આનન્દકન્દ · અધ્યાય 1.12

આક્, 1, 12
<શ્રીશૈલે સિદ્ધિલાભઃ>
શ્રીભૈરવી ।
શ્રીશૈલે વિવિધા સિદ્ધિઃ સદ્યઃ પ્રત્યયકારિણી ।
સુલભા શ્રૂયતે દેવ તાં બ્રૂહિ વિવિધાં પ્રભો

શ્રીભૈરવઃ ।
વક્ષ્યામિ શૃણુ તત્સર્વં સદ્યઃ સિદ્ધિકરં પ્રિયે ।
કૈલાસાન્મન્દરાન્મેરોર્વિન્ધ્યાદ્રેશ્ચ હિમાલયાત્

મહેન્દ્રાન્મલયાદ્રેશ્ચ સહ્યાદૃશ્યગિરેરપિ ।
શ્રેષ્ઠઃ શ્રીપર્વતો દિવ્યઃ સિદ્ધિયોગીન્દ્રસેવિતઃ

તત્ર તીર્થાનિ સર્વાણિ સરાંસિ સરિતઃ પ્રિયે ।
સિદ્ધિપ્રદાનિ લિઙ્ગાનિ લતાપાષાણપાદપાઃ

મૃત્તિકાકન્દતોયાનિ પત્રપુષ્પફલાનિ ચ ।
એવમાદીનિ વિદ્યન્તે સર્વસિદ્ધિકરાણિ ચ

શ્રીપર્વતોઽહમીશાનિ ત્વહં સાક્ષાત્સ પર્વતઃ ।
સ્થાવરં મામકં રૂપં વિદ્ધિ તં સુરસેવિતમ્

અસ્મિન્યદસ્તિ નાન્યત્ર યદન્યત્ર સ્થિતં ચ તત્ ।
દિવ્યલિઙ્ગસ્પર્શનીયં જ્યોતિર્લિઙ્ગમનામયમ્

શ્રીમલ્લિકાર્જુનમિતિ પ્રખ્યાતં પરમેશ્વરિ ।
વામપાર્શ્વેઽસ્ય લિઙ્ગસ્ય ઘણ્ટાસિદ્ધેશ્વરઃ સ્થિતઃ

ઘણ્ટા વિલમ્બતે દ્વારે તીર્થકુણ્ડં ચ વિદ્યતે ।
ઉપોષિતૈસ્ત્રિભિઃ કાર્યં જાગરૂકૈરતન્દ્રિતૈઃ

નિશિ કૃષ્ણચતુર્દશ્યામજસ્રં સ્નાપયેચ્છિવમ્ ।
એકઃ સમાનયેત્તોયં કુણ્ડસ્થમપરઃ પ્રિયે

ઘણ્ટાં નિનાદયેદન્યશ્ચતુર્યામાવધિ પ્રિયે ।
ઘણ્ટાસિદ્ધેશ્વરસ્તુષ્ટો દદ્યાત્તેભ્યોઽપિ ખે ગતિમ્

ઘણ્ટાસિદ્ધેશ્વરસ્યાસ્ય દક્ષિણે નિખનેત્પ્રિયે ।
જાનુદઘ્નં તુ તત્રૈવ દૃશ્યતે રોચનપ્રભા

મૃત્તિકા તાં સમાહૃત્ય કર્ષમાત્રં પિબેત્પ્રિયે ।
ક્ષીરયુક્તાં ચ સપ્તાહં સ સાક્ષાદમરો ભવેત્

શ્રીગિરીશસ્ય પુરતો ગજાકારા મહાશિલા ।
સ્રવત્યેવ દિવારાત્રં દિવ્યગન્ધં સુગુગ્ગુલુમ્

તં ગૃહ્ણીયાત્પલાશસ્ય દર્વ્યાલાબુકપાત્રકે ।
પ્રક્ષિપેદ્ગન્ધકયુતં ભક્ષયેત્કર્ષમાત્રકમ્

પ્રત્યહં માસપર્યન્તં તતઃ સિદ્ધિમવાપ્નુયાત્ ।
સદાનન્દો યુવા ધીરો જીવેદાચન્દ્રતારકમ્

વિદ્રુતે મ્લેચ્છવદને ગુગ્ગુલું તં વિનિક્ષિપેત્ ।
કોટિમંશં તતસ્તામ્રં દિવ્યં ભવતિ કાઞ્ચનમ્

<ચન્દ્રોદક બેઇ મલ્લિકાર્જુન>
મલ્લિકાર્જુનદેવસ્ય ચન્દ્રવાપ્યસ્તિ પશ્ચિમે ।
વૈશાખપૂર્ણિમાયાં તુ સાધયેત્સાધકોત્તમઃ

નિર્ભયો નિર્વિકલ્પશ્ચ વસંસ્તોયસમીપતઃ ।
જપેન્મૃત્યુઞ્જયં મન્ત્રં રાત્રૌ વાસોવિવર્જિતઃ

નિશીથે ચન્દ્રસલિલં ચન્દ્રસ્પૃષ્ટં ભવેદ્યદા ।
તત્તીર્થચ્છિદ્રદેશે ચ સ્વાઞ્જલિં પ્રક્ષિપેદતઃ

સ્પૃષ્ટ્વા ચન્દ્રો યદા ગચ્છેત્તદા તત્તોયમાહરેત્ ।
પિબેચ્ચ સહસા ધીરો જીવેદાચન્દ્રતારકમ્

વજ્રકાયઃ સૌમ્યરૂપઃ શાન્તાત્મા સ ભવેન્નરઃ ।
<ત્રિપુરાન્તક>
પૂર્વદ્વારે શ્રીગિરેસ્તુ વિદ્યતે ત્રિપુરાન્તકઃ

દેવસ્ય નિકટે દેશે ચોત્તરે તિન્ત્રિણીતરુઃ ।
દૃશ્યતે તત્ર મૂલે તુ સ્વયં શ્રીભૈરવઃ પ્રભુઃ

નૃમાત્રાં નિખનેદ્ભૂમિં તદગ્રે દૃશ્યતે તદા ।
તપ્તકુણ્ડં નીલજલં દિવ્યસિદ્ધિપ્રદાયકમ્

તત્તિન્ત્રિણીકપત્રાણિ વસ્ત્રે બદ્ધ્વા વિનિક્ષિપેત્ ।
કુણ્ડે તસ્મિંસ્તદા તાનિ સ્થૂલમીના ભવન્તિ ચ

ગૃહીત્વા તિન્ત્રિણીકાષ્ઠૈઃ પચેદેવં ક્રમાત્સુધીઃ ।
તેષાં શિરઃકણ્ટકાનિ ખાનિ ચ વિવર્જયેત્

