Ānandakanda · Chapter 1.10

Āk, 1, 10
<ghuṭikāsiddhiḥ>
praṇamya parayā bhaktyā bhairavaṃ bhairavī śivam /
uvāca vinayenedaṃ lokānāṃ hitakāṃkṣiṇī

śrībhairavī /
devadeva kṛpāmūrte sarvānugrāhaka prabho /
tvatprasādānmayā jñātaṃ rahasyam atidurlabham

kāntābhrahemakuliśarasabhasma rasāyanam /
ataḥ paraṃ mahādeva śrotumicchāmi bhairava

etair ghanādyai racitaghuṭikānāṃ rasāyanam /
śrutvā savinayaṃ vākyaṃ bhairavyāstvādibhairavaḥ

sthitvetyuvāca vacanaṃ tadvakṣyāmi rasāyanam /
śrībhairavaḥ /
<1. sañjīvanī ghuṭikā>
śṛṇu pārvati yatnena sāvadhānena sāmpratam

prathamaṃ jāraṇaṃ kāryaṃ paścātpāradabandhanam /
tasmājjāraṇabījāni ghanādīnāṃ vadāmi te

gandhatālaśilātutthakharparīhiṅgulāmalāḥ /
bhūnāgatāpyakāsīsanṛpāvartābhragairikam

kāntatrikṣāravaikrāntāstvete cūrṇasamāṃśakaḥ /
siddhacūrṇamidaṃ khyātaṃ śreṣṭhaṃ syād bījakarmaṇi

dvandvamelopaliptāyāṃ mūṣāyāṃ nikṣipetpriye /
kṛṣṇasatvābhrasatvaṃ ca drāvayetsamaśulbakam

samitrapañcakaṃ tasminsiddhacūrṇaṃ muhurmuhuḥ /
ghanāddaśaguṇaṃ kṣepyaṃ dhamedgāḍhaṃ varānane

ghanasatvāvaśiṣṭaṃ syāddhamanīyaṃ ca tāvatā /
kālenedaṃ vyomasatvabījaṃ jāryaṃ rasāyane

samukhe pārade bījaṃ catuḥṣaṣṭyaṃśake kṣipet /
taptakhalve'mlavargeṇa mardayed divasatrayam

taṃ sūtaṃ kacchape yantre sabiḍe jārayetpriye /
tato dvātriṃśadaṃśaṃ ca ṣoḍaśāṃśaṃ rasasya tu

aṣṭamāṃśaṃ caturthāṃśaṃ dvyaṃśaṃ caiva samāṃśakam /
pārade jārayedevaṃ kramādbījaṃ sureśvari

sūtamevaṃvidhaṃ vyomasatvaṃ bījasamaṃ priye /
taptakhalve'mlavargeṇa mardayedekavāsaram

piṣṭiṃ pāradarājaṃ taṃ jambīrāntarvinikṣipet /
dolāyantre'mlayukte taṃ vipacetsaptavāsaram

tamādāya baliṃ kṣiptvā siddhacūrṇena pārvati /
tatastaṃ bhūdhare yantre pacellaghupuṭena ca

yāvatkaṭhinatāṃ yāti tāvatkāryaṃ muhurmuhuḥ /
dolāpākaṃ siddhacūrṇalepaṃ bhūdharake puṭam

mṛtasañjīvanī nāmnā ghuṭikā sarvasiddhidā /
vaktrāntare gale mūrdhni bāhau karṇe'thavā vahet

hemnā suveṣṭitā samyagvalīpalitanāśinī /
vaktrasthā mṛtyuhā varṣādviṣavigrahanāśinī

śuddhaṃ gandhaṃ karṣamātraṃ gavyaṃ kṣīraṃ palaṃ pibet /
anena kramaṇenaiva sūtaḥ saṃkramate tanum

