આનન્દકન્દ · અધ્યાય 1.10

આક્, 1, 10
<ઘુટિકાસિદ્ધિઃ>
પ્રણમ્ય પરયા ભક્ત્યા ભૈરવં ભૈરવી શિવમ્ ।
ઉવાચ વિનયેનેદં લોકાનાં હિતકાંક્ષિણી

શ્રીભૈરવી ।
દેવદેવ કૃપામૂર્તે સર્વાનુગ્રાહક પ્રભો ।
ત્વત્પ્રસાદાન્મયા જ્ઞાતં રહસ્યમ્ અતિદુર્લભમ્

કાન્તાભ્રહેમકુલિશરસભસ્મ રસાયનમ્ ।
અતઃ પરં મહાદેવ શ્રોતુમિચ્છામિ ભૈરવ

એતૈર્ ઘનાદ્યૈ રચિતઘુટિકાનાં રસાયનમ્ ।
શ્રુત્વા સવિનયં વાક્યં ભૈરવ્યાસ્ત્વાદિભૈરવઃ

સ્થિત્વેત્યુવાચ વચનં તદ્વક્ષ્યામિ રસાયનમ્ ।
શ્રીભૈરવઃ ।
<1. સઞ્જીવની ઘુટિકા>
શૃણુ પાર્વતિ યત્નેન સાવધાનેન સામ્પ્રતમ્

પ્રથમં જારણં કાર્યં પશ્ચાત્પારદબન્ધનમ્ ।
તસ્માજ્જારણબીજાનિ ઘનાદીનાં વદામિ તે

ગન્ધતાલશિલાતુત્થખર્પરીહિઙ્ગુલામલાઃ ।
ભૂનાગતાપ્યકાસીસનૃપાવર્તાભ્રગૈરિકમ્

કાન્તત્રિક્ષારવૈક્રાન્તાસ્ત્વેતે ચૂર્ણસમાંશકઃ ।
સિદ્ધચૂર્ણમિદં ખ્યાતં શ્રેષ્ઠં સ્યાદ્ બીજકર્મણિ

દ્વન્દ્વમેલોપલિપ્તાયાં મૂષાયાં નિક્ષિપેત્પ્રિયે ।
કૃષ્ણસત્વાભ્રસત્વં ચ દ્રાવયેત્સમશુલ્બકમ્

સમિત્રપઞ્ચકં તસ્મિન્સિદ્ધચૂર્ણં મુહુર્મુહુઃ ।
ઘનાદ્દશગુણં ક્ષેપ્યં ધમેદ્ગાઢં વરાનને

ઘનસત્વાવશિષ્ટં સ્યાદ્ધમનીયં ચ તાવતા ।
કાલેનેદં વ્યોમસત્વબીજં જાર્યં રસાયને

સમુખે પારદે બીજં ચતુઃષષ્ટ્યંશકે ક્ષિપેત્ ।
તપ્તખલ્વેઽમ્લવર્ગેણ મર્દયેદ્ દિવસત્રયમ્

તં સૂતં કચ્છપે યન્ત્રે સબિડે જારયેત્પ્રિયે ।
તતો દ્વાત્રિંશદંશં ચ ષોડશાંશં રસસ્ય તુ

અષ્ટમાંશં ચતુર્થાંશં દ્વ્યંશં ચૈવ સમાંશકમ્ ।
પારદે જારયેદેવં ક્રમાદ્બીજં સુરેશ્વરિ

સૂતમેવંવિધં વ્યોમસત્વં બીજસમં પ્રિયે ।
તપ્તખલ્વેઽમ્લવર્ગેણ મર્દયેદેકવાસરમ્

પિષ્ટિં પારદરાજં તં જમ્બીરાન્તર્વિનિક્ષિપેત્ ।
દોલાયન્ત્રેઽમ્લયુક્તે તં વિપચેત્સપ્તવાસરમ્

તમાદાય બલિં ક્ષિપ્ત્વા સિદ્ધચૂર્ણેન પાર્વતિ ।
તતસ્તં ભૂધરે યન્ત્રે પચેલ્લઘુપુટેન ચ