ભક્ષયેચ્છેષમખિલં સાધકઃ સિદ્ધિકાઙ્ક્ષયા ।
ક્ષણમાત્રં ભવેન્મૂર્ચ્છા તેન પશ્ચાદ્વિબુધ્યતે

વસુધાયાં બિલં પશ્યેજ્જીવેદ્દિવ્યાયુતાબ્દકમ્ ।
<મણિપલ્લિ>
પશ્ચિમે ત્રિપુરાન્તસ્ય ગવ્યૂતિદ્વયમાત્રકે

મણિપલ્લિરિતિ ગ્રામસ્તસ્ય પશ્ચિમભાગતઃ ।
વિદ્યતે કશ્ચન ગિરિસ્તત્પશ્ચાદેકવાટકમ્

દૃશ્યતે પ્રવિશેત્તત્ર પૂર્વાસ્યશ્ચ તતો વ્રજેત્ ।
દક્ષિણાભિમુખઃ પશ્ચાદ્ દશચાપાન્તમાત્રકમ્

તત્ર ચામ્રફલાકારાન્ પાષાણાઞ્જ્વલનપ્રભાન્ ।
ગૃહીત્વા બન્ધયેદ્વસ્ત્રે તદ્વસ્ત્રં રક્તતાં વ્રજેત્

પાષાણયુક્તં તદ્વસ્ત્રં ક્ષીરમધ્યે વિનિક્ષિપેત્ ।
તતઃ ક્ષીરં રક્તવર્ણં સ્યાત્ પિબેત્ સાધકોત્તમઃ

સપ્તાહાજ્જાયતે સિદ્ધિર્વજ્રકાયો મહાબલઃ ।
જીવેદ્ આચન્દ્રતારં ચ આ કલ્પમવિલ્પકમ્

<કોકિલાબિલ>
ત્રિપુરાન્તસ્યોદગ્ભાગે કોકિલાબિલમ્ ઉત્તમમ્ ।
જગત્પ્રકાશં તત્રાસ્તે કૃત્વા દેહવિશોધનમ્

સાધકો વમનાદ્યૈશ્ચ તદ્બિલં પ્રવિશેત્સુધીઃ ।
દશચાપાવધિસ્તત્ર પાષાણાઃ કોકિલોપમાઃ

સન્તિ ગૃહીત્વા તત્પૃષ્ઠે તિલાઃ ક્ષિપ્તાઃ સ્ફુટન્તિ ચ ।
ઇત્યેતત્પ્રત્યયં દૃષ્ટ્વા તાશ્ચ ઘૃષ્ય પરસ્પરમ્

દુગ્ધાન્તઃ પ્રક્ષિપેત્તાંશ્ચ તત્ક્ષીરં કૃષ્ણતાં વ્રજેત્ ।
તત્ક્ષીરં માસમાત્રં ચ પિબેદ્દિવ્યતનુર્ભવેત્

બ્રહ્મણસ્ત્રિદિનં જીવેદ્વલીપલિતવર્જિતઃ ।
વેગે સમીરસદૃશશ્છિદ્રં પશ્યતિ ભૂતલે

ત્રિપુરાન્તસ્ય પૂર્વસ્યાં દિશિ યોજનમાત્રકે ।
અસ્તિ સ્વર્ગપુરીનાથો દેવસ્તસ્યાગ્રતઃ ખનેત્

જાનુમાત્રં ચ વસુધાં તત્ર સર્પફણોપમાઃ ।
સ્પર્શસંજ્ઞાસ્તુ પાષાણા નિર્ગચ્છન્તિ વરાનને

ત્રિપુરાન્તકદેવસ્ય પશ્ચિમેઽર્ધાર્ધયોજને ।
અસ્તિ દિવ્યબિલદ્વારં તત્ર ચાપત્રયાન્તરમ્

વ્રજેત્ખર્જૂરવૃક્ષોઽસ્તિ કૃષ્ણવર્ણઃ ફલાન્વિતઃ ।
તત્ફલાનાં રસં પીત્વા તેન મૂર્ચ્છા ભવેત્ક્ષણમ્

પ્રબુદ્ધોઽસૌ ભવેત્સિદ્ધો જીવેદ્ આ ચન્દ્રભાસ્કરમ્ ।
શ્રીગિરેર્ દક્ષિણદ્વારે વજ્રેશ્વરસુરેશ્વરૌ

તિષ્ઠતો નિખનેદ્ભૂમિં તત્ર શ્રીફલસન્નિભાઃ ।
પાષાણાઃ સ્પર્શભેદાઃ સ્યુઃ સંગ્રાહ્યાસ્તે સુરેશ્વરિ

તત્ર રામેશ્વરાખ્યોઽસ્તિ નિખનેત્તસ્ય સન્નિધૌ ।
રુદ્રાક્ષાકારપાષાણાઃ સ્પર્શભેદા ભવન્તિ તે

<આવર્તક>
જ્યોતિઃસિદ્ધવટસ્થાને દક્ષિણે ચૈકપાદપઃ ।
તિષ્ઠત્યાવર્તકો નામ તદાસન્ને તુ પશ્ચિમે

પર્વતો વિદ્યતે તત્ર ખનેત્તાલફલોપમાઃ ।
પાષાણાસ્તાન્ધમેદ્ગાઢં તત્ સર્વં કાઞ્ચનં ભવેત્

તસ્યૈવ દક્ષિણે દ્વારે વિદ્યતે કુણ્ડલેશ્વરઃ ।
તન્નિકૃષ્ટે જાનુમાત્રં ખનેદ્ભૂમિં સમુદ્ધરેત્

રક્તાભાઃ શ્રીફલાકારાઃ પાષાણાઃ સ્પર્શવેધકાઃ ।
પુરુષેશ્વરદેવસ્ય સમીપે કુણ્ડમસ્તિ હિ

ગુઞ્જારિડ્ઢૌ ચ વિદ્યેતે વૃક્ષૌ તત્પત્ત્રમ્ અશ્નીયાત્ ।
સપ્તાહાજ્જાયતે સિદ્ધો જરામરણવર્જિતઃ

<હસ્તિશિલા>
તત્ર હસ્તિશિલા દક્ષે ખનેદ્ધસ્તપ્રમાણતઃ ।
તત્ર જમ્બૂફલાકારા ગ્રાહ્યાસ્તે સ્પર્શસંજ્ઞકાઃ

ખ્યાતા હસ્તિશિરોનામ્ના ખ્યાતા હસ્તિશિલેતિ સા ।
<છાયાછત્ત્ર>
એકયોજનમાત્રે તુ તસ્યા દક્ષિણભાગતઃ

શિવરૂપં શિવપ્રોક્તં છાયાછત્ત્રં તુ વિદ્યતે ।
વર્તુલં શતહસ્તં તુ છિદ્રં તસ્યાપ્યધો વ્રજેત્

