આનન્દકન્દ · અધ્યાય 1.3

આક્, 1, 3
<રસદીક્ષાક્રમઃ>
અથ દીક્ષાં પ્રવક્ષ્યામિ સર્વસિદ્ધિપ્રદાયિનીમ્ ।
સા ચ પઞ્ચવિધા પ્રોક્તા સમયાદિવિભેદતઃ

સમયા પ્રથમા દીક્ષા સાધકાખ્યા દ્વિતીયકા ।
નિર્વાણાખ્યા તૃતીયા ચ ચતુર્થ્યાચાર્યસંજ્ઞકા

પઞ્ચમી સિદ્ધસંજ્ઞા ચ પ્રાયશો દુર્લભા નૃણામ્ ।
પૂર્વોક્તલક્ષણોપેતઃ શિષ્યો ભક્તિનતઃ શુચિઃ

ગુરું પ્રણમ્ય ચાષ્ટાઙ્ગં સ્તુત્વા ચ બહુધા તતઃ ।
અનુગૃહ્ણીષ્વ મે દીક્ષામિતિ વિજ્ઞાપયેદ્ગુરુમ્

દીક્ષાં ચ વિધિવત્પ્રાપ્ય શિષ્યઃ સર્વાર્થદૃગ્ભવેત્ ।
<દીક્ષાયોગ્યાઃ શુભતિથ્યાદયઃ>
અશ્વિનીમૂલરેવત્યો મૃગઃ પુણ્યઃ પુનર્વસુઃ

રોહિણી શ્રવણો મૈત્રં હસ્તઃ સ્યાદુત્તરાત્રયમ્ ।
મઘાશ્વિની શ્રેષ્ઠતમા દીક્ષાકર્મણિ તારકાઃ

તૃતીયા પઞ્ચમી ચૈવ સપ્તમી ચ ચતુર્દશી ।
અષ્ટમી પૌર્ણમાસી ચ દશમી ચ ત્રયોદશી

એતાસ્તુ તિથયો મુખ્યાઃ સૌમ્યેન્દુગુરુભાર્ગવાઃ ।
આદિત્ય ઇતિ વારેષુ રસદીક્ષા સુશોભના

<સમયાદીક્ષાક્રમઃ>
શુક્લપક્ષે સુયોગે ચ કરવિષ્ટિવિવર્જિતે ।
ચન્દ્રતારાબલોપેતવિષુવાયનસંક્રમે

ગ્રહણે શિવરાત્રે ચ જન્મર્ક્ષે સુમુહૂર્તકે ।
શુભગ્રહે સિદ્ધયોગે દદ્યાદ્દીક્ષાં ગુરૂત્તમઃ

રસશાલાં પ્રવિશ્યાથ સર્વોપકરણોજ્જ્વલામ્ ।
પુષ્પમાલાસમાકીર્ણામુત્તોરણપતાકિનીમ્

નિત્યપૂજાગ્નિકાર્યં ચ કૃત્વા દીક્ષાક્રમં ભજેત્ ।
દેવસ્ય દક્ષિણે પાર્શ્વે વિસ્તરે તણ્ડુલાન્ શ્રિતાન્

ચતુરશ્રં ચ તન્મધ્યે ક્ષિપેત્પ્રસ્થં સુતણ્ડુલમ્ ।
તદૂર્ધ્વં વિન્યસેત્કુમ્ભં સિતસૂત્રેણ વેષ્ટિતમ્

વાસોભ્યાં વેષ્ટિતં સૂતપઞ્ચરત્નસમન્વિતમ્ ।
પઞ્ચમૃત્પલ્લવત્વગ્ભિઃ પાવિતં જલપૂરિતમ્

દૂર્વાગન્ધોત્તમતિલહેમદર્ભાક્ષતાન્વિતમ્ ।
શિવસંજ્ઞમિદં કુમ્ભં શિવરૂપં વિચિન્તયેત્

તદ્વામભાગે સંસ્થાપ્ય વર્ધનીસંજ્ઞકં ઘટમ્ ।
શક્તિરૂપં ચ પૂર્વોક્તસર્વદ્રવ્યસમન્વિતમ્

