આઙ્ગિરસસ્મૃતિ · અધ્યાય 2.12

અત ઊર્ધ્વં પ્રવક્ષ્યામિ પ્રાયશ્ચિત્તવિધિં શુભમ્ ।
યમધીત્ય વિમુઞ્ચન્તિ શ્રુત્વા સ્મૃત્વા ચ વૈ દ્વિજાઃ ॥

સદા ત્રિષવણં સ્નાયાત્ સકૃત્સ્નાત્વા પયઃ પિબેત્ ।
પ્રાતઃ સ્નાત્વા સમારમ્ભં કુર્યાજ્જપ્યં તુ નિત્યશઃ ॥

સાવિત્રીં વ્યાહૃતીં વાપિ જપેદષ્ટસહસ્રકમ્ ।
ઓંકારમાદિતઃ કૃત્વા રૂપે રૂપે તથાન્તરમ્ ॥

સ્થાનં વીરાસનં શક્તઃ કુર્યાદાસનમેવ વા ।
આસનં શલ્યવિદ્ધં સ્યાદ્ અમધઃશાયી ભવેત્સદા ॥

ગવ્યસ્ય પયસો ઽલાભે ગવ્યમેવ ભવેદ્દધિ ।
દધ્યભાવે ભવેત્તક્રં તક્રાભાવે તુ યાવકમ્ ॥

એષામન્યતમં યચ્ચાપ્ય્ ઉપપદ્યેત તત્પિબેત્ ।
ગોમૂત્રેણ તુ સંયુક્તં યાવકં તત્પિબેદ્દ્વિજઃ ॥

એતત્તુ વિહિતં પુણ્યં કૃચ્છ્રમઙ્ગિરસા સ્વયમ્ ।
પ્રણવાત્ત સમારમ્ભો નામ્ના વજ્રમિતિ સ્મૃતમ્ ॥

એતત્પાતકયુક્તાનાં પ્રાયશ્ચિત્તં વિધીયતે ।
મહાપાતકસંયુક્તા વર્ષૈઃ શુધ્યન્તિ તે ત્રિભિઃ ॥

અથોપપાતકાશ્ચિન્ત્યાસ્ તથા કાલં સમાદિશેત્ ।
કાલસ્ય તુ યથોક્તસ્ય બ્રાહ્મણસ્તત્ર કારણમ્ ॥

બ્રાહ્મણા એવ ચ ક્ષેત્રં બ્રાહ્મણા એવ દૈવતમ્ ।
બ્રાહ્મણાનાં પ્રસાદેન સૂર્યો દિવિ વિરાજતે ॥

ન બ્રાહ્મણસમં ક્ષેત્રં ન બ્રાહ્મણસમો ઽનલઃ ।
વિધિર્ન બ્રાહ્મણાદૂર્ધ્વં ન દૈવં બ્રાહ્મણાત્પરમ્ ॥

જપતાં જુહ્વતાં ચૈવ યચ્છતો ચ સતામપિ ।
ક્ષેત્રો ઽગ્નેસ્તુ સુસંભૂતો બ્રાહ્મણો ઽદ્ય વિશિષ્યતે ॥

ન સ્કન્દતે ન વ્યથતે ન વિનશ્યતિ કર્હિચિત્ ।
વરિષ્ઠમગ્નિહોત્રેભ્થો બ્રાહ્મણસ્ય મુખે હુતમ્ ॥

દેવનાપિતૃભૂતાનાં કાચિદ્ભવતિ કસ્યચિત્ ।
બ્રાહ્મણે દેવતાઃ સર્વાઃ સ ચ સર્વસ્ય દેવતા ॥

યો હિ યાં દેવતામિચ્છેદ્ આરાધયિતુમવ્યયમ્ ।
સર્વોપાયપ્રયત્નેન તોષયેદ્બ્રાહ્મણાન્ સદા ॥

સમસ્તસંપત્સમવાપ્તિહેતવઃ સમુત્થિતાપત્કુલક્ષ્મકેતવઃ ।
અપારસંસારસમુદ્રસેતવઃ પુનન્તુ માં બ્રાહ્મણપાદપાંસવઃ ॥