ન કૈશ્ચિદ્દૃશ્યતે સોઽપિ સિદ્ધો ભવતિ તત્ક્ષણાત્ ।
યદૃચ્છયા રુદ્રતુલ્યઃ ક્રીડત્યેવ જગત્ત્રયે

સિદ્ધ્યષ્ટકં સાધયેદ્વા સર્વસિદ્ધિપ્રદાયકઃ ।
કાન્તાભ્રસત્વકનકસૂતાઃ ક્રમગુણોત્તરાઃ

અમ્લેન મર્દયેદ્ગાઢં ગોલં કૃત્વા તુ વેષ્ટયેત્ ।
તદ્ગોલં દીર્ઘવંશાગ્રે બદ્ધ્વા શ્રીકાલિકામનુમ્

જપેન્નિવેશયેત્તત્ર છાયાછત્ત્રેણ તેન ચ ।
વંશાગ્રબદ્ધગોલાન્તર્જાયતે ઘુટિકા શુભા

વક્ત્રાન્તર્ધારયેત્તાં તુ તત્ક્ષણાત્ખેચરો ભવેત્ ।
શિલાં તાલં વસ્ત્રબદ્ધં કૃત્વા વંશાગ્રવેષ્ટિતમ્

છાયાછત્ત્રે નિવસ્યૈતત્તાભ્યાં નેત્રે સમઞ્જયેત્ ।
નિધિં પશ્યતિ ભૂમિસ્થં નાત્ર કાર્યા વિચારણા

વંશાગ્રબદ્ધખડ્ગં ચ છાયાછત્ત્રે વિનિક્ષિપેત્ ।
મન્ત્રયેત્કાલિકામન્ત્રં તં ખડ્ગં ધારયેત્ કરે

ત્રૈલોક્યવિજયી ધીરો ભવેદ્વીરો જગત્ત્રયે ।
વંશાગ્રે રોચનં બદ્ધ્વા છાયાછત્ત્રે નિવેશયેત્

લલાટે તિલકં તેન કૃત્વા લોકં વશં નયેત્ ।
સ્રોતોઞ્જનાઞ્જને તદ્વચ્છાયાચ્છત્રે નિવેશયેત્

તેનાઞ્જનેનાઞ્જિતોઽસૌ દેવૈરપિ ન દૃશ્યતે ।
પાદુકે પૂર્વવદ્બદ્ધ્વા છાયાચ્છત્રે નિધાપયેત્

પાદાભ્યાં પાદુકે ધૃત્વા યત્ર યત્રાભિવાઞ્છતિ ।
પ્રયાતું તત્ર તત્રૈવ નયતસ્તં ચ પાદુકે

પૂર્વવદ્ રક્તવસ્ત્રં ચ છાયાચ્છત્રે નિવેશયેત્ ।
આવેષ્ટયેત્તં ચ પટમદૃશ્યો ભવતિ ક્ષણાત્

સમુજ્ઝિતે પટે પશ્ચાદ્દૃશ્યતેઽસૌ ન સંશયઃ ।
કાન્તં વ્યોમ હેમ સૂતમેકીકૃત્ય વિમર્દયેત્

ગોલીભૂતં તુ વસ્ત્રેણ વંશાગ્રે બન્ધયેત્સુધીઃ ।
છાયાચ્છત્રે સ્થાપયેત્તત્કાલીમન્ત્રેણ મન્ત્રયેત્

સ્પર્શવેધી ભવેદેતત્સત્યં સત્યં વરાનને ।
શ્રીશૈલપશ્ચિમદ્વારે દેવો બ્રહ્મેશ્વરઃ સ્થિતઃ

દુર્ગા દેવી ચ તત્રસ્થા સોપાનં નવમં ચ યત્ ।
તુઙ્ગભદ્રાયાં ચ નદ્યાં તતો બ્રહ્મેશ્વરસ્ય ચ

દ્વારદેશે મુદ્ગવર્ણં ચત્વારઃ સ્પર્શકા અમી ।
ચિઞ્ચાવનં ચ નૈરૃત્યે સ્થિતં બ્રહ્મેશ્વરસ્ય હિ

કુણ્ડં ચ વિદ્યતે તત્ર ચિઞ્ચાધશ્ચણ્ડિકા સ્થિતા ।
એકપાદેન સતતં તચ્ચિઞ્ચાફલમ્ આહરેત્

વસ્ત્રેણ બન્ધયેત્કુણ્ડે ક્ષિપ્ત્વા સ્નાનં સમાચરેત્ ।
સ્નાનાન્તે તાનિ ગૃહ્ણીયાત્તાવન્મત્સ્યા ભવન્તિ હિ

તદિન્ધનૈઃ પચેત્તાશ્ચ હ્યસ્થિપુચ્છશિરસ્ત્યજેત્ ।
દદ્યાદ્દેવાયૈકમ્ અંશમ્ અતિથીનાં દ્વિતીયકમ્

તૃતીયાંશં સ્વયં ભક્ષેન્મૂર્છિતો ભવતિ ક્ષણાત્ ।
દિવ્યો ભવતિ સિદ્ધોઽયં બિલં પશ્યતિ ભૂતલે

જરામરણનિર્મુક્તો હ્યબધ્યો નિર્જરૈરપિ ।
અલમ્પુરોત્તરે ગ્રામો વિદ્યતે ભીમપાદુકઃ

પાર્શ્વે તુ તસ્ય ગ્રામસ્ય હસ્તમાત્રં ધરાં ખનેત્ ।
પાષાણા હિ ફણાકારાઃ સ્પર્શસંજ્ઞા ભવન્તિ તે

યોગીશ્વરીતિ દેવ્યસ્તિ તત્રાલંપુરદેવતા ।
તસ્યાગ્રતો રમ્યગુહા તસ્યા મધ્યે ખનેદ્ભુવમ્

પાષાણા ભેદસંકાશા ગ્રાહ્યા માર્જાલવિષ્ઠયા ।
સંમિશ્ર્ય નિક્ષિપેદ્વઙ્ગે દ્રુતે તત્તારતાં વ્રજેત્

મધ્વાજ્યાભ્યાં પિબેત્તાંશ્ચ પાષાણાન્સાધકોત્તમઃ ।
દિવ્યો ભવતિ સિદ્ધોઽયં વલીપલિતમૃત્યુજિત્

શ્રીપર્વતોત્તરદ્વારે દેવો નામ્ના મહેશ્વરઃ ।
તિષ્ઠતિ ભ્રમરામ્રશ્ચ તત્ર તત્ફલમાહરેત્

સ્ફોટયેચ્ચ તદન્તસ્થા નિર્યાન્તિ ભ્રમરાસ્તથા ।
સજીવા અથ તાન્સર્વાન્ભ્રમરાંસ્તાન્વિવર્જયેત્