યાવત્કઠિનતાં યાતિ તાવત્કાર્યં મુહુર્મુહુઃ ।
દોલાપાકં સિદ્ધચૂર્ણલેપં ભૂધરકે પુટમ્

મૃતસઞ્જીવની નામ્ના ઘુટિકા સર્વસિદ્ધિદા ।
વક્ત્રાન્તરે ગલે મૂર્ધ્નિ બાહૌ કર્ણેઽથવા વહેત્

હેમ્ના સુવેષ્ટિતા સમ્યગ્વલીપલિતનાશિની ।
વક્ત્રસ્થા મૃત્યુહા વર્ષાદ્વિષવિગ્રહનાશિની

શુદ્ધં ગન્ધં કર્ષમાત્રં ગવ્યં ક્ષીરં પલં પિબેત્ ।
અનેન ક્રમણેનૈવ સૂતઃ સંક્રમતે તનુમ્

<2. દિવ્યા ઘુટિકા>
કાન્તમ્લેચ્છમુખં રૂપ્યં લિપ્તમૂષાન્તરે સમમ્ ।
દ્રાવયિત્વા સિદ્ધચૂર્ણં કાન્તાદ્દશગુણં શનૈઃ

વહેન્મુહુર્મુહુર્દ્રાવ્યં યાવત્કાન્તોઽવશિષ્યતે ।
કાન્તબીજમિદં પ્રોક્તં શ્રેષ્ઠં જાર્યં રસાયને

સમુખે પારદે ચેદં બીજં ચાર્યં ચ પૂર્વવત્ ।
ચતુઃષષ્ટ્યંશકં પૂર્વં સમાંશં તં ક્રમેણ વૈ

એવંવિધં સૂતરાજં કાન્તબીજં દ્વયં સમમ્ ।
મર્દયેત્તપ્તખલ્વે ચ સામ્લવર્ગે દિનત્રયમ્

પિષ્ટીભૂતં ચ જમ્બીરે ક્ષિપ્ત્વામ્લગણપૂરિતે ।
દોલાયન્ત્રે પચેત્સમ્યગેવમ્ આ સપ્તવારકમ્

તમાદાય લિહેદ્બાહ્યે સિદ્ધચૂર્ણેન ભૈરવિ ।
તતો દિવ્યૌષધૈર્લિપ્તે સંપુટે ભૂધરે પચેત્

યાવત્કઠિનતાં યાતિ તાવત્કુર્યાત્ક્રમેણ ચ ।
દોલાપાકં સિદ્ધચૂર્ણલેપં ભૂધરપાચનમ્

પુટે તૌ જારયેદ્ દિવ્યનામ્નાથ પરમેશ્વરિ ।
વક્ત્રાન્તરે ગલે મૂર્ધ્નિ બાહૌ કર્ણેઽથવા વહેત્

હેમ્ના સુવેષ્ટિતં ધાર્યં વલીપલિતનાશનમ્ ।
પૂર્વવત્ફલદા પુણ્યા ધાર્યા યત્નેન માનવૈઃ

પૂર્વવત્ક્રામણં કાર્યં દેહે સંક્રમતે રસઃ ।
<3. કામેશ્વરી ઘુટિકા>
સમુખે પારદે વ્યોમકાન્તબીજં ચ મારયેત્

પ્રત્યેકં પારદસમં પૂર્વવચ્ચ શનૈઃ શનૈઃ ।
ચતુઃષષ્ટ્યંશકં ચાદૌ સમાંશં તં ક્રમાદ્રસે

અસ્ય સૂતસ્ય તુલ્યાંશં કાન્તબીજાભ્રબીજકમ્ ।
તપ્તખલ્વેઽમ્લવર્ગેણ મર્દયેદ્વાસરત્રયમ્

પિષ્ટીકૃતં ચ જમ્બીરે ક્ષિપ્ત્વા દોલાગતં પચેત્ ।
પુનરાદાય તાં પિષ્ટિં સિદ્ધચૂર્ણેન લેપયેત્

દિવ્યૌષધિગણૈર્લિપ્તે સંપુટે ભૂધરે પચેત્ ।
યદા કઠિનતાં યાતિ દ્વિધા કુર્યાત્ક્રમેણ તુ

દોલાસ્વેદં ચૂર્ણલેપં કૃત્વા ભૂધરપાચનમ્ ।
કામેશ્વરીયં ઘુટિકા વક્ત્રસ્થા સર્વસિદ્ધિદા