પરિતઃ સર્વતોભદ્રં શ્રીગૌરીતિલકં લિખેત્ ।
નન્દ્યાવર્તં સ્વસ્તિકં ચ પઞ્ચવર્ણવિરાજિતમ્

પ્રક્ષાલ્ય પાદૌ પાણી ચ સમાચમ્ય ગુરૂત્તમઃ ।
નિજાસનં સમાસાદ્ય પ્રાણાયામત્રયં તથા

શિષ્યસ્યાસ્યાયુરારોગ્યસંપત્સંતાનવૃદ્ધયે ।
મુક્તયે ચાષ્ટસિદ્ધ્યૈ ચ સંકલ્પ્યાભ્યર્ચયેચ્છિવમ્

ગન્ધપુષ્પાક્ષૈર્ધૂપૈર્દીપૈર્નૈવેદ્યદર્શનૈઃ ।
શિવકુમ્ભં વર્ધનીં ચ પૂજયેત્સોપચારકમ્

રસાઙ્કુશીં મૂલમન્ત્રં પ્રજપેચ્ચ સહસ્રકમ્ ।
તદ્દશાંશં હુનેત્કુણ્ડે ત્રિકોણે લક્ષણાન્વિતે

ફલં ત્રિમધુસંયુક્તં તતો ગન્ધોત્તમાન્વિતમ્ ।
ક્રમાદાવૃતિદેવાંશ્ચ ચતુર્થ્યાં સ્વસ્વનામકમ્

સ્વાહાન્તં પ્રણવાદિં ચ સમુચ્ચાર્ય હુનેદ્ધવિઃ ।
શિવત્રયં પુરા દેવિ તતઃ સિદ્ધત્રયં યજેત્

તતો ગુરુત્રયં દેવિ કુલવૃદ્ધાન્ ગુરૂત્તમઃ ।
યોગિનીં પૂજયિત્વા તુ લબ્ધાનુજ્ઞો ગુરુસ્તતઃ

સ શક્તિમાનન્દશિવમૂર્તિમારાધયામિ ચ ।
તથા પરાનન્દશિવમૂર્તિમારાધયામિ ચ

એવં ત્રિસિદ્ધમૂર્તિં ચ શ્રીબીજસહિતં યજેત્ ।
એવં ત્રિગુરુમૂર્તિં ચ મારબીજયુતં યજેત્

તત્ત્વત્રયં ગૃહીત્વા ચ પુનર્ન્યાસં સમાચરેત્ ।
સ્વયં શિવતનુર્ભૂત્વા શિવોઽહમિતિ ભાવયેત્

હૃષ્ટં શક્તિયુતં શિષ્યં શિવદ્રષ્ટા વિલોકયેત્ ।
સ્વવામપાર્શ્વે સંસ્થાપ્ય તન્મૂર્ધનિ વિનિક્ષિપેત્

મૂલાભિમન્ત્રિતં ભસ્મ તન્નેત્રં વસ્ત્રરોધિતમ્ ।
કૃત્વા તન્મૂર્ધ્નિ સંપ્રોક્ષ્ય શિવવર્ધનિવારિણા

ત્રિધા સ્વદક્ષિણે હસ્તે શિવં સાવરણં યજેત્ ।
વિજ્ઞેયઃ શિવહસ્તોઽયં ભવપાશનિકૃન્તનઃ

અઙ્કુશીમૂલમન્ત્રં ચ ત્રિવારં ચ સમુચ્ચરેત્ ।
શિષ્યદક્ષિણકર્ણે ચ કુર્યાન્મન્ત્રોપદેશકમ્

