આનન્દકન્દ · અધ્યાય 1.11

આક્, 1, 11
<જીવત એવ દિવ્યદેહસિદ્ધિઃ; ભૂતકાલાન્તકરસઃ>
શ્રીભૈરવી ।
દેવદેવ મહાદેવ કથિતાનિ ત્વયાધુના ।
રસાયનાનિ દિવ્યાનિ સિદ્ધિદાનિ મહેશ્વર

ચિરકાલેન દેહાનાં કલ્પાનાં સિદ્ધિદાનિ હિ ।
સદ્યઃ સિદ્ધિર્યથા દેવ જાયતે પરમેશ્વર

તદ્બ્રૂહિ ન્યૂનાભ્યધિકહીનક્ષીણાઙ્ગિનામ્ અપિ ।
અથ ગદ્ગદમૂકાનાં કુબ્જાનામથ કુષ્ઠિનામ્

અન્ધપઙ્ગ્વબલાનાં ચ જરાજર્જરિતાત્મનામ્ ।
સદા રોગાર્તષણ્ડાનાં કૃશાનાં ભ્રાન્તચેતસામ્

ભૂતપ્રેતપિશાચાપસ્મારોન્મત્તયુજામપિ ।
પ્રમાદાજ્જીવશેષાણાં દેહસિદ્ધિપ્રદં નૃણામ્

શ્રીભૈરવઃ ।
શ્રુત્વા તદ્ભૈરવીવાક્યં સાધુ પૃષ્ટં ત્વયા પ્રિયે ।
તથાવિધાં પ્રવક્ષ્યામિ દેહસિદ્ધિં વરાનને

પઞ્ચભૂતાત્મિકાઃ પઞ્ચ કર્તવ્યા ઘુટિકાઃ પ્રિયે ।
જીવાત્મિકા ભવેત્ષષ્ઠી ઘુટિકા પિણ્ડકોષ્ટયુક્

કાલે તુ યા કન્યા કુર્યાત્સંભોગમાયતમ્ ।
તદ્વરાઙ્ગસ્થિતં રક્તં શુક્લં સ્યાદ્વ્યોમસત્વકમ્

તસ્યાઃ સદ્યઃ પ્રસૂતસ્ય વિષ્ઠા પુત્રસ્ય મારુતમ્ ।
તત્ત્વં સ્યાત્કેવલં તસ્યા રજસ્તેજાત્મસત્ત્વકમ્

તદપત્યસ્ય રુધિરં જલતત્ત્વં પ્રકીર્તિતમ્ ।
તત્સૂતસ્ય વપુઃ સર્વં પાર્થિવં તત્ત્વમુચ્યતે

સૂતસેવકશુક્લં ચ જીવતત્ત્વં ભવેત્પ્રિયે ।
કોટિવેધકરં સૂતં કર્ષં કર્ષં નિયોજયેત્

એકૈકતત્ત્વમધ્યે તુ પ્રસેકં તાનિ મર્દયેત્ ।
તેષાં ચ ગોલકાન્કૃત્વા ષડ્રસં સ્થાપયેત્પૃથક્

નૃમાનમુન્નતં કાયમાયામં તુ તદર્ધકમ્ ।
કટાહં તામ્રઘટિતં પિણ્ડસ્થૌલ્યં ષડઙ્ગુલમ્

ચતુર્મુખમયં કોષ્ઠં તસ્યોપરિ કટાહકમ્ ।
ધારયેન્નિશ્ચલં સમ્યક્તદન્તઃ પૂરયેત્પ્રિયે

ગોઘૃતં ચ મહાતૈલં સમભાગમિદં દ્વયમ્ ।
અર્ચયેદ્દશદિક્પાલાન્ યોગિનીશ્ચ કુમારિકામ્

શ્રીગુરું સિદ્ધચક્રં ચ ભૈરવં ભૈરવીં તથા ।
ગણાધિપં ક્ષેત્રપાલં નિજેષ્ટદૈવતં તથા

નવગ્રહાગ્નિવિપ્રાંશ્ચ દૈવજ્ઞાન્ ભિષગુત્તમાન્ ।
તથાન્તરાયકર્ત્ઃંશ્ચ ભૂતપ્રેતપિશાચકાન્

યક્ષરાક્ષસગન્ધર્વાન્મન્ત્રજ્ઞાન્સ્વજનાનપિ ।
તર્પયેન્મદ્યમાંસૈશ્ચ વસ્ત્રભૂષણકાઞ્ચનૈઃ

તત્તત્પ્રિયકરૈર્ દિવ્યૈર્બલિં દિક્ષુ વિનિક્ષિપેત્ ।
ચતુર્ભિર્વઙ્કનાલૈશ્ચ ધમયેત્ખદિરાગ્નિના

ફેનહીનમ્ અધૂમં ચ સંતપ્તં ચ યદા ભવેત્ ।
શ્રીગુરું નિજદેવં ચ ચન્દ્રસૂર્યાગ્નિતારકાઃ

ભુવનાનિ નમસ્કૃત્ય કટાહે નિક્ષિપેત્તનુમ્ ।
જ્ઞાત્વા સમ્યગ્દ્રુતં દેહં પાર્થિવાખ્યં રસં ક્ષિપેત્