<2. divyā ghuṭikā>
kāntamlecchamukhaṃ rūpyaṃ liptamūṣāntare samam /
drāvayitvā siddhacūrṇaṃ kāntāddaśaguṇaṃ śanaiḥ

vahenmuhurmuhurdrāvyaṃ yāvatkānto'vaśiṣyate /
kāntabījamidaṃ proktaṃ śreṣṭhaṃ jāryaṃ rasāyane

samukhe pārade cedaṃ bījaṃ cāryaṃ ca pūrvavat /
catuḥṣaṣṭyaṃśakaṃ pūrvaṃ samāṃśaṃ taṃ krameṇa vai

evaṃvidhaṃ sūtarājaṃ kāntabījaṃ dvayaṃ samam /
mardayettaptakhalve ca sāmlavarge dinatrayam

piṣṭībhūtaṃ ca jambīre kṣiptvāmlagaṇapūrite /
dolāyantre pacetsamyagevam ā saptavārakam

tamādāya lihedbāhye siddhacūrṇena bhairavi /
tato divyauṣadhairlipte saṃpuṭe bhūdhare pacet

yāvatkaṭhinatāṃ yāti tāvatkuryātkrameṇa ca /
dolāpākaṃ siddhacūrṇalepaṃ bhūdharapācanam

puṭe tau jārayed divyanāmnātha parameśvari /
vaktrāntare gale mūrdhni bāhau karṇe'thavā vahet

hemnā suveṣṭitaṃ dhāryaṃ valīpalitanāśanam /
pūrvavatphaladā puṇyā dhāryā yatnena mānavaiḥ

pūrvavatkrāmaṇaṃ kāryaṃ dehe saṃkramate rasaḥ /
<3. kāmeśvarī ghuṭikā>
samukhe pārade vyomakāntabījaṃ ca mārayet

pratyekaṃ pāradasamaṃ pūrvavacca śanaiḥ śanaiḥ /
catuḥṣaṣṭyaṃśakaṃ cādau samāṃśaṃ taṃ kramādrase

asya sūtasya tulyāṃśaṃ kāntabījābhrabījakam /
taptakhalve'mlavargeṇa mardayedvāsaratrayam

piṣṭīkṛtaṃ ca jambīre kṣiptvā dolāgataṃ pacet /
punarādāya tāṃ piṣṭiṃ siddhacūrṇena lepayet

divyauṣadhigaṇairlipte saṃpuṭe bhūdhare pacet /
yadā kaṭhinatāṃ yāti dvidhā kuryātkrameṇa tu

dolāsvedaṃ cūrṇalepaṃ kṛtvā bhūdharapācanam /
kāmeśvarīyaṃ ghuṭikā vaktrasthā sarvasiddhidā

pūrvavatkrāmaṇaṃ kāryaṃ rasendraḥ krāmate tanum /
<4. hemasundarī ghuṭikā>
svarṇaṃ rūpyaṃ mlecchamukhaṃ kāntasatvābhrasatvakam

dvandvamelopaliptāyāṃ mūṣāyāṃ tadvinikṣipet /
tasmindrute siddhacūrṇaṃ svarṇāddaśaguṇaṃ kṣipet

yāvatsvarṇāvaśeṣaṃ syāttāvaddrāvyaṃ śanaiḥ śanaiḥ /
hemabījam idaṃ khyātaṃ śreṣṭhaṃ rasarasāyane

samukhe pārade devi bījaṃ rasasamaṃ kramāt /
jārayet pūrvavaddevi catuḥṣaṣṭyaṃśakādikam

etadrasaṃ hemabījaṃ samaṃ khalve ca tāpite /
mardayed amlavargeṇa tryahāt piṣṭir bhavedrasaḥ

piṣṭiṃ jambīrajāṃ kṛtvā dolāyantre'mlapūrite /
ṣaḍahaṃ pācayeddevi siddhacūrṇapralepanam

tathā saṃpuṭalepaṃ ca tathā bhūdharapācanam /
yāvat kaṭhinatāṃ yāti tāvatkuryācca pūrvavat

iyaṃ tu ghuṭikā divyā vikhyātā hemasundarī /
vaktrasthā siddhidā nḥṇāṃ jarāmṛtyuviṣāpahā

pūrvavat krāmaṇaṃ kāryaṃ sūtaḥ saṃkramate punaḥ /
<5. madanasundarī ghuṭikā>
mukhīkṛte rase vyomabījaṃ hāṭakabījakam

samaṃ samaṃ kramājjāryaṃ catuḥṣaṣṭyaṃśakādikam /
ityevaṃ jāritaṃ sūtaṃ bījaṃ gaganarukmayoḥ

mardayet pāradasamaṃ taptakhalve'mlavargataḥ /
tridinājjāyate piṣṭiḥ punar jambīragām kuru

dolāyantre'mlabharite pacettāṃ saptavāsaram /
lepanaṃ siddhacūrṇasya tathā saṃpuṭalepanam

tathā bhūdharapākaśca yāvatkaṭhinatāṃ vrajet /
siddhidā ghuṭikā hyeṣā nāmnā madanasundarī