પૂર્વં ગણપતેર્મન્ત્રં ક્ષેત્રપાલમનું તતઃ ।
ઋષિસ્તુ ગણકશ્છન્દો ન્યૃચિદ્ગાયત્રિકા સ્મૃતમ્

દેવો ગણપતિર્જ્ઞેયો ન્યાસં બીજાક્ષરેણ ચ ।
આદિવર્ગતૃતીયાર્ણં સાર્ધચન્દ્રં ગણાખ્યકમ્

પતિં ચતુર્થ્યા સંયુક્તં નમોઽન્તં મનુમુચ્ચરેત્ ।
પાશાઙ્કુશં મોદકં ચ બિભ્રાણં સ્વવિપાણકમ્

ગજાનનં પ્રવાલાભં મકુટેન્દુકલાધરમ્ ।
તુન્દિલં ગણનાથં ચ ધ્યાત્વા લક્ષં જપેન્મનુમ્

દશાંશં તર્પણં હોમં સગુડં સતિલં હુનેત્ ।
કષબિન્દુયુતં ક્ષેત્રપાલં ચ સચતુર્થિકમ્

નમોઽન્તં મનુમુચ્ચાર્ય ન્યાસં બીજાક્ષરેણ ચ ।
છન્દઃ પઙ્ક્તિર્મુનિર્જ્ઞેયો ભૃગુર્દેવશ્ચ ભૈરવઃ

ચતુર્ભુજં શૂલપાત્રવરદાભયશોભિતમ્ ।
કાલામ્બુદનિભં નાગભૂષણં કિઙ્કિણીસ્રજમ્

ત્રિનેત્રં વક્રદંષ્ટ્રં ચ ધ્યાત્વા લક્ષં જપેન્મનુમ્ ।
દશાંશં તર્પણં હોમં પાયસં ત્રિમધુપ્લુતમ્

હુનેદિતિ સમાદિશ્ય સામયાચારિકં ભજેત્ ।
દેવતાપરિચર્યાં ચ શુશ્રૂષાં ચ ગુરોઃ કુરુ

અતન્દ્રિતો જપં કુર્યાત્ શાસ્ત્રશ્રવણમાદરાત્ ।
પૂર્વોક્તાચારમાર્ગેણ નિરતો ભવ સંતતમ્

પ્રહ્વઃ કૃતાઞ્જલિર્ભૂત્વા કરિષ્યામિ તથા પ્રભો ।
ધન્યોઽહં કૃતકૃત્યોઽસ્મિ શ્રીનાથ ત્વત્પ્રસાદતઃ

ઇતિ વિજ્ઞાપયેચ્છિષ્યઃ સમયાચારબૃંહિતઃ ।
પ્રાતસ્તરાં સમુત્થાપ્ય ગુરૂંશ્ચ શિરસિ સ્મરેત્

નિવેદ્યાવશ્યકં કર્મ સ્નાતઃ સંધ્યાં સમાચરેત્ ।
નદ્યાસ્તીર્થે તટાકે વા પુષ્કરિણ્યાં શુચૌ જલે

ઉપસ્પૃશ્ય ચ સંકલ્પ્ય નિત્યતર્પણમાચરેત્ ।
આદૌ શિવત્રયં વિઘ્નનાથં ક્ષેત્રાધિપં હરિમ્

બ્રહ્માણં ભાસ્કરાદીંશ્ચ ગ્રહાન્ દુર્ગાં ચ માતૃકાઃ ।
ભૈરવાનસિતાઙ્ગાદીન્ તતઃ સિદ્ધત્રયં વદેત્

આદિનાથં મીનનાથં ગોરક્ષં કોઙ્કણેશ્વરમ્ ।
જાલન્ધ્રેશં કન્ધનીશમ્ ઓડ્ડીશં ચિઞ્ચિણીશ્વરમ્