પૂર્વવત્ક્રામણં કાર્યં રસેન્દ્રઃ ક્રામતે તનુમ્ ।
<4. હેમસુન્દરી ઘુટિકા>
સ્વર્ણં રૂપ્યં મ્લેચ્છમુખં કાન્તસત્વાભ્રસત્વકમ્

દ્વન્દ્વમેલોપલિપ્તાયાં મૂષાયાં તદ્વિનિક્ષિપેત્ ।
તસ્મિન્દ્રુતે સિદ્ધચૂર્ણં સ્વર્ણાદ્દશગુણં ક્ષિપેત્

યાવત્સ્વર્ણાવશેષં સ્યાત્તાવદ્દ્રાવ્યં શનૈઃ શનૈઃ ।
હેમબીજમ્ ઇદં ખ્યાતં શ્રેષ્ઠં રસરસાયને

સમુખે પારદે દેવિ બીજં રસસમં ક્રમાત્ ।
જારયેત્ પૂર્વવદ્દેવિ ચતુઃષષ્ટ્યંશકાદિકમ્

એતદ્રસં હેમબીજં સમં ખલ્વે ચ તાપિતે ।
મર્દયેદ્ અમ્લવર્ગેણ ત્ર્યહાત્ પિષ્ટિર્ ભવેદ્રસઃ

પિષ્ટિં જમ્બીરજાં કૃત્વા દોલાયન્ત્રેઽમ્લપૂરિતે ।
ષડહં પાચયેદ્દેવિ સિદ્ધચૂર્ણપ્રલેપનમ્

તથા સંપુટલેપં ચ તથા ભૂધરપાચનમ્ ।
યાવત્ કઠિનતાં યાતિ તાવત્કુર્યાચ્ચ પૂર્વવત્

ઇયં તુ ઘુટિકા દિવ્યા વિખ્યાતા હેમસુન્દરી ।
વક્ત્રસ્થા સિદ્ધિદા ન્ઃણાં જરામૃત્યુવિષાપહા

પૂર્વવત્ ક્રામણં કાર્યં સૂતઃ સંક્રમતે પુનઃ ।
<5. મદનસુન્દરી ઘુટિકા>
મુખીકૃતે રસે વ્યોમબીજં હાટકબીજકમ્

સમં સમં ક્રમાજ્જાર્યં ચતુઃષષ્ટ્યંશકાદિકમ્ ।
ઇત્યેવં જારિતં સૂતં બીજં ગગનરુક્મયોઃ

મર્દયેત્ પારદસમં તપ્તખલ્વેઽમ્લવર્ગતઃ ।
ત્રિદિનાજ્જાયતે પિષ્ટિઃ પુનર્ જમ્બીરગામ્ કુરુ

દોલાયન્ત્રેઽમ્લભરિતે પચેત્તાં સપ્તવાસરમ્ ।
લેપનં સિદ્ધચૂર્ણસ્ય તથા સંપુટલેપનમ્

તથા ભૂધરપાકશ્ચ યાવત્કઠિનતાં વ્રજેત્ ।
સિદ્ધિદા ઘુટિકા હ્યેષા નામ્ના મદનસુન્દરી

આસ્યાન્તરસ્થિતા કુર્યાત્ સર્વસિદ્ધીશ્ ચિરાયુષઃ ।
વ્યાલવ્યાઘ્રગજાદીનાં રાજ્ઞાં વશ્યં સ્ત્રિયામપિ

પૂર્વવત્ ક્રામણં કાર્યં કાયમ્ આક્રામતે રસઃ ।
<6. ખેચરી ઘુટિકા>
મુખીકૃતે રસે કાન્તહેમબીજં સમં સમમ્

રસોન્મિતે પૃથક્ જાર્યં ચતુઃષષ્ટ્યંશકાદિકમ્ ।
ઇત્થં જીર્ણં રસં બીજં કાન્તહેમ્નો રસોન્મિતમ્

પૂર્વવત્ પિષ્ટિકાં કૃત્વા દોલાયન્ત્રે ચ પાચનમ્ ।
યાવત્ કઠિનતાં યાતિ તાવત્ કાર્યં મુહુર્મુહુઃ