ધમેદ્ગાઢં પ્રયત્નેન તત્કલ્કં ચ યદા ભવેત્ ।
તતો ઽપ્તત્ત્વાખ્યરસકં નિક્ષિપેદ્ રક્તતાં નયેત્

તેજસ્તત્ત્વરસં પશ્ચાત્ક્ષિપેત્તન્માંસતાં વ્રજેત્ ।
નિક્ષિપેદ્વાયુતત્ત્વાખ્યં રસં તત્ર વિનિક્ષિપેત્

શુભ્રવર્ણત્વમાપ્નોતિ તતશ્ચાકાશતત્ત્વકમ્ ।
નિક્ષિપેજ્જીવતત્ત્વાખ્યં રસતત્ત્વં ચ પાર્વતિ

રસં ક્ષિપેત્ત્વન્ધ્રિતસ્ય સ્વર્ણસ્ય તત્સમં ભવેત્ ।
સજીવો જાયતે સિદ્ધો હુંકારત્રયમ્ ઉચ્ચરેત્

યથોદિતો ભાનુબિમ્બો મહાબુદ્ધિપરાક્રમઃ ।
મહાવપુર્મહાતેજા નાગાયુતમહાબલઃ

મન્મથોપમરૂપાઢ્યો વાચા વાગીશ્વરીસમઃ ।
બુદ્ધ્યા જીવસમઃ શ્રીમાન્વિષ્ણુવદ્ધનદોપમઃ

ત્યાગે રોષે ચ કાલાગ્નિર્ગામ્ભીર્યેણ મહોદધિઃ ।
સ્રષ્ટા હર્તા ચ ગોપ્તા ચ સર્વાનુગ્રાહકઃ પ્રભુઃ

દિવ્યદૃષ્ટિર્ વજ્રદેહઃ સ સાક્ષાદ્ભૈરવસ્ત્વયમ્ ।
અર્ધયોજનવિસ્તીર્ણહેમકિઙ્કિણિમણ્ડિતમ્

ચલદ્ભ્રમરસશોભં નાનામાણિક્યમણ્ડિતમ્ ।
હેમમાલાપરિષ્વક્તં ઘણ્ટાનાદમનોહરમ્

દિવ્યદીપ્તમહાનાદિશઙ્ખકાહલસંકુલમ્ ।
વીણાવેણુમૃદઙ્ગાદ્યૈર્ વાદિત્રૈર્ મુરજૈઃ સમમ્

તાલૈર્બહુવિધૈશ્ચાન્યૈર્દિવ્યઘોષૈઃ સમાકુલમ્ ।
ગાયત્કિન્નરગન્ધર્વૈસ્તથા કિંપુરુષૈર્યુતમ્

લસન્માણિક્યકેયૂરહારકઙ્કણમુદ્રકાઃ ।
કાચનૂપુરસંયુક્તા દિવ્યાભરણભૂષિતાઃ

દિવ્યમાલાપરિષ્કારા દિવ્યગન્ધાનુલેપનાઃ ।
દિવ્યામ્બરાશ્ચારુરૂપા મત્તમન્મથવિહ્વલાઃ

દિવ્યાઙ્ગનાસ્તદા ચૈનં સમાશ્રિત્ય બ્રુવન્તિ ચ ।
કિં કર્મ સિદ્ધસંખેદાસ્ ત્વાદેશો દેવ દીયતામ્

ઉપાસતે સિદ્ધકન્યાઃ પરઃ શતસહસ્રકમ્ ।
યત્ર યાસ્યતિ તત્રૈવ ચાનુયામો વયં વૃતાઃ

દિવ્યાલયાંશ્ચ વિવિધાન્હેમમાણિક્યમણ્ડિતાન્ ।
દિવ્યાનિ સ્નાનપાનાનિ સ્વીકુર્વાણો મુહુર્મુહુઃ

વજ્ર્યાદિસર્વલોકેષુ સ્વેચ્છયા વિહરત્યસૌ ।
પૂજ્યતે દેવસિદ્ધૌઘૈઃ યથાયં ભૈરવસ્તથા

ભુઞ્જાનઃ સર્વભોગાંશ્ચ ક્ષુત્પિપાસાવિવર્જિતઃ ।
યોગિનીશતસાહસ્રં ભોક્તા સંચિન્તયન્ સુખમ્

મહાકલ્પાન્તકાલેઽપિ પ્રક્ષીણેઽસ્મિન્વરાનને ।
લીયતે પરમે વ્યોમ્નિ લીયન્તે યત્ર દેવતાઃ

ભૂતકાલાન્તકો નામ રસસ્યાસ્ય પ્રભાવતઃ ।
અભેદ્યો ઽયમ્ અખણ્ડ્યશ્ચ ત્વદાહ્યો ભવતિ પ્રિયે

રસાયનસ્ય સર્વસ્ય સિદ્ધિદોઽયં મહેશ્વરિ ।
વક્ષ્યતે મન્ત્રરાજોઽયં રસસિદ્ધિપ્રદાયકઃ

ઐં હ્રીં શ્રીં ક્લીં સૌઃ શ્રીભૈરવ