ચૌરઙ્ગિમ્ એતાન્ નાથાખ્યાન્નવ સંતર્પયેત્તતઃ ।
ચૌરઙ્ગિં ચર્પટિં ઘોડાચૂલિં રામદ્વયં તતઃ

ભોલગોવિન્દસિદ્ધં ચ વ્યાડિં નાગાર્જુનં તથા ।
કોરણ્ડં શૂર્પકર્ણં ચ મુક્તાયીં રેવણં તથા

સિદ્ધં કુક્કુરપાદં ચ શૂર્પપાદં કણૈરિકમ્ ।
સિદ્ધં કિઙ્કિણિકાખ્યં ચ સિદ્ધાન્ ષોડશ તર્પયેત્

તતો ગુરુત્રયં તર્પ્ય માતરં પિતરં ગુરુમ્ ।
આચાર્યં ભ્રાતરં મિત્રં તર્પ્ય ચાન્યાન્કુલોદ્ભવાન્

તર્પયેદ્વિધિનાચમ્ય દેવતારાધનં તતઃ ।
નદ્યાસ્તીરે તટાકે વા ગોષ્ઠે દેવાલયે તથા

શુચિસ્થલે વા સંસ્તીર્ય સૈકતં વર્તુલાકૃતિમ્ ।
આવાહયેદ્દિનાધીશં પાટલં શિવરૂપિણમ્

દ્વિનેત્રપદ્મયુગલધારિણં દ્વિભુજં પરમ્ ।
રક્તસ્રગમ્બરાલેપભૂષાપદ્માસનોજ્જ્વલમ્

ધ્યાત્વાર્ચયેદ્રક્તપુષ્પૈસ્તતો વિઘ્નેશભૈરવૌ ।
ધ્યાત્વા પૂર્વોક્તવત્તૌ દ્વૌ રક્તપુષ્પૈઃ સમર્ચયેત્

અષ્ટાઙ્ગદણ્ડપ્રણતિં કુર્યાત્ દ્વાદશવારકમ્ ।
પુનઃ સંસ્થાપયેત્સ્વાન્તે સેવાયૈ સ્વગુરોર્વ્રજેત્

ઇત્યુક્તા સમયા દીક્ષા સાધકા કથ્યતેઽધુના ।
<સાધકદીક્ષા>
સમયાચારનિરતં સચ્છિષ્યં પક્વમાનસમ્

દીક્ષયેત્સુદિને લગ્ને દીક્ષયા સાધકાખ્યયા ।
કુર્યાન્નૈમિત્તિકીં પૂજાં શિષ્યમાવાહયેદ્ગુરુઃ

સ્વયં શિવતનુઃ શિષ્યં ગૌરીગર્ભગતં સ્મરેત્ ।
ભૂમૌ વિભૂતિં સંસ્તીર્ય તસ્મિન્કોણત્રયં લિખેત્

તત્રોપવેશ્ય શિષ્યં ચ બન્ધયિત્વા વિલોચને ।
ગર્ભાધાનં પુંસવનં સીમન્તોન્નયનં તતઃ

જાતકર્મ ચ દીક્ષાઙ્ગં નામધેયં ચ કલ્પયેત્ ।
વ્રતકર્મણિ સમ્પ્રોક્ષ્ય મૂલમન્ત્રેણ ભસ્મના

ગૌરીપુત્રં ભાવયિત્વા તસ્ય દીક્ષાં પ્રકલ્પયેત્ ।
શિવદૃષ્ટ્યા વિલોક્યામું શિવભસ્મ ચ મૂર્ધનિ

નિધાય મૂલમન્ત્રં ચ પૂજયેદ્દશવારકમ્ ।
તસ્ય દક્ષિણકર્ણે ચ ઉપદિશ્યાદ્ દશાક્ષરમ્

<રસગાયત્રી>
રસેન્દ્રભૈરવં મન્ત્રં ગાયત્રીં રસસંજ્ઞિકામ્ ।
સ બિન્દુહુતભુગ્બીજં રસેન્દ્રસ્ય પદં તતઃ