ઘુટિકા જાયતે નામ્ના ખેચરી સર્વસિદ્ધિદા ।
પૂર્વવત્ ક્રામણં કાર્યં સુગન્ધં ગોપયઃ પિબેત્

તેન સંક્રમતે દેહં ઘુટિકાન્તર્ગતો રસઃ ।
<7. વજ્રેશ્વરી ઘુટિકા>
સમુખે પારદે વ્યોમકાન્તહેમ્નાં સમં સમમ્

બીજં પૃથક્પૃથક્ જાર્યં ચતુઃષષ્ટ્યંશકાદિકમ્ ।
ઇત્થંભૂતસ્ય સૂતસ્ય સમં વ્યોમાદિબીજકમ્

ત્રયં તાપિતખલ્વેન ત્ર્યહમમ્લેન મર્દયેત્ ।
સ સૂતઃ પિષ્ટિમ્ આપ્નોતિ તાં પિષ્ટિં પૂર્વવત્પ્રિયે

દોલાપાકં સિદ્ધચૂર્ણલેપં ભૂધરપાચનમ્ ।
યાવત્કઠિનતાં યાતિ તાવત્કાર્યમ્ અતન્દ્રિતૈઃ

વજ્રેશ્વરીતિ ઘુટિકા વક્ત્રસ્થા સર્વસિદ્ધિદા ।
પૂર્વવત્ક્રામણં કાર્યં ગાત્રં વ્યાપ્નોતિ પારદઃ

<8. મહાવજ્રેશ્વરી ઘુટિકા>
શુદ્ધં સ્વર્ણં વજ્રભસ્મ લોહચૂર્ણાભ્રસત્વકમ્ ।
એતચ્ચતુઃસમં નાગં મૂષાયાં ચાન્ધ્રિતં ધમેત્

દ્વન્દ્વમેલોપલિપ્તાયાં પુનરાદાય તં પ્રિયે ।
એકીભૂતં ચ મૂષાયાં પ્રકટં ચ ધમેત્પુનઃ

ધૌતસત્ત્વં માક્ષિકં ચ સ્વલ્પં સ્વલ્પં મુહુઃ ક્ષિપેત્ ।
વજ્રહેમાવશેષં તુ યાવત્સ્યાત્ તત ઉદ્ધરેત્

એતસ્મિન્ વ્યોમસત્વાયશ્ચૂર્ણનાગાંશ્ચ પૂર્વવત્ ।
દ્વન્દ્વમેલોપલિપ્તાયામ્ અન્ધ્રયિત્વા દૃઢં ધમેત્

એકીભૂતં સમાદાય મૂષાયાં પ્રકટં ધમેત્ ।
હેમવજ્રાવશેષં સ્યાદ્ યાવત્ તત્ પુનરાહરેત્

વ્યોમસત્વમ્ અયશ્ચૂર્ણં નાગં વાહ્યં પુનઃ પુનઃ ।
પૂર્વવત્ ક્રમયોગેન માક્ષિકં ધૌતસત્ત્વકમ્

મુહુઃ ક્ષિપ્ય ધમેત્તં તુ બાહ્યમેવં તુ ષડ્ગુણમ્ ।
વજ્રબીજમિદં શ્રેષ્ઠં જાર્યં રસરસાયને

સમુખે પારદે જાર્યં વજ્રબીજં રસોન્મિતમ્ ।
ચતુઃષષ્ટ્યંશકાદ્યં ચ ક્રમાત્ સંક્રામયેત્ પ્રિયે

ઇત્થં જારિતસૂતસ્ય સમં કુલિશબીજકમ્ ।
તપ્તખલ્વેઽમ્લવર્ગેણ મર્દયેદ્ દિવસત્રયમ્

સ પિષ્ટિર્ જાયતે સૂતસ્તાં પિષ્ટીં ચ સમાહરેત્ ।
દોલાપાકઃ સિદ્ધચૂર્ણલેપઃ સમ્પુટભૂધરમ્

કુર્વીત પૂર્વવત્ સર્વં યાવત્ કઠિનતાં વ્રજેત્ ।
મહાવજ્રેશ્વરી નામ્ના ઘુટિકા સિદ્ધિદાયિની