āsyāntarasthitā kuryāt sarvasiddhīś cirāyuṣaḥ /
vyālavyāghragajādīnāṃ rājñāṃ vaśyaṃ striyāmapi

pūrvavat krāmaṇaṃ kāryaṃ kāyam ākrāmate rasaḥ /
<6. khecarī ghuṭikā>
mukhīkṛte rase kāntahemabījaṃ samaṃ samam

rasonmite pṛthak jāryaṃ catuḥṣaṣṭyaṃśakādikam /
itthaṃ jīrṇaṃ rasaṃ bījaṃ kāntahemno rasonmitam

pūrvavat piṣṭikāṃ kṛtvā dolāyantre ca pācanam /
yāvat kaṭhinatāṃ yāti tāvat kāryaṃ muhurmuhuḥ

ghuṭikā jāyate nāmnā khecarī sarvasiddhidā /
pūrvavat krāmaṇaṃ kāryaṃ sugandhaṃ gopayaḥ pibet

tena saṃkramate dehaṃ ghuṭikāntargato rasaḥ /
<7. vajreśvarī ghuṭikā>
samukhe pārade vyomakāntahemnāṃ samaṃ samam

bījaṃ pṛthakpṛthak jāryaṃ catuḥṣaṣṭyaṃśakādikam /
itthaṃbhūtasya sūtasya samaṃ vyomādibījakam

trayaṃ tāpitakhalvena tryahamamlena mardayet /
sa sūtaḥ piṣṭim āpnoti tāṃ piṣṭiṃ pūrvavatpriye

dolāpākaṃ siddhacūrṇalepaṃ bhūdharapācanam /
yāvatkaṭhinatāṃ yāti tāvatkāryam atandritaiḥ

vajreśvarīti ghuṭikā vaktrasthā sarvasiddhidā /
pūrvavatkrāmaṇaṃ kāryaṃ gātraṃ vyāpnoti pāradaḥ

<8. mahāvajreśvarī ghuṭikā>
śuddhaṃ svarṇaṃ vajrabhasma lohacūrṇābhrasatvakam /
etaccatuḥsamaṃ nāgaṃ mūṣāyāṃ cāndhritaṃ dhamet

dvandvamelopaliptāyāṃ punarādāya taṃ priye /
ekībhūtaṃ ca mūṣāyāṃ prakaṭaṃ ca dhametpunaḥ

dhautasattvaṃ mākṣikaṃ ca svalpaṃ svalpaṃ muhuḥ kṣipet /
vajrahemāvaśeṣaṃ tu yāvatsyāt tata uddharet

etasmin vyomasatvāyaścūrṇanāgāṃśca pūrvavat /
dvandvamelopaliptāyām andhrayitvā dṛḍhaṃ dhamet

ekībhūtaṃ samādāya mūṣāyāṃ prakaṭaṃ dhamet /
hemavajrāvaśeṣaṃ syād yāvat tat punarāharet

vyomasatvam ayaścūrṇaṃ nāgaṃ vāhyaṃ punaḥ punaḥ /
pūrvavat kramayogena mākṣikaṃ dhautasattvakam

muhuḥ kṣipya dhamettaṃ tu bāhyamevaṃ tu ṣaḍguṇam /
vajrabījamidaṃ śreṣṭhaṃ jāryaṃ rasarasāyane

samukhe pārade jāryaṃ vajrabījaṃ rasonmitam /
catuḥṣaṣṭyaṃśakādyaṃ ca kramāt saṃkrāmayet priye

itthaṃ jāritasūtasya samaṃ kuliśabījakam /
taptakhalve'mlavargeṇa mardayed divasatrayam

