મન્યે સ્વસ્ય સૌભાગ્યમ્

મા સ્પૃશ મામ્ ઇતિ સકુપિતમ્ ઇવ ભણિતં વ્યઞ્જિતા ન ચ વ્રીડા ।
આલિઙ્ગિતયા સસ્મિતમુક્તમ્ અનાચાર કિં કુરુષે

મૂલાનિ ચ નિચુલાનાં હૃદયાનિ ચ કૂલ-વસતિ-કુલટાનામ્ ।
મુદિર-મદિરા-પ્રમત્તા ગોદાવરિ કિં વિદારયસિ

મલય-દ્રુમ-સારાણામ્ ઇવ ધીરાણાં ગુણ-પ્રકર્ષો ઽપિ ।
જડ-સમય-નિપતિતાનામ્ અનાદરાયૈવ ન ગુણાય

મધુમથન-મૌલિ-માલે સખિ તુલયસિ તુલસિ કિં મુધા રાધામ્ ।
યત્ તવ પદમ્ અદસીયં સુરભયિતું સૌરભોદ્ભેદઃ

મયિ યાસ્યતિ કૃત્વાવધિ-દિન-સઙ્ખ્યં ચુમ્બનં તથાશ્લેષમ્ ।
પ્રિયયાનુશોચિતા સા તાવત્ સુરતાક્ષમા રજની

મૃગમદ-નિદાનમ્ અટવી કુઙ્કુમમ્ અપિ કૃષક-વાટિકા વહતિ ।
હટ્ટવિલાસિનિ ભવતી પરમ્ એકા પૌર-સર્વસ્વમ્

મધુ-દિવસેષુ ભ્રામ્યન્ યથા વિશતિ માનસં ભ્રમરઃ ।
સખિ લોહ-કણ્ટક-નિભસ્ તથા મદન-વિશિખો ઽપિ

મયિ ચલિતે તવ મુક્તા દૃશઃ સ્વભાવાત્ પ્રિયે સ-પાનીયાઃ ।
સત્યમ્ અમૂલ્યાઃ સદ્યઃ પ્રયાન્તિ મમ હૃદય-હારત્વમ્

મુગ્ધે મમ મનસિ શરાઃ સ્મરસ્ય પઞ્ચાપિ સન્તતં લગ્નાઃ ।
શઙ્કે સ્તન-ગુટિકા-દ્વયમ્ અર્પિતમ્ એતેન તવ હૃદયે

મધુમથન-વદન-વિનિહિત-વંશી-સુષિરાનુસારિણો રાગાઃ ।
હન્ત હરન્તિ મનો મમ નલિકા-વિશિખાઃ સ્મરસ્યેવ

મહતોઃ સુવૃત્તયોઃ સખિ હૃદય-ગ્રહ-યોગ્યયોઃ સમુચ્છ્રિતયોઃ ।
સજ્જનયોઃ સ્તનયોર્ ઇવ નિરન્તરં સઙ્ગતં ભવતિ

મમ વારિતસ્ય બહુભિર્ ભૂયો ભૂયઃ સ્વયં ચ ભાવયતઃ ।
જાતો દિશીવ તસ્યાં સખે ન વિનિવર્તતે મોહઃ

મગ્નો ઽસિ નર્મદાયા રસે હૃતો વીચિ-લોચન-ક્ષેપૈઃ ।
યદ્ય્ ઉચ્યસે તરુવર ભ્રષ્ટો ભ્રંશો ઽપિ તે શ્લાઘ્યઃ

મેનામ્ ઉલ્લાસયતિ સ્મેરયતિ હરિં ગિરિં ચ વિમુખયતિ ।
કૃત-કર-બન્ધ-વિલમ્બઃ પરિણયને ગિરિશ-કર-કમ્પઃ

મધુ-ગન્ધિ ઘર્મ-તિમ્યત્-તિલકં સ્ખલદ્-ઉક્તિં ઘૂર્ણ-દરુણાક્ષમ્ ।
તસ્યાઃ કદાધરામૃતમ્ આનનમ્ અવધૂય પાસ્યામિ

મેદિન્યાં તવ નિપતતિ ન પદં બહુ-વલ્લભેતિ ગર્વેણ ।
આશ્લિષ્ય કૈર્ ન તરુણૈસ્ તુરીવ વસનૈર્ વિમુક્તાસિ

મૂલે નિસર્ગ-મધુરં સમર્પયન્તો રસં પુરો વિરસાઃ ।
ઇક્ષવ ઇવ પર-પુરુષા વિવિધેષુ રસેષુ વિનિધેયાઃ

મહતિ સ્નેહે નિહિતઃ કુસુમં બહુ દત્તમ્ અર્ચિતો બહુશઃ ।
વક્રસ્ તદ્ અપિ શનૈશ્ચર ઇવ સખિ દુષ્ટ-ગ્રહો દયિતઃ

મા શબર-તરુણિ પીવર-વક્ષોરુહયોર્ ભરેણ ભજ ગર્વમ્ ।
નિર્મોકૈર્ અપિ શોભા યયોર્ ભુજઙ્ગીભિર્ ઉન્મુક્તૈઃ