તત્ફલાનિ પચેત્ક્ષારે યાવચ્છક્યં પયઃ પિબેત્ ।
ક્ષણં મૂર્ચ્છા ભવેત્તેન મૂર્ચ્છાન્તે ચ પયઃ પિબેત્

એવં કુર્યાત્પ્રયત્નેન ચૈકવિંશતિવાસરમ્ ।
તેન વજ્રશરીરઃ સ્યાદ્વલીપલિતવર્જિતઃ

વેદવેદાઙ્ગતત્ત્વજ્ઞો જીવેદાદિત્યતારકમ્ ।
તરસા વાયુના તુલ્યસ્તત્ક્ષણાદ્ભવતિ પ્રિયે

તદામ્રસ્ય ફલેનૈવ ત્યક્તભ્રમરકેન ચ ।
વઙ્ગસ્ય પલસાહસ્રં દ્રાવિતં રજતં ભવેત્

રન્ધ્રમાપાદયેદામ્રફલે ભૃઙ્ગં વિવર્જયેત્ ।
તન્મધ્યે નિક્ષિપેત્સૂતં કર્ષં કૃષ્ણાભ્રસત્વકમ્

નિરુધ્ય વક્ત્રં સમૃદા ગોમયેન ચ લેપયેત્ ।
છાયાયાં શોષયેત્કાષ્ઠૈસ્તદીયૈઃ પ્રહરં પચેત્

સ્વભાવશીતલં કૃત્વા વક્ત્રસ્થાં કારયેત્સુધીઃ ।
ખેચરત્વમવાપ્નોતિ વલીપલિતવર્જિતઃ

જીવેચ્ચન્દ્રાર્કપર્યન્તં વાગ્મિત્વં બ્રહ્મણા સમમ્ ।
સૂતં કૃષ્ણાભ્રસત્વં ચામ્રફલે પૂર્વવત્ક્ષિપેત્

પ્રલિપ્ય ગોશકૃન્મૃદ્ભ્યાં પુટેદારણ્યકોપલૈઃ ।
સ્વશીતં પારદં ગ્રાહ્યં મધુસર્પિર્ભિર્ યુતં લિહેત્

ગુઞ્જામાત્રં ચ માસાન્તં બાલો ભવતિ માનવઃ ।
નવનાગોપમઃ સત્વે જીવેદ્ બ્રહ્મૈકવાસરમ્

ઉત્તરે શ્રીગિરીશસ્ય વિદ્યતે શુક્લપર્વતે ।
પઞ્ચોપચારૈઃ સમ્પૂજ્ય ત્રિષુ લોકેષુ વિશ્રુતઃ

ઓં હું ફટ્કારમન્ત્રેણ નિર્વિકલ્પેન સાધકઃ ।
પશ્યેત્પશ્ચિમદિગ્ભાગમ્ અન્તરિક્ષે વિમાનકમ્

દિવ્યં હ્યનેકરુચિરં સદ્યઃ પ્રત્યયકારકમ્ ।
તતઃ પશ્ચિમદિગ્ભાગે વ્રજેત્તીર્ત્વા મહાનદીમ્

દૃશ્યતે ચ ગુહા તત્ર પ્રવિશેત્પશ્ચિમાનનઃ ।
ત્રિયોજનં વ્રજેત્તત્ર વિભીર્ એકો ઽવિકલ્પકઃ

કદલીકાનનં તત્ર દૃશ્યતે પઞ્ચયોજનમ્ ।
અચ્છોદપૂર્ણા સરસી તન્મધ્યે ભદ્રપીઠકમ્

તત્પીઠં તુ મહદ્દિવ્યં પશ્યેત્સ્ફટિકસન્નિભમ્ ।
ઉચ્ચારયેન્મન્ત્રમિમં દણ્ડવત્પ્રણતિં ભજેત્

ઓં હ્રીં વિદ્યાવાગીશ્વરાધિપતયે હ્રીં ઓં સ્વાહા ।
તત્ર સ્નાત્વા જપેન્મન્ત્રં લક્ષમેકં વરાનને ।
કન્દમૂલાશનો વા યથેષ્ટં સાધકઃ પ્રિયે

સિંહાસનાન્તરે દેવં પશ્યેત્સ્ફટિકસન્નિભમ્ ।
ચતુર્ભુજં ત્રિણેત્રં ચ વિશદેન્દુકલાધરમ્

નીલગ્રીવં નાગભૂષં પરશ્વથમૃગાયુધમ્ ।
વરાભયં વરેણ્યં તં વિશિષ્ટવિબુધાર્ચિતમ્

નમસ્કુર્યાચ્ચ સાષ્ટાઙ્ગં મન્ત્રૈઃ સ્તોત્રૈર્ મુહુર્મુહુઃ ।
તતઃ પ્રસન્નઃ સ શિવો વરં દત્તે યથેપ્સિતમ્

શતમાયતનં તત્ર કૂપં નવશતં યથા ।
આરામાશ્ચાપિ તાવન્તિ નન્દનાનિ વનાનિ ચ

વાપ્યો નવશતં સન્તિ વિવરં ચૈવ તત્સમમ્ ।
કલ્પવૃક્ષાશ્ચ તાવન્તિ એતે સર્વેઽપિ સિદ્ધિદાઃ

તત્રાસ્તે મોહલી નામ્ના પ્રથિતા યક્ષિણીષ્ટદા ।
બ્રૂતે સા દેહિ મે ભુક્તિં સિદ્ધિં ત્વં યદિ વાઞ્છસિ

દેવિ દાસ્યામ્યહં ભુક્તિં વક્તવ્યમિહ ચામુના ।
કન્દમૂલં ફલં તસ્યૈ પાયસં વા સમર્પયેત્

સા યક્ષિણી પુનર્વક્તિ યાવદ્ભુઞ્જે સુતં મમ ।
ધારયેર્ વક્ષસા તાવદ્વરં દાસ્યામિ તે મહત્

વિસૃજેસ્ત્વં યદિ તદા ભવન્તં હન્મિ નિર્દયા ।
એવં ગતભયશ્ ચીરઃ કુર્યાચ્ચેત્ સિદ્ધિભાગ્ભવેત્

વ્રજેદુદીચીદિગ્ભાગે તત્સરો યોજનાર્ધકે ।
તત્રાસ્તે ચન્દનં દિવ્યં પુષ્પપૂર્ણં મહેશ્વરિ