ભૈરવં ચ ચતુર્થ્યન્તં કર્માસ્ત્રં ચ દશાંશકમ્ ।
વહ્નિબીજં દીર્ઘયુક્તં કરન્યાસં સમાચરેત્

અઘોરાખ્ય ઋષિશ્છન્દો વિરાડ્દેવો મહેશ્વરઃ ।
પૂર્વસેવાજપં લક્ષં દશાંશં હોમતર્પણમ્

તિલાજ્યવ્રીહિભિઃ કુર્યાદ્ધોમં નિશ્ચલમાનસઃ ।
પૂર્વોક્તાં રસગાયત્રીં જપેલ્લક્ષં ચ તર્પણમ્

હુનેદ્દશાંશમાજ્યેન સતિલવ્રીહિભિઃ પ્રિયે ।
દદ્યાચ્છિષ્યાયાક્ષમાલાં રસલિઙ્ગં રસાગમમ્

પૂર્વોક્તાચારવાન્ ભૂત્વા રસલિઙ્ગં સમર્ચયેત્ ।
સ્વશાસ્ત્રાર્થાવગમનં કુર્યાત્સૂતેન્દ્રસંસ્કૃતિમ્

ગુરુસેવારતં નિત્યં શિષ્યમાજ્ઞાપયેદિતિ ।
શિષ્યો બદ્ધાઞ્જલિર્ નમ્રસ્તવાજ્ઞામ્ આચરામ્યહમ્

ઇત્યુક્તા સાધકા દીક્ષા નિર્વાણાખ્યા પ્રશસ્યતે ।
<નિર્વાણદીક્ષા>
કૃતનિત્યક્રિયઃ પૂર્વં કૃતનૈમિત્તિકાર્ચનઃ

પૂર્વવચ્છિવકુમ્ભાદિ વર્ધનીં સ્થાપયેત્ક્રમાત્ ।
સ્વવામે ભસ્મ સંસ્તીર્ય ષટ્કોણં ભૂગૃહં લિખેત્

શિષ્યં સંવેશ્ય કુમ્ભસ્થજલૈઃ સંપ્રોક્ષયેદ્ગુરુઃ ।
મૂલાભિમન્ત્રિતં ભસ્મ તસ્ય મૂર્ધ્નિ નિક્ષિપેત્

ગન્ધપુષ્પાક્ષતં દદ્યાત્ બધ્નીયાદ્દક્ષિણે કરે ।
કઙ્કણં ચરણાઙ્ગુષ્ઠબ્રહ્મરન્ધ્રાન્તમાનકમ્

સૂત્રં તન્મૂલમન્ત્રેણ મન્ત્રિતં સુરભીકૃતમ્ ।
શિવહસ્તં ચ તન્મૂર્ધ્નિ નિધાય ગુરુસત્તમઃ

રસાંકુશાં દ્વાદશાર્ણામ્ ઉપદિશ્યાન્ મનું પરમ્ ।
રસભૈરવદૈવત્યં દદ્યાચ્છિષ્યાય દેશિકઃ

ઋષિશ્છન્દો દેવતા ચ ન્યાસં પૂર્વોક્તવત્પ્રિયે ।
તર્પણં ચાથ હોમં ચ ધ્યાનં કુર્યાચ્ચ પૂર્વવત્

ઉત્થાય ચ ગુરું નત્વા બહુશઃ સ્તોત્રમુચ્ચરેત્ ।
ગુરુઃ શિષ્યાય વૈ દદ્યાદ્વ્યાઘ્રચર્માસનં ચ યત્ર

ભસ્ત્રિકાં વસ્ત્રસમ્પૂર્ણાં દદ્યાદ્ભૈષજ્યભસ્ત્રિકામ્ ।
રસાગમં પાઠયિત્વા ભવ શિષ્ય ચિકિત્સકઃ