sa piṣṭir jāyate sūtastāṃ piṣṭīṃ ca samāharet /
dolāpākaḥ siddhacūrṇalepaḥ sampuṭabhūdharam

kurvīta pūrvavat sarvaṃ yāvat kaṭhinatāṃ vrajet /
mahāvajreśvarī nāmnā ghuṭikā siddhidāyinī

vaktrasthā krāmaṇaṃ kāryaṃ pūrvavat krāmate rasaḥ /
<9. vajrakhecarī ghuṭikā>
mukhīkṛte rase vyomavajrabījaṃ rasonmitam

pṛthak pṛthak jāraṇīyaṃ catuḥṣaṣṭyaṃśakādikam /
amuṣya jīrṇasūtasya samaṃ vajrābhrabījakam

taptakhalve'mlavargeṇa tridinaṃ mardayeddṛḍham /
sa raso jāyate piṣṭistāṃ punaḥ pūrvavatpriye

dolāsvedaṃ siddhacūrṇalepaṃ bhūdharapācanam /
yāvat kaṭhinatāṃ yati tāvad evaṃ muhurmuhuḥ

ghuṭikā jāyate divyā nāmneyaṃ vajrakhecarī /
vaktrasthā siddhidā nṛṇāṃ pūrvavat krāmaṇaṃ priye

<10. kālavidhvaṃsinī ghuṭikā>
mukhīkṛte rase kāntavajrabījaṃ rasonmitam /
pṛthakpṛthag jāraṇīyaṃ catuḥṣaṣṭyaṃśakādikam

asya jīrṇasya sūtasya samaṃ kuliśakāntayoḥ /
bījaṃ saṃtaptakhalve 'mlavarge mardyaṃ dinatrayam

piṣṭir bhavatyeṣa sūtaḥ piṣṭiṃ tāṃ punarāharet /
dolāsvedaḥ siddhacūrṇalepaḥ saṃpuṭabhūdharam

yāvat kaṭhinatāṃ yāti tāvadevaṃ muhurmuhuḥ /
kālavidhvaṃsinī nāmnā ghuṭikā jāyate śubhā

mukhasthā siddhidā divyā pūrvavat krāmaṇaṃ pibet /
<11. gaganeśvarī ghuṭikā>
mukhīkṛte sūtarāje vajrakāntābhrabījakam

pṛthakpṛthaksūtarāje catuḥṣaṣṭyaṃśakādikam /
rasasya tasya sadṛśaṃ vajrabījābhrabījakam

taptakhalve'mlavargeṇa tryahāt piṣṭiḥ sumardanāt /
dolāpākaḥ siddhacūrṇalepaḥ saṃpuṭabhūdharam

yāvat kaṭhinatāṃ yāti tāvat kuryānmuhurmuhuḥ /
gaganeśvarīyaṃ ghuṭikā vaktrasthā sarvasiddhidā

pūrvavat krāmaṇaṃ kāryaṃ dehe krāmati sūtakaḥ /
<12. vajraghaṇṭeśvarī ghuṭikā>
mukhīkṛte sūtarāje bījaṃ vajrasuvarṇayoḥ

pṛthakpṛthaksamaṃ jāryaṃ catuḥṣaṣṭyaṃśakādikam /
asya sūtasya sadṛśaṃ hemno vajrasya bījakam

taptakhalve'mlavargeṇa tryahāt piṣṭir bhavedrasaḥ /
tāṃ piṣṭiṃ punarādāya pūrvavat parikalpayet

dolāpākaṃ siddhacūrṇalepaṃ bhūdharapācanam /
yāvat kaṭhinatāṃ yāti tāvat kuryānmuhurmuhuḥ

vajraghaṇṭeśvarī hyeṣā ghuṭikā siddhidāyinī /
mukhasthā siddhidā divyā pūrvoktaṃ krāmaṇaṃ pibet