તત્પુષ્પાઘ્રાણમાત્રેણ ક્ષુત્પિપાસા ન બાધતે ।
ભક્ષયેદથવા તસ્ય ફલમેકં યથોચિતમ્

વજ્રકાયો ભવેત્તસ્ય ભક્ષણાદેવ માનવઃ ।
સરોદક્ષિણદિગ્ભાગે ગચ્છેદ્યોજનપાદકમ્

નન્દનં દૃશ્યતે તત્ર દાડિમીવૃક્ષસંકુલમ્ ।
તત્ફલં ભક્ષયેદ્યસ્તુ જીવેદ્યુગસહસ્રકમ્

તસ્યૈવ સરસઃ પૂર્વભાગે ક્રોશાર્ધમાત્રકમ્ ।
ગચ્છેદ્ધાત્રીફલૈર્ યુક્તં વિદ્યતે નન્દનં વનમ્

અશ્નીયાત્તત્ફલં ધીરો જીવેત્સંવર્તકત્રયમ્ ।
સરસસ્તસ્ય ભાગે ચ પશ્ચિમે યોજનં વ્રજેત્

તત્ર શ્રીફલસમ્પૂર્ણં નન્દનં વિદ્યતે વનમ્ ।
અદ્યતે તત્ફલં યેન જીવત્ય્ આચન્દ્રતારકમ્

તત્રૈવ નન્દનવને લિઙ્ગં સ્યાન્નીલવર્ણકમ્ ।
તસ્યોદગ્દ્વારમાર્ગેણ વિશેન્નાગો મહાબલઃ

તત્ર સપ્તફણોપેતસ્તૂગ્રભીતિકરો મહાન્ ।
એવંવિધં મહાનાગં હુંહુંકારં વદન્મુહુઃ

નમસ્કુર્યાત્પ્રયત્નેન સાધકઃ સિદ્ધિકાઙ્ક્ષયા ।
વદત્યેવં મહાનાગસ્ ત્વદૃશ્યત્વં દદામિ તે

યાહિ સ્વં પશ્ચિમદ્વારં દિવ્યા કન્યાસ્તિ તત્ર વૈ ।
સમુચ્ચરન્મહામન્ત્રં વ્રજેત્તત્રૈવ સાધકઃ

દદાતિ હારં સા કન્યા પ્રવેશં ન દદાતિ ચ ।
હારં ગલે ધારયેત્તં તેન સારસ્વતં ભવેત્

તસ્માદ્દક્ષિણદિગ્દ્વારે વ્રજેદ્ભીતિકરં પરમ્ ।
તત્ર પશ્યેન્મુક્તકેશં જિહ્મનેત્રં દિગમ્બરમ્

ગદાહસ્તં નીલવર્ણં દૃષ્ટ્વા શ્રીક્ષેત્રપાલકમ્ ।
વન્દેત મન્ત્રમુચ્ચાર્ય સ્તોત્રૈર્વિઘ્નનિવારણમ્

હાહાહેહેહુંહુંકારં ફટ્ હું સ્વાહાન્તમેવ ચ ।
ક્ષેત્રપાલોઽપ્યનેનૈવ મન્ત્રેણાશુ પ્રસીદતિ

સ્વાગત્વં વિતરત્યેષ પ્રવેશં ન દદાતિ હિ ।
અથ વ્રજેત્ પૂર્વદિશો દ્વારં તત્ર ગણાધિપમ્

સ્થિતં પ્રપૂજયેત્તત્ર પ્રવિશેત્સાધકોત્તમઃ ।
દૃશ્યતે દિવ્યલિઙ્ગં ચ ચાપસ્તત્ર મનોહરઃ

ઓં હુઙ્કારેણ મન્ત્રેણ પૂજયેચ્ચ તમીશ્વરમ્ ।
ઉપવાસેન તત્રૈવ દિવારાત્રં જપેત્સુધીઃ

પ્રત્યક્ષો ભવતીશાનો દદાતિ હિ વરં પરમ્ ।
ઇત્યેવમાદયઃ સન્તિ સિદ્ધયઃ કદલીવને

તત્રૈવ સરસઃ પૂર્વભાગે યોજનમાત્રકે ।
અક્ષરૈર્લિખિતં દ્વારિ તત્ર પદ્માવતીબિલમ્

વમનાદ્યૈર્વિશુદ્ધાત્મા પ્રવિશેત્તત્ર સાધકઃ ।
તત્ર ચાપાન્તરશતં ગચ્છેત્તત્ર મૃદઙ્ગકમ્

આલોક્ય વાદયેત્તં ચ તદ્ધ્વનિશ્રવણાત્તદા ।
પદ્માવતી સ્વયં યાતિ હ્યમૃતં ચ દદાતિ ચ

તસ્ય પાનેન સિદ્ધોઽયમમરત્વં લભેત ચ ।
તતઃ સૈનં સમાગમ્ય પ્રાર્થયેત્ત્વં મમાન્તિકમ્

સમાગચ્છાલયે દિવ્યે કન્યાપઞ્ચશતાકુલે ।
સ્થિત્વા મમ પતિર્ભૂયા બ્રહ્માયુષ્યાવધિ પ્રભો

તદન્તે શાશ્વતં સ્થાનં ગમિષ્યસિ ન સંશયઃ ।
તસ્ય પૂર્વતટાકસ્ય ચાગ્નેય્યાં દિશિ વિદ્યતે

કદમ્બેશ્વરદેવોઽપિ વૃક્ષઃ કાદમ્બકોઽગ્રતઃ ।
તત્ર પત્રાણિ ચાદાય કટુતૈલેન લેપયેત્

તદ્બીજસંભવૈસ્તૈલૈર્ લિમ્પેદ્ વાથ પચેત્સુધીઃ ।
તત્કાષ્ઠૈસ્તાનિ મત્સ્યાઃ સ્યુસ્તામ્રપાત્રે વિનિક્ષિપેત્

વર્જ્યમસ્થિ શિરઃ પુચ્છં ક્ષૌદ્રસર્પિર્યુતં ભજેત્ ।
તત્સેવયા ભવેત્સિદ્ધો રુદ્રતુલ્યો મહાબલઃ

તદ્વૃક્ષશ્ચ નદીતીરે કુણ્ડલેશસ્ય સન્નિધૌ ।
વિદ્યતે પૂર્વવદ્યુક્ત્યા સિદ્ધિર્ભવતિ નાન્યથા

અસ્ત્યુત્તરે પુષ્પગિરિઃ કપોતેશશ્ચ વિદ્યતે ।
ત્રિઃ પ્રદક્ષિણમાતન્યાત્તસ્ય મૂર્ધાનમાવ્રજેત્

ખેચરત્વં ભવેત્તસ્ય સાધકસ્ય ન સંશયઃ ।
તસ્ય પૂર્વોત્તરે ભાગે છેદિકીદ્વારકં સ્થિતમ્

ઉદઙ્મુખં વિશેત્તત્ર ત્રિચાપાન્તરમાદરાત્ ।
મૂષિકાકારપાષાણં તક્રે પિષ્ટ્વા પિબેન્નરઃ