વક્ત્રસ્થા ક્રામણં કાર્યં પૂર્વવત્ ક્રામતે રસઃ ।
<9. વજ્રખેચરી ઘુટિકા>
મુખીકૃતે રસે વ્યોમવજ્રબીજં રસોન્મિતમ્

પૃથક્ પૃથક્ જારણીયં ચતુઃષષ્ટ્યંશકાદિકમ્ ।
અમુષ્ય જીર્ણસૂતસ્ય સમં વજ્રાભ્રબીજકમ્

તપ્તખલ્વેઽમ્લવર્ગેણ ત્રિદિનં મર્દયેદ્દૃઢમ્ ।
સ રસો જાયતે પિષ્ટિસ્તાં પુનઃ પૂર્વવત્પ્રિયે

દોલાસ્વેદં સિદ્ધચૂર્ણલેપં ભૂધરપાચનમ્ ।
યાવત્ કઠિનતાં યતિ તાવદ્ એવં મુહુર્મુહુઃ

ઘુટિકા જાયતે દિવ્યા નામ્નેયં વજ્રખેચરી ।
વક્ત્રસ્થા સિદ્ધિદા નૃણાં પૂર્વવત્ ક્રામણં પ્રિયે

<10. કાલવિધ્વંસિની ઘુટિકા>
મુખીકૃતે રસે કાન્તવજ્રબીજં રસોન્મિતમ્ ।
પૃથક્પૃથગ્ જારણીયં ચતુઃષષ્ટ્યંશકાદિકમ્

અસ્ય જીર્ણસ્ય સૂતસ્ય સમં કુલિશકાન્તયોઃ ।
બીજં સંતપ્તખલ્વે ઽમ્લવર્ગે મર્દ્યં દિનત્રયમ્

પિષ્ટિર્ ભવત્યેષ સૂતઃ પિષ્ટિં તાં પુનરાહરેત્ ।
દોલાસ્વેદઃ સિદ્ધચૂર્ણલેપઃ સંપુટભૂધરમ્

યાવત્ કઠિનતાં યાતિ તાવદેવં મુહુર્મુહુઃ ।
કાલવિધ્વંસિની નામ્ના ઘુટિકા જાયતે શુભા

મુખસ્થા સિદ્ધિદા દિવ્યા પૂર્વવત્ ક્રામણં પિબેત્ ।
<11. ગગનેશ્વરી ઘુટિકા>
મુખીકૃતે સૂતરાજે વજ્રકાન્તાભ્રબીજકમ્

પૃથક્પૃથક્સૂતરાજે ચતુઃષષ્ટ્યંશકાદિકમ્ ।
રસસ્ય તસ્ય સદૃશં વજ્રબીજાભ્રબીજકમ્

તપ્તખલ્વેઽમ્લવર્ગેણ ત્ર્યહાત્ પિષ્ટિઃ સુમર્દનાત્ ।
દોલાપાકઃ સિદ્ધચૂર્ણલેપઃ સંપુટભૂધરમ્

યાવત્ કઠિનતાં યાતિ તાવત્ કુર્યાન્મુહુર્મુહુઃ ।
ગગનેશ્વરીયં ઘુટિકા વક્ત્રસ્થા સર્વસિદ્ધિદા

પૂર્વવત્ ક્રામણં કાર્યં દેહે ક્રામતિ સૂતકઃ ।
<12. વજ્રઘણ્ટેશ્વરી ઘુટિકા>
મુખીકૃતે સૂતરાજે બીજં વજ્રસુવર્ણયોઃ

પૃથક્પૃથક્સમં જાર્યં ચતુઃષષ્ટ્યંશકાદિકમ્ ।
અસ્ય સૂતસ્ય સદૃશં હેમ્નો વજ્રસ્ય બીજકમ્

તપ્તખલ્વેઽમ્લવર્ગેણ ત્ર્યહાત્ પિષ્ટિર્ ભવેદ્રસઃ ।
તાં પિષ્ટિં પુનરાદાય પૂર્વવત્ પરિકલ્પયેત્

દોલાપાકં સિદ્ધચૂર્ણલેપં ભૂધરપાચનમ્ ।
યાવત્ કઠિનતાં યાતિ તાવત્ કુર્યાન્મુહુર્મુહુઃ