રુદ્રરૂપી ભવાન્ જાતઃ સર્વભૂતહિતો ભવ ।
ઇત્યાદિશેદ્ગુરુઃ શિષ્યં શિષ્યો હૃષ્ટમનાસ્તતઃ

કૃતકૃત્યોઽસ્મિ પૂતોઽસ્મિ તીર્ણસંસારસાગરઃ ।
ઇતિ વિજ્ઞાપયેચ્છિષ્યઃ સ્તુત્વા ચ બહુધા ગુરુમ્

પ્રોક્તા નિર્વાણદીક્ષેયમ્ અથાચાર્યાભિષેચનમ્ ।
<આચાર્યદીક્ષા>
નિર્વાણદીક્ષિતસ્યાસ્ય શિષ્યસ્યાપિ મહાત્મનઃ

આચાર્યદીક્ષાં કુર્વીત યથાવદ્ગુરુસત્તમઃ ।
યથા નિર્વાણદીક્ષાયાસ્તથા સર્વં પ્રકલ્પયેત્

વિશેષાચ્છિવવર્ધન્યોઃ પુરતઃ સ્થાપયેદ્ઘટમ્ ।
રૂપ્યગન્ધાદિલોહાશાદિવ્યૌષધગણાન્વિતમ્

શિવકુમ્ભવદન્યચ્ચ સર્વમસ્મિન્ વિનિક્ષિપેત્ ।
ગુરુકુમ્ભં જપેત્સ્પૃષ્ટ્વા મૂલમષ્ટોત્તરં શતમ્

ગુરુકુમ્ભમિમં વિદ્ધિ ગુરુમન્ત્રેણ પૂજયેત્ ।
આવાહનાસનાર્ઘ્યાદ્યૈર્ ઉપચારૈશ્ચ ષોડશૈઃ

શિવાદિપઙ્ક્તિં તત્રૈવ પૂજયેદ્ગુરુણા સહ ।
યથાપૂર્વં સમાસીનં શિષ્યં ચૈકાગ્રમાનસમ્

પૂર્વવચ્છિવવર્ધન્યોરમ્બુના પરિષેચયેત્ ।
પૂર્વવચ્છિવહસ્તં ચ મૂલમન્ત્રોપદેશકમ્

કૃત્વા તદુત્તમાઙ્ગે ચ ગુરુપઙ્ક્તિં ગુરું તથા ।
આવાહનાદ્યૈઃ સમ્પૂજ્ય ગન્ધસ્રગ્દીપકૈઃ

ફલગન્ધોત્તમોપેતૈર્નૈવેદ્યૈઃ પૂજયેત્ક્રમાત્ ।
ગુરુઃ કુમ્ભજલૈઃ કુર્યાત્પ્રોક્ષણં પઞ્ચપલ્લવૈઃ

મૂલમન્ત્રેણ શતધા શિવપઙ્ક્ત્યા ત્રિસપ્તધા ।
તથૈવ સિદ્ધપઙ્ક્ત્યા ચ ગુરુપઙ્ક્ત્યા તથૈવ ચ

શિષ્યાય ગુરુભક્તાય શક્તિયુક્તાય ધીમતે ।
હારકેયૂરકટકમુદ્રિકામકુટાનિ ચ

વાહનાસનસચ્છત્રચામરવ્યજનાનિ ચ ।
મણિકુણ્ડલયુગ્મં ચ ભૂત્યાઢ્યં પાત્રમક્ષયમ્

સશિરસ્ત્રાણમુષ્ણીષં પટ્ટકૂર્પાસમુત્તમમ્ ।
યોગપટ્ટં યોગદણ્ડં તથૈવોડ્યાણબન્ધનમ્

દદ્યાત્તસ્મૈ તથૈવાજ્ઞાં ત્વમાચાર્યોઽસિ સંપ્રતિ ।
ઈશ્વરોઽસ્યદ્ય ધન્યોઽસિ સર્વેષાં દેશિકો ભવ