ક્ષિપ્રં મૂર્ચ્છા ભવેત્તસ્ય જીવેદ્બ્રહ્મદિનત્રયમ્ ।
વેધયેત્ સર્વલોહાનિ સ્પર્શમાત્રાન્ન સંશયઃ

ઉપોષ્ય ચ દિવા નક્તં દેવાગ્રે સિદ્ધિમાપ્નુયાત્ ।
વિદ્યતે દેવતાયુગ્મં કપોતેશ્વરદક્ષિણે

આ નાભિમાત્રં નિખનેદ્દેવતાદ્વયમધ્યતઃ ।
ગોરોચનોપમાસ્તત્ર પાષાણાઃ સન્તિ તાન્હરેત્

પિષ્ટ્વા ક્ષૌદ્રઘૃતાભ્યાં ચ પિબેદ્યઃ સોઽમરો ભવેત્ ।
કપોતેશસ્ય વાયવ્યે નિખનેદ્ધસ્તમાત્રકમ્

તત્ર પારાવતાકારપાષાણાઃ સ્પર્શસંજ્ઞકાઃ ।
દેવતારાધનં કૃત્વા તેષામેકં સમાહરેત્

ઐશાન્યાં શ્રીગિરીશસ્ય હ્યસ્ત્યેવ ભૃગુપાતનમ્ ।
તત્સમીપે દિવ્યકુણ્ડં મૃદં તસ્માત્સમાહરેત્

ગવ્યપઞ્ચકયુક્તાં તાં ધમેત્ખદિરવહ્નિના ।
તસ્માલ્લોહં પતેન્નીલં મધ્વાજ્યાભ્યાં પ્રતાપિતમ્

તત્સેચયેત્સપ્તધૌતે તદ્ગોલં નિક્ષિપેન્મુખે ।
વિષ્ણુતુલ્યો ભવેત્સિદ્ધઃ સર્વજ્ઞઃ સર્વગઃ સુખી

ભૃગુપાતનશૈલાગ્રાત્ ક્રોશે દધિકવાટકમ્ ।
અચ્છતૈલગિરિર્ નામ્ના તદગ્રે વિદ્યતે સદા

બિલં તત્પશ્ચિમે હ્યસ્તિ તન્મધ્યે ચાપપઞ્ચકે ।
ગતે પશ્યેત્તત્ર કુણ્ડં તત્ર લાક્ષાસમં રસમ્

અલાબુપાત્રે ગૃહ્ણીયાત્ સ સૂતઃ કોટિવેધકઃ ।
પ્રાકારશ્ચન્દ્રગુપ્તસ્ય શ્રીગિરીશસ્ય પશ્ચિમે

તન્મધ્યે વિદ્યતે વેશ્મ ચૈત્યં તત્પૂર્વતઃ સ્થિતમ્ ।
ચૈત્યાત્પૂર્વે શિલા દિવ્યા મુદ્ગાભા સ્પર્શસંજ્ઞકા

તત્રાસ્તે મોહનો દન્તી તમારુહ્ય સમાહિતઃ ।
પૃષ્ઠાત્તસ્ય તૃણં ગ્રાહ્યં તત્સર્વં કાઞ્ચનં ભવેત્

તદ્ગજસ્યોત્તરે પાર્શ્વે જાનુદઘ્નાં ખનેદ્ધરામ્ ।
જમ્બૂફલાભાઃ પાષાણાઃ સ્પર્શસંજ્ઞા ભવન્તિ તે

ક્ષિતિં ખનેદ્ગજસ્યાધો જાનુમાત્રં લભેત્તતઃ ।
લક્ષવેધકરા સિદ્ધા ત્રિકોણે ઘુટિકા પરા

મલ્લિનાથસ્ય વાયવ્યે નત્વા દેવહ્રદઃ પરઃ ।
તીર્થં તત્રાસ્તિ પાષાણા મુદ્ગાભાઃ સ્પર્શસંજ્ઞઃ

લિઙ્ગં કૂર્મોપમં તત્ર સ્પર્શસંજ્ઞં શુભં પ્રિયે ।
પૂર્ણિમાયાં કૃત્તિકાયાં પૂજયિત્વા સમાહરેત્

તસ્માદ્ગવ્યૂતિયુગલાત્સ્મૃતા નીલવની પરા ।
તસ્યા લિઙ્ગં ચ સલિલં નીલવર્ણં પ્રશસ્યતે

અશ્વામ્રકાકસઙ્કાશાઃ પાષાણાઃ સ્પર્શવેધકાઃ ।
દેવાલયાન્તર્નિખનેજ્જાનુમાત્રાન્તરાદ્ધરામ્

મૂષિકાકારપાષાણાઃ સ્પર્શસંજ્ઞા ભવન્તિ તે ।
શ્રીગિરીશસ્ય નૈરૃત્યાં ખ્યાતા ગુણ્ડીપ્રભાખ્યયા

તસ્યાગ્રગર્તે પીતાભાં મૃત્તિકાં ચ પુટે દહેત્ ।
તસ્યાન્નિઃસરતિ સ્વર્ણં શુદ્ધદેવાર્હકં પરમ્

તત્રાસ્તે ભૃઙ્ગચૂતોઽપિ પૂર્વવત્ સિદ્ધિદાયકઃ ।
તથા તમ્બીપુરે ચાસ્તિ તીર્થે ચ વિપુલે શુભમ્

સદાફલં તુ વિખ્યાતં તસ્યાઃ પૂર્વોત્તરે સુધીઃ ।
શ્રીગિરેર્ નૈરૃતે ભાગે મહાનન્દેતિ વિશ્રુતઃ

વ્રજેદ્ ઘણ્ટાપથેનૈવ તસ્ય પૂર્વોત્તરે સુધીઃ ।
તત્રાસ્તે કાલકણ્ઠેશો નામ્નાગ્રે તસ્ય કુણ્ડકમ્

તત્રેન્દ્રગોપસઙ્કાશં સિદ્ધિઃ સૂતસ્ય વિદ્યતે ।
ભવન્તિ સપ્ત લોહાનિ સ્વર્ણં તપ્તાનિ સેકતઃ

ઐશાન્યે શ્રીગિરીશસ્ય ચાસ્તિ શ્રીમાલિનીશ્વરઃ ।
તસ્યોત્તરદિશિ ખ્યાતસ્ તૂમાપર્વતસંજ્ઞકઃ

તસ્યાગ્રે ચ ત્રિશૂલાભાઃ સન્તિ દર્ભાઃ શુભઙ્કરાઃ ।
તદધો નિખનેન્નાભિમાત્રં નીલાં મૃદં હરેત્