વજ્રઘણ્ટેશ્વરી હ્યેષા ઘુટિકા સિદ્ધિદાયિની ।
મુખસ્થા સિદ્ધિદા દિવ્યા પૂર્વોક્તં ક્રામણં પિબેત્

<13. વજ્રભૈરવી ઘુટિકા>
મુખીકૃતે સૂતરાજે હેમવજ્રાભ્રબીજકમ્ ।
પૃથક્પૃથક્સમં જાર્યં ચતુઃષષ્ટ્યંશકાદિકમ્

અસ્ય સૂતસ્ય સદૃશં હેમવજ્રાભ્રબીજકમ્ ।
મર્દયેદ્ અમ્લવર્ગેણ તપ્તખલ્વે દિનત્રયમ્

પિષ્ટિર્ભવેત્ પુનસ્તાં ચ સમાદાય તતઃ પ્રિયે ।
દોલાપાકં સિદ્ધચૂર્ણલેપં ભૂધરપાચનમ્

યાવત્ કઠિનતામેતિ તાવત્કાર્યં મુહુર્મુહુઃ ।
ઘુટિકા જાયતે દિવ્યા નામ્નેયં વજ્રભૈરવી

મુખસ્થિતા સિદ્ધકરી ક્રામણં પૂર્વવત્પ્રિયે ।
<14. ત્રિપુરભૈરવી ઘુટિકા>
મુખીકૃતે રસે કાન્તવજ્રહાટકબીજકમ્

જાર્યં પૃથક્સૂતસમં ચતુઃષષ્ટ્યંશકાદિકમ્ ।
જીર્ણસૂતસમં કાન્તવજ્રકાઞ્ચનબીજકમ્

તપ્તખલ્વેઽમ્લવર્ગેણ મર્દયેદ્દિવસત્રયમ્ ।
જાયતે પારદઃ પિષ્ટિઃ પૂર્વવત્તાં સમાહરેત્

દોલાપાકં સિદ્ધચૂર્ણલેપં ભૂધરપાચનમ્ ।
યાવત્ કઠિનતામ્ એતિ તાવત્કાર્યં મુહુર્મુહુઃ

ઘુટિકા જાયતે દિવ્યા નામ્ના ત્રિપુરભૈરવી ।
મુખસ્થા સિદ્ધિદા હ્યેષા પૂર્વવત્ ક્રામણં પ્રિયે

<15. મહાભૈરવી ઘુટિકા>
મુખીકૃતે રસે કાન્તવજ્રાભ્રસ્વર્ણબીજકમ્ ।
પૃથક્સૂતસમં જાર્યં ચતુઃષષ્ટ્યંશકાદિકમ્

અસ્ય સૂતસ્ય જીર્ણસ્ય સમં વ્યોમાદિબીજકમ્ ।
મર્દયેદ્ અમ્લવર્ગેણ તપ્તખલ્વે દિનત્રયમ્

પિષ્ટિર્ ભવતિ સૂતેન્દ્રસ્તાં પિષ્ટિં પુનરાહરેત્ ।
દોલાપાકં સિદ્ધચૂર્ણલેપં સંપુટભૂધરે

યાવત્ કઠિનતામેતિ તાવત્કાર્યં મુહુર્મુહુઃ ।
નામ્ના મહાભૈરવીયં ઘુટિકા સર્વસિદ્ધિદા

ધારયેન્મુખમધ્યે તત્ પૂર્વવત્ ક્રામણં પિબેત્ ।
<ક્રામણાનિ>
ત્રિફલા મુસલી મુણ્ડી ભૃઙ્ગરાજશ્ચ વાકુચી

નીલી કન્યા કાકમાચી હયગન્ધા શતાવરી ।
ઉત્તરા વારુણી દેવદાલી ચિત્રા પુનર્નવા

નિર્ગુણ્ડી સહદેવી ચ રુદન્તી ગજકર્ણિકા ।
ભૂતાવરાતભલ્લાતકાકતુણ્ડામૃતાલતાઃ

પલાશઃ કુક્કુરૂટશ્ચ ધાત્રીફલરસઃ પયઃ ।
પલાશબીજકં તૈલં ઘૃતં મધુ શિવામ્બુ ચ

બિલ્વમજ્જા ચ તૈલં ચ તૈલં જ્યોતિષ્મતીભવમ્ ।
એતાનિ ક્રામણાર્હાણિ ચૌષધાનિ ભવન્તિ હિ

એતે ચાષ્ટાર્ધગદિતાઃ ક્રામણાર્થે પ્રયોગતઃ ।
રસભસ્મપ્રયોગે ચ ઘુટિકાનાં રસાયને

<પઞ્ચદશઘુટિકાફલમ્>
પ્રિયે પઞ્ચદશાનાં ચ ઘુટિકાનાં ફલં શૃણુ ।
અભ્રબીજેન રચિતઘુટિકા રસસંયુતા