રસાગમાનાં દિવ્યાનાં વ્યાખ્યાતા ભવ તત્ત્વવિત્ ।
ઇત્યાદિશેદ્ગુરુઃ શિષ્યં પ્રણતં ગુરુવત્સલમ્

ઇતિ ચાચાર્યદીક્ષેયં સિદ્ધદીક્ષાદ્ય કથ્યતે ।
<સિદ્ધદીક્ષા>
નવં સપ્તરાત્રં વા પઞ્ચરાત્રં ત્રિરાત્રકમ્

વીરાઃ શક્તિયુતાઃ પૂજ્યાઃ એકવિંશતિ ચાન્વહમ્ ।
તત્સંખ્યા યોગિનઃ પૂજ્યાઃ કુમારાઃ કન્યકાઃ સ્ત્રિયઃ

ગન્ધપુષ્પાક્ષતૈઃ પુષ્પૈઃ ફલગન્ધોત્તમાર્પણૈઃ ।
તોષયિત્વા પ્રદદ્યાચ્ચ વસ્ત્રાભરણદક્ષિણાઃ

અથાસનસમાસીનં શિષ્યં ભક્તિયુતં શુચિમ્ ।
સ્પૃષ્ટ્વા કરાભ્યાં તચ્છીર્ષં દક્ષિણે શ્રવણે મનુમ્

વહ્નિં સબીજં શીતાંશું સવિસર્ગં ચ દીક્ષયેત્ ।
મૂલાધારાત્સમુદ્ભૂતં રેફં વહ્નિશિખોપમમ્

ષડાધારામ્બુજં તીર્ત્વા બ્રહ્મરન્ધ્રાન્તગં સ્મરેત્ ।
બ્રહ્મરન્ધ્રાદ્દ્રવીભૂતં સકારં સોમરૂપિણમ્

આપ્લાવયન્તં સર્વાઙ્ગં સિદ્ધઃ સંચિન્તયેન્મનુમ્ ।
ઉચ્છ્વાસનિશ્વાસભવં સંહારસ્થિતિકારણમ્

જ્ઞાત્વેત્થં મનસા નિત્યં સર્વમન્ત્રાત્મકં સદા ।
સર્વદેવમયં પુણ્યં સર્વસિદ્ધિપ્રદાયકમ્

જીવતો મુક્તિદં શુદ્ધં શિવશક્ત્યાત્મકં પરમ્ ।
રસમન્ત્રમિમં વિદ્ધિ ચાગ્નીષોમાત્મકં ભજ

એકવિંશતિસાહસ્રષટ્શતાધિકસંખ્યકમ્ ।
પ્રવર્તિતં દિવારાત્રં મનસ્તત્ર નિધેહિ ચ

મન્ત્રસ્યાસ્ય ઋષિર્જીવશ્ છન્દેત્યુક્તાઃ પ્રકીર્તિતાઃ ।
રસો દેવસ્તુ રં બીજં સં શક્તિસ્તુ પ્રકીર્તિતઃ

રેફદીર્ઘયુતં કુર્યાત્કરાઙ્ગન્યાસમાચરેત્ ।
ધ્યાયેદ્ધૃદમ્બુજે દેવિ કોટિસૂર્યેન્દુસન્નિભમ્

શુદ્ધસ્ફટિકસંકાશં રસં સંસારપારદમ્ ।
એવં નિષ્કલરૂપં તં ધ્યાત્વા તન્મયતાં વ્રજેત્

<નિષ્કલરસસ્તોત્રમ્>
ત્વં રસસ્ત્વં શિવસ્ત્વં હિ શક્તિસ્ત્વં ભૈરવેશ્વરઃ ।
ત્વં બ્રહ્મા ત્વં હિ રુદ્રશ્ચ સૂર્યસ્ત્વં શીતદીધિતિઃ