અક્ષકાષ્ઠૈઃ પચેત્તાં ચ દેવાતિથ્યગ્નયે ક્રમાત્ ।
એકૈકભાગં કલ્પેત ચતુર્થાંશં સ્વયં ભજેત્

જીવેત્કલ્પાયુતં સિદ્ધો મહાબલપરાક્રમઃ ।
ઇલેશ્વરસ્ય નિકટે તત્ર કોટીશ્વરઃ સ્થિતઃ

પુષ્પં પત્રં તદગ્રેઽસ્તિ સ્પર્શવેધકરં ભવેત્ ।
તત્રાચલેશ્વરો દેવઃ સ્પર્શવેધકરઃ પરઃ

તસ્ય યોજનમાત્રે ચ દક્ષિણે ચામરેશ્વરઃ ।
તતઃ સ્વર્ણશિલા ચાસ્તિ તદૂર્ધ્વં નરમાંસકમ્

ગોમાંસં વા ક્ષિપેત્કાષ્ઠૈર્બાદરૈર્જ્વાલયેત્સુધીઃ ।
પ્રાતઃ કાઞ્ચનસઙ્કાશા દૃશ્યતે સા શિલા તદા

પ્રત્યગ્રપુષ્પવત્યાશ્ચ રજસા ભાવિતાંશુકમ્ ।
લોડયેત્તચ્છિલાયાં ચ ક્ષિપેદલ્પામ્બુપાત્રકે

તસ્ય સંસ્પર્શમાત્રેણ લેહઃ સ્યાત્કાઞ્ચનં પરમ્ ।
શ્રીગુરૌ યત્ર તત્રાપિ પિણ્ડભૂમિસ્થિતોપલાઃ

કર્ષમાત્રં તુ તચ્ચૂર્ણં ભક્ષયેત્ત્રિફલા સમમ્ ।
વલીપલિતજિન્માસાજ્જીવેદાચન્દ્રતારકમ્

શ્રીગિરીન્દ્રસ્ય નૈરૃત્યાં પટાહકર્ણ ઈશ્વરઃ ।
તસ્ય પૂર્વોત્તરે ભાગે પઞ્ચવિંશતિચાપકે

દ્વિહસ્તમાત્રોર્ધ્વશિલા ખનેત્તત્ર દ્વિહસ્તકમ્ ।
શરાવસંપુટાકારાન્ દૃષદસ્ તાન્સમાહરેત્

કુર્વીત તાન્ અગ્નિવર્ણાન્ સિઞ્ચ્યાત્ કૂષ્માણ્ડજૈર્ દ્રવૈઃ ।
તન્મધ્યાન્નવનીતં તુ દદ્યાદ્દેવાય ભાગકમ્

ભાગૈકમતિથેર્દેયં ભાગમેકં સ્વયં લિહેત્ ।
દિવા નક્તં ભવેન્મૂર્ચ્છા વિનિદ્રો ભવતિ સ્વયમ્

વલીપલિતસંવર્જ્યો જીવેદ્વર્ષાયુતં નરઃ ।
સ્પર્શકાન્તસ્ય સોપાનં દ્વિતીયં ભવતિ પ્રિયે

તદ્દેવપાર્શ્વયોઃ સર્વે પાષાણાઃ શ્વેતપીતકાઃ ।
સ્પર્શાઃ સર્વા ભવન્ત્યેતે તેષુ ચૈકં સમાહરેત્

પ્રાચ્યાં હિ તસ્ય દેવસ્ય સમીપે કૂપમસ્તિ ચ ।
મણ્ડૂકાભાશ્ચ પાષાણાઃ સન્તિ ચ સ્પર્શસંજ્ઞકાઃ

તસ્યેશ્વરસ્ય ચોદીચ્યાં લિઙ્ગાદ્રિર્ વિદ્યતે મહાન્ ।
તદુત્તરસ્યાં દિશ્યસ્તિ તટિની પૂર્વવાહિની

તટિન્યાઃ પશ્ચિમાશાયાં પિઙ્ગાભં લિઙ્ગમસ્તિ હિ ।
પૂર્ણશૈલોદકં કુણ્ડં તત્ર સ્યાત્ક્ષણવેધકમ્

દ્વિયોજને મહેશસ્ય દક્ષિણે ચણ્ડિકા સ્થિતા ।
પિણ્ડિકાખ્યા સુવિખ્યાતા તસ્યા વાયવ્યકોણતઃ

અન્ધુરસ્તિ હિ તન્મધ્યે મુદ્ગવર્ણાસ્તથોપલાઃ ।
કેચિત્પથ્યાનિભાઃ સન્તિ તે સર્વે સ્પર્શસંજ્ઞકાઃ

અત્રત્યાનાં ચ સર્વેષાં સ્પર્શાનાં વિધિરુચ્યતે ।
યદિ સ્થૂલં પેષયેત્તં શ્લક્ષ્ણં મૂષાન્તરેણ હિ

કુર્યાત્સર્વાણિ લોહાનિ તસ્યામાવર્તયેત્ પ્રિયે ।
તત્સર્વં જાયતે સ્વર્ણં કુર્યાદેવં યથેષ્ટકમ્

સૂક્ષ્મશ્ચેત્સર્વલોહાનાં દ્રુતાનામન્તરે ક્ષિપેત્ ।
તત્સ્પર્શાત્ સર્વલોહાનિ કાઞ્ચનત્વં પ્રયાન્તિ હિ

વાયવ્યાં મલ્લિનાથસ્ય તીર્થે સર્વેશ્વરાખ્યકમ્ ।
તસ્ય દક્ષિણદિગ્ભાગે રાજમાર્ગે દ્વિયોજને

ગતે ડોંગલિકા તત્ર દૃશ્યતે તસ્ય મૂર્ધનિ ।
કૃષ્ણધાત્રીફલાન્યેવ સન્તિ તાનિ ચ ભક્ષયેત્

સપ્તવાસરપર્યન્તમ્ આ તૃપ્તિં વજ્રવિગ્રહઃ ।
જરામરણનિર્મુક્તો જીવેત્કલ્પશતત્રયમ્

તસ્માચ્ચ દક્ષિણે ભાગે કાકલારીમહાવને ।
તત્રાસ્તે સ્તમ્બકદલી પ્રવિશેત્તત્ર સાધકઃ

ક્રોશાર્ધમાત્રં ગચ્છેચ્ચ રસકુણ્ડં ચ દૃશ્યતે ।
અલાબુપાત્રે સંસ્થાપ્ય કોટિવેધી ભવેત્તુ સઃ

શિલામયો નીલવર્ણઃ શિખણ્ડી તત્ર દૃશ્યતે ।
તન્મુખાગ્રેઽસ્તિ કુણ્ડં વિતસ્તિમાત્રાતિનીલકમ્

