આઙ્ગિરસસ્મૃતિ · અધ્યાય 2.9

અન્તર્દશાહે ભુક્ત્વાન્નં સૂતકે મૃતકે ઽપિ વા ।
દશરાત્રં પિવેદ્વજ્રં બ્રાહ્મણો બ્રાહ્મણસ્ય તુ ॥

ક્ષત્રિયસ્યાર્ધમાપ્તં તુ વિશઃ પઞ્ચાધિકં તથા ।
શૂદ્રસ્યૈવ તુ ભુક્ત્વાન્નં ત્રિભિર્માસૈર્વ્યપોહતિ ॥

આહિતાગ્નિસ્ત્રિરાત્રેણ બ્રહ્મક્ષત્રવિશામપિ ।
પઞ્ચરાત્રં ચરેદ્ભુક્ત્વા શ્રોત્રિયસ્યાગ્નિહોત્રિણઃ ॥

અત ઊર્ધ્વં તુ સ્નાતાનાં માસાશૌચં ન વિદ્યતે ।
દીક્ષિતાનાં ચ સર્વેષાં રાજ્ઞાં સર્વનિધેસ્તથા ॥

સસત્રે દાનધર્મે ચ પક્વમન્નં તુ ગર્હિતમ્ ।
પઞ્ચરાત્રં ચરેદ્વજ્રં ષડહં મધ્યમાચરેત્ ॥

તથા ચાન્યેષ્વભોજ્યેષુ વ્યહમેવં સમાચરેત્ ।
અનાપત્સુ ચરેદ્ભૈક્ષ્યં સિદ્ધં વસ્તુ ગૃહે વસન્ ॥

દશરાત્રં ચરેદ્વજ્રમ્ આપત્સુ ચ ત્ર્યહં ચરેત્ ।
પતિતાનાં ચ સર્વેષાં ભુક્ત્વા ચાન્દ્રાયણં ચરેત્ ॥

પ્રતિમાસદિનં હૃષ્ટમ્ અન્યથા પતિતો ભવેત્ ।
પ્રતિસંવત્સરં વાપિ શ્રોત્રિયસ્ય ભવેદિદમ્ ॥

બ્રહ્મેચારી યતિશ્ચાપિ વિદ્યાર્થી ગુરુપોષકઃ ।
અધ્વગઃ ક્ષીણવૃત્તિશ્ચ ષડેતે ભિક્ષુકાઃ સ્મૃતાઃ ॥

વ્યાધિતસ્ય દરિદ્રસ્ય કુટુમ્બાત્પ્રચ્યુતસ્ય ચ ।
અધ્વાનં વા પ્રયાતસ્ય ભૈક્ષ્યચર્યા વિધીયતે ॥

બ્રહ્મચારી શુના દષ્ટસ્ ત્ર્યહમેવં સમાચરેત્ ।
ગૃહસ્થસ્તુ દ્વિરાત્રં વાપ્ય્ એકાહં વાગ્નિહોત્રવાન્ ॥

નાભેરૂર્ધ્વં તુ દષ્ટસ્ય તદેવ દ્વિગુણં ભવેત્ ।
તદેવ દ્વિગુણં વક્ત્રે મૂર્ધ્નિ ચેવ ચતુર્ગુણમ્ ॥

અત ઊર્ધ્વં તુ યત્સ્નાતઃ સ્નાનેનૈવ વિશુધ્યતિ ।
સર્વેષ્વેવાવકાશેષુ તદા પ્રવ્રજિતઃ સ્વયમ્ ॥

અવ્રતી સવ્રતી વાપિ શુના દષ્ટસ્તથા દ્વિજઃ ।
દૃષ્ટાગ્નિં હૂયમાનં તુ સદ્ય એવ શુચિર્ભવેત્ ॥

બ્રાહ્મણી તુ શુના દષ્ટા સોમે દૃષ્ટિં નિપાતયેત્ ।
યદા ન દૃશ્યતે સોમઃ પ્રાયશ્ચિત્તં કથં ભવેત્ ॥

યાં દિશં તુ ગતઃ સોમસ્ તાં દિશં તુ વિલોકયેત્ ।
સોમમાર્ગેણ સા પૂતા પઞ્ચગવ્યેન શુધ્યતિ ॥