આઙ્ગિરસસ્મૃતિ · અધ્યાય 2.4

પ્રાયો નામ તપઃ પ્રોક્તં ચિત્તં નિશ્ચય ઉચ્યતે ।
તપોનિશ્ચયસંયોગાત્ પ્રાયશ્ચિત્તમિતિ સ્મૃતમ્ ॥

પ્રાયશ્ચિત્તસમં ચિત્તં ચારયિત્વા પ્રદીયતે ।
પર્ષદા ક્રિયતે યત્તત્ પ્રાયશ્ચિત્તમિતિ સ્મૃતમ્ ॥

ચત્વારો વા ત્રયો વાપિ વેદવેદાગ્નિહોત્રિણઃ ।
યે તુ સમ્યક્સ્થિતા વિપ્રાઃ કાર્યાકાર્યવિનિશ્ચિતાઃ ॥

પ્રાયશ્ચિત્તપ્રણેતારઃ સપ્તૈતે પરિકીર્તિતાઃ ।
એકવિંશતિભિશ્ચાન્યૈઃ પાર્ષદત્વં સમાગતૈઃ ॥

સાવિત્રીમાત્રસારૈસ્તુ ચીર્ણવેદવ્રતૈર્દ્વિજૈઃ ।
યતીનામાત્મવિદ્યાનાં ધ્યાયિનામાત્મવેદિનામ્ ।
શિરોવ્રતૈશ્ચ સ્નાતાનામ્ એકો ઽપિ પરિષદ્ભવેત્ ॥

એવં પૂર્વં મયાપ્યુક્તં તેષાં યે યે પરે પરે ।
સ્વવૃત્યા પરિતુષ્ટાનાં પરિષત્ત્વમુદાહૃતમ્ ॥

એષાં લઘુષુ કાર્યેષુ મધ્યમેષુ ચ મધ્યમા ।
મહાપાતકચિન્તાસુ શતશો ભૂય એવ વા ॥

અત ઊર્ધ્વં તુ યે વિપ્રાઃ કેવલં નામધારકાઃ ।
પરિષત્ત્વં ન તેષ્વસ્તિ સહસ્રગુણિતેષ્વપિ ॥

જન્મશારીરવિદ્યાભિર્ આચારેણ શ્રુતેન ચ ।
ધર્મેણ ચ યથોક્તેન બ્રાહ્મણત્વં વિધીયતે ॥

ચિત્રકર્મ યથાનેકૈર્ અઙ્ગૈરુન્મીલ્યતે શનૈઃ ।
બ્રાહ્મણ્યમપિ તદ્વત્સ્યાત્ સંસ્કારૈર્મન્ત્રપૂર્વકૈઃ ॥