આર્યાસપ્તશતી · શ્લોક 249-268

તવ સુતનુ સાનુમત્યા બહુ-ધાતુ-જનિત-નિતમ્બ-રાગાયાઃ ।
ગિરિ-વર-ભુવ ઇવ લાભેનાપ્નોમિ દ્વ્ય્-અઙ્ગુલેન દિવમ્

ત્યક્તો મુઞ્ચતિ જીવનમ્ ઉજ્ઝતિ નાનુગ્રહેઽપિ લોલુત્વમ્ ।
કિં પ્રાવૃષેવ પદ્માકરસ્ય કરણીયમ્ અસ્ય મયા

ત્વદ્-વિરહાપદિ પાણ્ડુસ્ તન્વઙ્ગી છાયયૈવ કેવલયા ।
હંસીવ જ્યોત્સ્નાયાં સા સુભગ પ્રત્યભિજ્ઞેયા

ત્વયિ વિનિવેશિત-ચિત્તા સુભગ ગતા કેવલેન કાયેન ।
ઘન-જાલ-રુદ્ધ-મીના નદીવ સા નીર-માત્રેણ

ત્વયિ સંસક્તં તસ્યાઃ કઠોરતર હૃદયમ્ અસમ-શર-તરલમ્ ।
મારુત-ચલમ્ અઞ્ચલમ્ ઇવ કણ્ટક-સમ્પર્કતઃ સ્ફુટિતમ્

ત્વમ્ અસૂર્યંપશ્યા સખિ પદમ્ અપિ ન વિનાપવારણં ભ્રમસિ ।
છાયે કિમ્ ઇહ વિધેયં મુઞ્ચન્તિ ન મૂર્તિમન્તસ્ ત્વામ્

તવ વિરહે વિસ્તારિત-રજનૌ જનિતેન્દુ-ચન્દન-દ્વેષે ।
વિસિનીવ માઘ-માસે વિના હુતાશને સા દગ્ધા

તરુણિ ત્વચ્-ચરણાહતિ-કુસુમિત-કઙ્કેલ્લિ-કોરક-પ્રકરમ્ ।
કુટિલ-ચરિતા સપત્ની ન પિબતિ બત શોક-વિકલાપિ

તલ્પે પ્રભુર્ ઇવ ગુરુર્ ઇવ મનસિજ-તન્ત્રે શ્રમે ભુજિષ્યેવ ।
ગેહે શ્રીર્ ઇવ ગુરુ-જન-પુરતો મૂર્તેવ સા વ્રીડા

ત્વમ્ અલભ્યા મમ તાવન્ મોક્તુમ્ અશક્તસ્ય સંમુખં વ્રજતઃ ।
છાયેવાપસરન્તી ભિત્ત્યા ન નિવાર્યસે યાવત્

તપસા ક્લેશિત એષ પ્રૌઢ-બલો ન ખલુ ફાલ્ગુનેઽપ્ય્ આસીત્ ।
મધુના પ્રમત્તમ્ અધુના કો મદનં મિહિરમ્ ઇવ સહતે

ત્વદ્-ગમન-દિવસ-ગણ-નાવલક્ષ-રેખાભિર્ અઙ્કિતા સુભગ ।
ગણ્ડ-સ્થલીવ તસ્યાઃ પાણ્ડુરિતા ભવન-ભિત્તિર્ અપિ

તસ્યાગ્રામ્યસ્યાહં સખિ વક્ર-સ્નિગ્ધ-મધુરયા દૃષ્ટ્યા ।
વિદ્ધા તદ્-એક-નેયા પોત્રિણ ઇવ દંષ્ટ્રયા ધરણી

ત્વયિ કુગ્રામ-વટ-દ્રુમ વૈશ્રવણો વસતુ વા લક્ષ્મીઃ ।
પામર-કુઠાર-પાતાત્ કાસર-શિરસૈવ તે રક્ષા

તવ મુખર વદન-દોષં સહમાના મોક્તુમ્ અક્ષમા સુતનુઃ ।
સા વહતિ વિટ ભવન્તં ઘુણમન્તઃ શાલભઞ્જીવ

તૃણ-મુખમ્ ઇવ ન ખલુ ત્વાં ત્યજન્ત્ય્ અમી હરિણ વૈરિણઃ શવરાઃ ।
યશસૈવ જીવિતમ્ ઇદં ત્યજ યોજિત-શૃઙ્ગ-સઙ્ગ્રામઃ

ત્રિપુર-રિપોર્ ઇવ ગઙ્ગા મમ માનિનિ જનિત-મદન-દાહસ્ય ।
જીવનમ્ અર્પિત-શિરસો દદાસિ ચિકુર-ગ્રહેણૈવ

ત્વત્-સઙ્કથાસુ મુખરઃ સનિન્દ-સાનન્દ-સાવહિત્થ ઇવ ।
સ ખલુ સખીનાં નિભૃતં ત્વયા કૃતાર્થીકૃતઃ સુભગઃ

ત્વયિ સર્પતિ પથિ દૃષ્ટિઃ સુન્દર વૃતિ-વિવર-નિર્ગતા તસ્યાઃ ।
દર-તરલ-ભિન્ન-શૈવલ-જાલા શફરીવ વિસ્ફુરતિ

તે સુતનુ શૂન્ય-હૃદયા યે શઙ્ખં શૂન્ય-હૃદયમ્ અભિદધતિ ।
અઙ્ગીકૃત-કર-પત્ત્રો યસ્ તવ હસ્ત-ગ્રહં કુરુતે