આર્યાસપ્તશતી · શ્લોક 269-288

તે શ્રેષ્ઠિનઃ ક્વ સમ્પ્રતિ શક્ર-ધ્વજ યૈઃ કૃતસ્ તવોચ્છ્રાયઃ ।
ઈષાં વા મેઢિં વાધુનાતનાસ્ ત્વાં વિધિત્સન્તિ

તાનવમ્ એત્ય છિન્નઃ પરોપહિત-રાગ-મદન-સઙ્ઘટિતઃ ।
કર્ણ ઇવ કામિનીનાં ન શોભતે નિર્ભરઃ પ્રેમા

તસ્મિન્ ગતાર્દ્ર-ભાવે વીત-રસે શુણ્ઠિ-શકલ ઇવ પુરુષે ।
અપિ ભૂતિ-ભાજિ મલિને નાગર-શબ્દો વિડમ્બાય

તમસિ ઘને વિષમે પથિ જમ્બુકમ્ ઉલ્કા-મુખં પ્રપન્નાઃ સ્મઃ ।
કિં કુર્મઃ સો ઽપિ સખે સ્થિતો મુખં મુદ્રયિત્વૈવ

ત્વામ્ અભિલષતો માનિનિ મમ ગરિમ-ગુણો ઽપિ દોષતાં યાતઃ ।
પઙ્કિલ-કૂલાં તટિનીં યિયાસતઃ સિન્ધુર્ અસ્ય્ એવ

તિમિરેઽપિ દૂર-દૃશ્યા કઠિનાશ્લેષે ચ રહસિ મુખરા ચ ।
શઙ્ખ-મય-વલય-રાજી ગૃહ-પતિ-શિરસા સહ સ્ફુટતુ

તવ વૃત્તેન ગુણેન ચ સમુચિત-સમ્પન્ન-કણ્ઠ-લુઠનાયાઃ ।
હાર-સ્રજ ઇવ સુન્દરિ કૃતઃ પુનર્ નાયકસ્ તરલઃ

ઇતિ વિભાવ્યાખ્યા-સમેતા ત-કાર-વ્રજ્યા ॥
દ-કાર-વ્રજ્યા
દર્શન-વિનીત-માના ગૃહિણી હર્ષોલ્લસત્-કપોલ-તલમ્ ।
ચુમ્બન-નિષેધ-મિષતો વદનં પિદધાતિ પાણિભ્યામ્

દેહ-સ્તમ્ભઃ સ્ખલનં શૈથિલ્યં વેપથુઃ પ્રિય-ધ્યાનમ્ ।
પથિ પથિ ગગનાશ્લેષઃ કામિનિ કસ્ તેઽભિસાર-ગુણઃ

દ્રાઘયતા દિવસાનિ ત્વદીય-વિરહેણ તીવ્ર-તાપેન ।
ગ્રીષ્મેણેવ નલિન્યા જીવનમ્ અલ્પીકૃતં તસ્યાઃ

દુર્જન-સહવાસાદ્ અપિ શીલોત્કર્ષં ન સજ્જનસ્ ત્યજતિ ।
પ્રતિપર્વ-તપન-વાસી નિઃસૃત-માત્રઃ શશી શીતઃ

દયિત-પ્રહિતાં દૂતીમ્ આલમ્બ્ય કરેણ તમસિ ગચ્છન્તી ।
સ્વેદ-ચ્યુત-મૃગનાભિર્ દૂરાદ્ ગૌરાઙ્ગિ દૃશ્યાસિ

દયિતા-ગુણઃ પ્રકાશં નીતઃ સ્વસ્યૈવ વદન-દોષેણ ।
પ્રતિદિન-વિદલિત-વાટી-વૃતિ-ગહ્ટનૈઃ ખિદ્યસે કિમ્ ઇતિ

દાક્ષિણ્યાન્ મ્રદિમાનં દધતં મા ભાનુમ્ એનમ્ અવમંસ્થાઃ ।
રૌદ્રીમ્ ઉપાગતેઽસ્મિન્ કઃ ક્ષમતે દૃષ્ટિમ્ અપિ દાતુમ્

દૃષ્ટ્યૈવ વિરહ-કાતર-તારકયા પ્રિય-મુખે સમર્પિતયા ।
યાન્તિ મૃગ-વલ્લભાયાઃ પુલિન્દ-બાણાર્દિતાઃ પ્રાણાઃ

દૂર-સ્થાપિત-હૃદયો ગૂઢ-રહસ્યો નિકામમ્ આશઙ્કઃ ।
આશ્લેષો બાલાનાં ભવતિ ખલાનાં ચ સમ્ભેદઃ

દ્વારે ગુરવઃ કોણે શુકઃ સકાશે શિશુર્ ગૃહે સખ્યઃ ।
કાલાસહ ક્ષમસ્વ પ્રિય પ્રસીદ પ્રયાત-મહઃ

દધિ-કણ-મુક્તા-ભરણ-શ્વાસોત્તુઙ્ગ-સ્તનાર્પણ-મનોજ્ઞમ્ ।
પ્રિયમ્ આલિઙ્ગતિ ગોપી મન્થન-શ્રમ-મન્થરૈર્ અઙ્ગૈઃ

દલિતોદ્વેગેન સખિ પ્રિયેણ લગ્નેન રાગમ્ આવહતા ।
મોહયતા શયનીયં તામ્બૂલેનેવ નીતાસ્મિ

દૃષ્ટમ્ અદૃષ્ટ-પ્રાયં દયિતં કૃત્વા પ્રકાશિતસ્ તનયા ।
હૃદયં કરેણ તાડિતમ્ અથ મિથ્યા વ્યઞ્જિત-ત્રપયા