ત્વં ભૂસ્ત્વં સલિલસ્ત્વં ચ વહ્નિસ્ત્વં ચ સદાગતિઃ ।
ત્વં વ્યોમ ત્વં પરાકાશઃ ત્વં જીવસ્ત્વં પરા ગતિઃ

ત્વં સિદ્ધસ્ત્વં પ્રબુદ્ધસ્ત્વં સુગન્ધસ્ત્વં ચ મન્મથઃ ।
ત્વં લોકપાલસ્ત્વં તારા માતૃકાસ્ત્વં ગજાનનઃ

ત્વં સ્કન્દસ્ત્વં ગુરુસ્ત્વં ચ ત્વં સર્વજનકઃ શુચિઃ ।
ત્વં યજ્વા ત્વં હરિસ્ત્વં ચ ત્રેતાગ્નિસ્ત્વં ચ ઋત્વિજઃ

યેન ત્વમર્ચ્યસે તેન પૂજિતાઃ સર્વદેવતાઃ ।
ત્વયિ તુષ્ટે ચ સંતુષ્ટા બ્રહ્મવિષ્ણુમહેશ્વરાઃ

ત્વત્પાદોદકપાનેન સર્વતીર્થફલં લભેત્ ।
યસ્ત્વાં પશ્યતિ સદ્ભક્ત્યા તમ્ આલોકયતે શિવઃ

યસ્ત્વાં સંકીર્તયેત્તસ્ય સર્વમન્ત્રફલં ભવેત્ ।
યત્ર ત્વં ક્ષણમાત્રે ચ પુણ્યક્ષેત્રં તદુચ્યતે

ત્વં યં પશ્યતિ સિદ્ધેન્દ્ર સ બ્રહ્મા વિષ્ણુરીશ્વરઃ ।
યત્ર ભુઙ્ક્ષે ઽન્નકવલં તત્ર ત્રૈલોક્યમતિ હિ

યેન ત્વં ધ્રિયસે નાથ ત્વયાયં સ્ત્રિયતેક્ષણમ્ ।
સ એવ ચિત્સદાનન્દઃ પરમાત્મા ધ્રુવં ભવેત્

એવં નિશ્ચિતચિત્તસ્ય સિદ્ધસ્ય તવ યોગિનઃ ।
વર્ણાશ્રમસદાચારાઃ કૃત્યાકૃત્યવિવેકતઃ

પાપં પુણ્યં સુખં દુઃખં શીતમુષ્ણં પ્રિયાપ્રિયે ।
સ્નાનાસ્નાનં હાનિવૃદ્ધી શુદ્ધાશુદ્ધં ભયાભયમ્

ગ્રાહ્યાગ્રાહ્યં ક્ષુધા તૃષ્ણા ન કિંચિદ્ ઇહ વિદ્યતે ।
સ્વેચ્છાહારવિહારશ્ચ સુખી સંહૃષ્ટમાનસઃ

નિર્મમઃ સર્વકાર્યેષુ કલત્રાદિષુ બન્ધુષુ ।
એવમાચાર્યવચનમઙ્ગીકૃત્ય ચ દીક્ષિતઃ

અદ્ય પ્રભૃતિ વન્દ્યસ્ત્વં મા કુરુ પ્રણતિં ક્વચિત્ ।
મત્સમાનોઽસિ સિદ્ધોઽસિ જીવન્મુક્તોઽસિ સંપ્રતિ

ઇત્યુક્ત્વાચાર્યવર્યોઽપિ સિદ્ધમાલિઙ્ગ્ય ચ ક્ષણમ્ ।
સિદ્ધદીક્ષેયમાખ્યાતા શિવસાયુજ્યદાયિની

દુર્લભા સર્વતન્ત્રેષુ તવ પ્રીત્યા પ્રકાશિતા ।
દેવીત્થમેવ મન્તવ્યં દુર્લભં સમયેષુ ચ