<13. vajrabhairavī ghuṭikā>
mukhīkṛte sūtarāje hemavajrābhrabījakam /
pṛthakpṛthaksamaṃ jāryaṃ catuḥṣaṣṭyaṃśakādikam

asya sūtasya sadṛśaṃ hemavajrābhrabījakam /
mardayed amlavargeṇa taptakhalve dinatrayam

piṣṭirbhavet punastāṃ ca samādāya tataḥ priye /
dolāpākaṃ siddhacūrṇalepaṃ bhūdharapācanam

yāvat kaṭhinatāmeti tāvatkāryaṃ muhurmuhuḥ /
ghuṭikā jāyate divyā nāmneyaṃ vajrabhairavī

mukhasthitā siddhakarī krāmaṇaṃ pūrvavatpriye /
<14. tripurabhairavī ghuṭikā>
mukhīkṛte rase kāntavajrahāṭakabījakam

jāryaṃ pṛthaksūtasamaṃ catuḥṣaṣṭyaṃśakādikam /
jīrṇasūtasamaṃ kāntavajrakāñcanabījakam

taptakhalve'mlavargeṇa mardayeddivasatrayam /
jāyate pāradaḥ piṣṭiḥ pūrvavattāṃ samāharet

dolāpākaṃ siddhacūrṇalepaṃ bhūdharapācanam /
yāvat kaṭhinatām eti tāvatkāryaṃ muhurmuhuḥ

ghuṭikā jāyate divyā nāmnā tripurabhairavī /
mukhasthā siddhidā hyeṣā pūrvavat krāmaṇaṃ priye

<15. mahābhairavī ghuṭikā>
mukhīkṛte rase kāntavajrābhrasvarṇabījakam /
pṛthaksūtasamaṃ jāryaṃ catuḥṣaṣṭyaṃśakādikam

asya sūtasya jīrṇasya samaṃ vyomādibījakam /
mardayed amlavargeṇa taptakhalve dinatrayam

piṣṭir bhavati sūtendrastāṃ piṣṭiṃ punarāharet /
dolāpākaṃ siddhacūrṇalepaṃ saṃpuṭabhūdhare

yāvat kaṭhinatāmeti tāvatkāryaṃ muhurmuhuḥ /
nāmnā mahābhairavīyaṃ ghuṭikā sarvasiddhidā

dhārayenmukhamadhye tat pūrvavat krāmaṇaṃ pibet /
<krāmaṇāni>
triphalā musalī muṇḍī bhṛṅgarājaśca vākucī

nīlī kanyā kākamācī hayagandhā śatāvarī /
uttarā vāruṇī devadālī citrā punarnavā

nirguṇḍī sahadevī ca rudantī gajakarṇikā /
bhūtāvarātabhallātakākatuṇḍāmṛtālatāḥ

palāśaḥ kukkurūṭaśca dhātrīphalarasaḥ payaḥ /
palāśabījakaṃ tailaṃ ghṛtaṃ madhu śivāmbu ca

bilvamajjā ca tailaṃ ca tailaṃ jyotiṣmatībhavam /
etāni krāmaṇārhāṇi cauṣadhāni bhavanti hi

ete cāṣṭārdhagaditāḥ krāmaṇārthe prayogataḥ /
rasabhasmaprayoge ca ghuṭikānāṃ rasāyane

<pañcadaśaghuṭikāphalam>
priye pañcadaśānāṃ ca ghuṭikānāṃ phalaṃ śṛṇu /
abhrabījena racitaghuṭikā rasasaṃyutā

mukhasthitā dvādaśābdaṃ sarvarogavināśanī /
sa jīvedvatsaraśataṃ pumāṃśca parameśvari

kāntabījena racitā ghuṭikā rasasaṃyutā /
āsyasthā sarvarogaghnī dvādaśābdaṃ varānane

dhātudārḍhyaprajananī sahasrāyuṣyadāyinī /
kāntābhrabījaracitā rasayugghuṭikā śubhā

dvādaśābdaṃ mukhāntasthā jarāmayavināśinī /
ayutāyuṣyadā divyā mahābalavivardhinī

hemabījayutā sūtaghuṭikā mukhamadhyagā /
ā dvādaśābdaṃ dehasya valīpalitarogahā

āyuṣyapradā puṇyā nāgāyutabalapradā /
hemābhrabījaghaṭitā ghuṭikā yuktapāradā

vaktrāsthitārkasaṃkhyābdaṃ daśalakṣābdajīvadā /
divyabuddhiprajananī divyasatvapradāyinī