શુષ્કવંશં ચ તન્મધ્યે ક્ષણં ક્ષિપ્તં નવં ભવેત્ ।
પત્રં પુષ્પં દિનૈકેન ભવત્યેવ ન સંશયઃ

તત્ર પ્રસ્થં રસં ક્ષિપ્ત્વા તાવન્માત્રં જલં હરેત્ ।
મધુતુલ્યં પિબેત્તં ચ મૂર્ચ્છા ભવતિ તત્ક્ષણાત્

ક્ષણેન લબ્ધજ્ઞાનઃ સ્યાજ્જીવેદ્યુગસહસ્રકમ્ ।
શ્રીગિરેર્વહ્નિદિગ્ભાગે ઘટિકાસિદ્ધખેચરઃ

અસ્તિ તસ્ય પુરો ભૂમૌ પઞ્ચહસ્તં ખનેત્સુધીઃ ।
બદરાકારપાષાણા વિદ્યન્તે ખગતિપ્રદાઃ

એકં વક્ત્રે સદા ધાર્યં સિદ્ધૈઃ ખેગતિલિપ્સુભિઃ ।
<સિદ્ધિક્રમઃ>
શ્રીશૈલે સર્વસિદ્ધીનામુક્તાનાં વિધિરુચ્યતે

મન્ત્રન્યાસં પુરા કૃત્વા પશ્ચાલ્લક્ષં જપેન્મનુમ્ ।
અઘોરાન્તેન વૈ શીઘ્રં તત્તત્સિદ્ધિમવાપ્નુયાત્

<અથ ન્યાસઃ>
ઓં હ્રીં મહાપર્વતવાસિન્યૈ હૃદયાય નમઃ ।
ઓં હ્રીં જ્યેષ્ઠાયૈ શિરસે સ્વાહા ।
ઓં હ્રીં રૌદ્ર્યૈ શિખાયૈ વષટ્ ।
ઓં હ્રીં કનકકુણ્ડલિન્યૈ કવચાય હું ।
ઓં હ્રીં સંજીવિન્યૈ નેત્રેભ્યો વૌષટ્ ।
ઓં હ્રીં માલિન્યૈ અસ્ત્રાય ફટ્ ।
ઓં હું શિવાય નમઃ પાદયોર્ન્યસેત્ ।
ઓં વં વામદેવાય નમઃ જઙ્ઘયોઃ ।
ઓં પં પદ્મિન્યૈ નમઃ ગુહ્યે ।
ઓં કાં કન્યાકુમાર્યૈ નમઃ નાભૌ ।
ઓં ગ્લૌં નમઃ કુક્ષૌ ।
ઓં દ્રાં હ્રીં દુર્ગાયૈ નમઃ ઉરસિ ।
ઓં હું વિન્ધ્યવાસિન્યૈ નમઃ કણ્ઠમૂલે ।
ઓં લં નમઃ ગ્રીવાયામ્ ।
ઓં હ્રીં શ્રીં અષ્ટભુજાયૈ નમઃ ભુજયોઃ ।
ઓં હું સર્વતોમુખિન્યૈ નમઃ મુખે ।
ઓં પ્રકાશિકાયૈ નમઃ નેત્રયોઃ ।
ઓં મહિષમર્દિન્યૈ નમઃ કર્ણયોઃ ।
ઓં હ્રાં સર્વાઙ્ગસુન્દર્યૈ નમઃ મૂર્ધ્નિ ન્યસેત્ ।
એવમ્ અઙ્ગરક્ષાં કૃત્વા ક્ષેત્રં પૂજયેત્ ।
ઓં હ્રીં શ્રીં નમો ભગવતિ સર્વેશ્વરિ દેવિ નમો મણ્ડલવાસિનિ ક્રાં ક્રીં ક્રૂં હન હન પચ પચ મથ મથ શીઘ્રમ્ આવેશય શીઘ્રમાવેશય એહ્યેહિ ભુવનવન્દિતે સ્વાહા ।
અનેન મન્ત્રેણ દેવતામાવાહયેત્ ।
ઓં હ્રાં હ્રીં હ્રૂં ત્રિભુવનેશ્વર્યૈ નમઃ સાંનિધ્યં કુરુ કુરુ સ્વાહા ।
અનેન મન્ત્રેણ તત્ક્ષેત્રદેવતાં પૂજયેત્ ।
ઓં કૃષ્ણવર્ણિનિ અપરામુખ્યૈ નમઃ પૂર્વસ્મિન્ ।
ઓં સુધાવર્ષિણ્યૈ નમઃ આગ્નેયે ।
ઓં પર્વતાકૃષ્ણવર્ણિનીરૌદ્રમુખ્યૈ નમઃ દક્ષિણે ।
ઓં બાલાર્કવર્ણિનીમહાલક્ષ્મ્યૈ નમઃ નૈરૃત્યે ।
ઓં ખં રક્તપર્વતવર્ણિની ।
મહામહિષાસુરમર્દિન્યૈ નમઃ પશ્ચિમે ।
ઓં માં સર્વવર્ણિનીહુઙ્કારવાગ્દેવ્યૈ નમઃ વાયવ્યે ।
ઓં સિહ્મવાહિન્યૈ નમઃ ઉત્તરે ।
ઓં શિવાશિવાશિવાત્રિશૂલહસ્તાયૈ નમઃ ઐશાન્યે ।
ઓં હ્રાં હ્રીં ક્લીં મનોન્મન્યૈ નમઃ આકાશે ।
ઓં હ્રાં હ્રીં મહામોહિન્યૈ નમઃ પાતાલે ।
ઓં હ્રાં હ્રીં હ્રૂં હ્રૈં હ્રોં હ્રૌં હ્રં મહાવિદ્યે જમ્ભય જમ્ભય મોહય મોહય દર્શય દર્શય મૂર્છય મૂર્છય ક્લીં મથ મથ આકર્ષયાકર્ષય હું ફટ્ સ્વાહા ।
મધ્યે ચ પૂજયેત્ ।
એવં ન્યાસં રક્ષાં પૂજાં કૃત્વા તત્કર્મણિ લક્ષમેકમ્ અઘોરં જપેત્ ।
તતઃ સિદ્ધિમવાપ્નોતિ ।
મન્ત્રં યથા ।
ઓં હ્રાં હ્રીં હ્રં અઘોરતર પ્રસ્ફુર પ્રસ્ફુર પ્રકટ પ્રકટ કહ કહ શમ શમ જાત જાત દહ દહ પાતય પાતય ઓં હ્રૈં હ્રાં હ્રં અધોરાસ્ત્રાય ફટ્ ।
અમું મન્ત્રં લક્ષં જપેત્ ।
તતઃ સ્વપ્ને પ્રત્યક્ષીભૂય દેવતા વરં દદાતિ