મુખસ્થિતા દ્વાદશાબ્દં સર્વરોગવિનાશની ।
સ જીવેદ્વત્સરશતં પુમાંશ્ચ પરમેશ્વરિ

કાન્તબીજેન રચિતા ઘુટિકા રસસંયુતા ।
આસ્યસ્થા સર્વરોગઘ્ની દ્વાદશાબ્દં વરાનને

ધાતુદાર્ઢ્યપ્રજનની સહસ્રાયુષ્યદાયિની ।
કાન્તાભ્રબીજરચિતા રસયુગ્ઘુટિકા શુભા

દ્વાદશાબ્દં મુખાન્તસ્થા જરામયવિનાશિની ।
અયુતાયુષ્યદા દિવ્યા મહાબલવિવર્ધિની

હેમબીજયુતા સૂતઘુટિકા મુખમધ્યગા ।
આ દ્વાદશાબ્દં દેહસ્ય વલીપલિતરોગહા

આયુષ્યપ્રદા પુણ્યા નાગાયુતબલપ્રદા ।
હેમાભ્રબીજઘટિતા ઘુટિકા યુક્તપારદા

વક્ત્રાસ્થિતાર્કસંખ્યાબ્દં દશલક્ષાબ્દજીવદા ।
દિવ્યબુદ્ધિપ્રજનની દિવ્યસત્વપ્રદાયિની

કાન્તકાઞ્ચનબીજાભ્યાં સસૂતા ઘુટિકા કૃતા ।
દ્વાદશાબ્દં મુખાન્તા કોટ્યાયુષ્યવિવર્ધિની

મહાતેજઃપ્રજનની બિલનિધ્યાદિદર્શિની ।
કાન્તાભ્રહેમઘટિતા ઘુટિકા રસસંયુતા

મુખસ્થા દ્વાદશાબ્દાન્તાદ્ દશકોટ્યબ્દજીવદા ।
હાલાહલાદિસંવર્તખેચરત્વપ્રદાયિની

નિર્મુક્તવજ્રબીજેન રસયુગ્ઘુટિકા શુભા ।
મુખસ્થા દ્વાદશાબ્દાન્તં સર્વલોકગતિપ્રદા

યાવદ્ભૂમિઃ સ્થિરતરા તાવદાયુઃપ્રવર્ધિની ।
તરુણઃ સર્વદા કામઃ કાન્તાનાં સુરતક્ષમઃ

વજ્રાભ્રબીજરચિતા ઘુટિકા રસગર્ભિતા ।
ઘુટિકા રસસંખ્યાબ્દં મુખસ્થા સર્વસિદ્ધિદા

બ્રહ્માયુષ્યપ્રદા પુંસાં જગત્ સૃષ્ટું ક્રમાત્ પ્રભુઃ ।
પૂજ્યતે બ્રહ્મવદ્દેવૈર્ વેદવેદાઙ્ગપારગઃ

સરસ્વત્યા ચ સાવિત્ર્યા સેવ્યતે સર્વલોકગઃ ।
અષ્ટાભિઃ સિદ્ધિભિર્ યુક્તો હ્યણિમાદિભિર્ ઈશ્વરિ

વજ્રકાઞ્ચનબીજેન સસૂતા ઘુટિકા કૃતા ।
મુખસ્થા દ્વાદશાબ્દાન્તં વિષ્ણ્વાયુષ્યપ્રદા નૃણામ્

સ ચ વિષ્ણુત્વમાપ્નોતિ વિષ્ણુવત્ પાલિતું ક્ષમઃ ।
સેવ્યતે સનકાદ્યૈશ્ચ શ્રિયા યુક્તો મહાબલઃ

