આઙ્ગિરસસ્મૃતિ · અધ્યાય 2.7

આર્તાનાં માર્ગમાણાનાં પ્રાયશ્ચિતાનિ યે દ્વિજાઃ ।
જાનન્તો ન પ્રયચ્છન્તિ તે ચ યાન્તિ સમં તુ તૈઃ ॥

તસ્માદાર્તં સમાસાદ્ય બ્રાહ્મણં તુ વિશેષતઃ ।
જાનદ્ભિઃ પર્ષદઃ પન્થા ન હાતવ્યઃ પરાઙ્મુખૈઃ ॥

તસ્ય કાર્યે વ્રતાદેશઃ પ્રમાણાર્થં હિ દાતૃભિઃ ।
અજ્ઞાનાદુપદેષ્ટવ્યઃ ક્રમશઃ સર્વ એવ વા ॥

ભયાદભ્યુત્તરેત્કશ્ચિદ્ ભયાર્તં બ્રાહ્મણં ક્વચિત્ ।
એવં પાપાત્સમુદ્ધૃત્ય તેન તુલ્યફલો ભવેત્ ॥

અનર્થિતૈરનાહુતૈર્ અપૃષ્ટૈશ્ચ યથાવિધિ ।
પ્રાયશ્ચિત્તં ન દાતવ્યં જાનદ્ભિરપિ ચ દ્વિજૈઃ ॥

તસ્માજ્જનૈઃ પ્રદાતવ્યમ્ અનુજ્ઞાપ્ય ચ પર્ષદમ્ ।
ન ચાન્યેષુ પ્રજલ્પત્સુ ચૈવં ધર્મો ન હીયતે ॥

પાતકેષુ શતં પર્ષત્ સહસ્રં મહદાદિષુ ।
ઉપપાપેષુ પઞ્ચાશત્ સ્વલ્પં સ્વલ્પેષુ નિશ્ચયઃ ॥

બ્રહ્મહા સ્વર્ણહારી ચ સુરાપો ગુરુતલ્પગઃ ।
એતૈઃ સંયુજ્યતે યો ઽન્યઃ પતિતૈઃ સહ પઞ્ચમઃ ॥

નારીપુરુષહન્તા ચ કન્યાદૂષી ગવાં ચ હા ।
ચત્વારઃ પતિતા પ્રોક્તા યથા વૈ બ્રહ્મહાદયઃ ।
ઉપપાતકાસ્ત્વસંખ્યાતાસ્ તે ચ ગોઘ્નાદયસ્તથા ॥