સ્વેચ્છાગતિર્ મહેન્દ્રાદ્યૈર્ નિર્જરૈઃ સેવ્યતે સદા ।
હેમાભ્રવજ્રબીજેન રચિતા ઘુટિકા પ્રિયે

સપારદા મુખાન્તઃસ્થા દ્વાદશાબ્દં વરાનને ।
રુદ્રાયુષ્પ્રદા ન્ઃણાં રુદ્રત્વં સા દદાતિ હિ

સંહર્તા રુદ્રવલ્લોકં વિષ્ણ્વિન્દ્રાદ્યૈશ્ચ સેવ્યતે ।
અણિમાદ્યૈશ્ચ સહિતઃ સર્વજ્ઞઃ સર્વલોકગઃ

સેવ્યતે પ્રમથશ્રેષ્ઠૈર્ દિવ્યશક્ત્યા સમન્વિતઃ ।
યોગીન્દ્રૈર્ ધ્યાયતે ધીરો મહાતેજા મહાબલઃ

કાન્તકાઞ્ચનવજ્રાણાં બીજૈઃ સૂતયુતા કૃતા ।
ઘુટિકા ભાનુસંખ્યાબ્દં મુખસ્થા સિદ્ધિદા નૃણામ્

ઈશ્વરાયુષ્યમાપ્નોતિ ખેચરત્વં ચ માનવઃ ।
તિરોધત્તે સ્વયં લોકાદ્બ્રહ્મેન્દ્રાદ્યભિવન્દિતઃ

કોટિસૂર્યપ્રતીકાશો મહામારુતસત્ત્વવાન્ ।
મહાકલ્પાન્તકાલેઽપિ વિનાશં ન વ્રજેદ્ધ્રુવમ્

યોગક્રીડાનુષક્તાત્મા ધ્યાયતે યોગવિત્તમૈઃ ।
કાન્તાભ્રહેમવજ્રાણાં કૃતા બીજૈ રસાત્મિકા

ઘુટિકા રવિસંખ્યાબ્દવક્ત્રસ્થા યસ્ય ભૈરવિ ।
સદાશિવાયુઃ સ ભવેત્ સર્વાનુગ્રાહકઃ પ્રભુઃ

સદાશિવત્વમ્ આપ્નોતિ દેવાનામધિપસ્તથા ।
વહ્નૌ વહ્નિર્ જલે વારિ મારુતે મારુતાત્મકઃ

પૃથિવ્યાં પૃથિવીરૂપઃ શૂન્યે શૂન્યાત્મકો ભવેત્ ।
તસ્યાક્ષિણીન્દુવહ્ન્યર્કા બ્રહ્મેન્દ્રાદ્યાશ્ચ સેવકાઃ

ગાયકા નારદાદ્યાશ્ચ નર્તક્યશ્ચાપ્સરોઽઙ્ગનાઃ ।
તદાજ્ઞયૈવ બ્રહ્મેન્દ્રાઃ સૃષ્ટિસ્થિતિવિનાશકાઃ

સચ્ચિદાનન્દકઃ શક્તઃ સર્વગઃ સર્વવિચ્છિવઃ ।
પરાશક્તિયુતઃ પુણ્યો નિર્માયો નિષ્કલઃ પરમ્

એવં ગુણાઃ પ્રકથિતા ઘુટિકાનાં મયા પ્રિયે ।
શસ્ત્રસ્તમ્ભકરશ્ચાસાં સર્વાસામ્ અપિ વિદ્યતે

રસાયનસ્ય સર્વસ્ય સિદ્ધિદોઽયં મહેશ્વરિ ।
<ઘુટિકાસિદ્ધૌ મન્ત્રપ્રયોગઃ>
વક્ષ્યતે મન્ત્રરાજોઽયં સર્વસિદ્ધિપ્રદાયકઃ

ઐં હ્રીં શ્રીં ક્લીં સૌઃ અમૃતેશ્વરભૈરવ અમૃતં કુરુ અમૃતેશ્વરભૈરવાય હું ।
સૌઃ ક્લીં શ્રીં હ્રીં ઐં હું ફટ્ સ્વાહા ।
સૌઃ ક્લીં શ્રીં હ્રીં ઐં ।
પુમાનનેન મન્ત્રેણ શીઘ્રં સિદ્ધિમવાપ્નુયાત્