kāntakāñcanabījābhyāṃ sasūtā ghuṭikā kṛtā /
dvādaśābdaṃ mukhāntā koṭyāyuṣyavivardhinī

mahātejaḥprajananī bilanidhyādidarśinī /
kāntābhrahemaghaṭitā ghuṭikā rasasaṃyutā

mukhasthā dvādaśābdāntād daśakoṭyabdajīvadā /
hālāhalādisaṃvartakhecaratvapradāyinī

nirmuktavajrabījena rasayugghuṭikā śubhā /
mukhasthā dvādaśābdāntaṃ sarvalokagatipradā

yāvadbhūmiḥ sthiratarā tāvadāyuḥpravardhinī /
taruṇaḥ sarvadā kāmaḥ kāntānāṃ suratakṣamaḥ

vajrābhrabījaracitā ghuṭikā rasagarbhitā /
ghuṭikā rasasaṃkhyābdaṃ mukhasthā sarvasiddhidā

brahmāyuṣyapradā puṃsāṃ jagat sṛṣṭuṃ kramāt prabhuḥ /
pūjyate brahmavaddevair vedavedāṅgapāragaḥ

sarasvatyā ca sāvitryā sevyate sarvalokagaḥ /
aṣṭābhiḥ siddhibhir yukto hyaṇimādibhir īśvari

vajrakāñcanabījena sasūtā ghuṭikā kṛtā /
mukhasthā dvādaśābdāntaṃ viṣṇvāyuṣyapradā nṛṇām

sa ca viṣṇutvamāpnoti viṣṇuvat pālituṃ kṣamaḥ /
sevyate sanakādyaiśca śriyā yukto mahābalaḥ

svecchāgatir mahendrādyair nirjaraiḥ sevyate sadā /
hemābhravajrabījena racitā ghuṭikā priye

sapāradā mukhāntaḥsthā dvādaśābdaṃ varānane /
rudrāyuṣpradā nḥṇāṃ rudratvaṃ sā dadāti hi

saṃhartā rudravallokaṃ viṣṇvindrādyaiśca sevyate /
aṇimādyaiśca sahitaḥ sarvajñaḥ sarvalokagaḥ

sevyate pramathaśreṣṭhair divyaśaktyā samanvitaḥ /
yogīndrair dhyāyate dhīro mahātejā mahābalaḥ

kāntakāñcanavajrāṇāṃ bījaiḥ sūtayutā kṛtā /
ghuṭikā bhānusaṃkhyābdaṃ mukhasthā siddhidā nṛṇām

īśvarāyuṣyamāpnoti khecaratvaṃ ca mānavaḥ /
tirodhatte svayaṃ lokādbrahmendrādyabhivanditaḥ

koṭisūryapratīkāśo mahāmārutasattvavān /
mahākalpāntakāle'pi vināśaṃ na vrajeddhruvam

yogakrīḍānuṣaktātmā dhyāyate yogavittamaiḥ /
kāntābhrahemavajrāṇāṃ kṛtā bījai rasātmikā

ghuṭikā ravisaṃkhyābdavaktrasthā yasya bhairavi /
sadāśivāyuḥ sa bhavet sarvānugrāhakaḥ prabhuḥ

sadāśivatvam āpnoti devānāmadhipastathā /
vahnau vahnir jale vāri mārute mārutātmakaḥ

pṛthivyāṃ pṛthivīrūpaḥ śūnye śūnyātmako bhavet /
tasyākṣiṇīnduvahnyarkā brahmendrādyāśca sevakāḥ

gāyakā nāradādyāśca nartakyaścāpsaro'ṅganāḥ /
tadājñayaiva brahmendrāḥ sṛṣṭisthitivināśakāḥ

saccidānandakaḥ śaktaḥ sarvagaḥ sarvavicchivaḥ /
parāśaktiyutaḥ puṇyo nirmāyo niṣkalaḥ param

evaṃ guṇāḥ prakathitā ghuṭikānāṃ mayā priye /
śastrastambhakaraścāsāṃ sarvāsām api vidyate

rasāyanasya sarvasya siddhido'yaṃ maheśvari /
<ghuṭikāsiddhau mantraprayogaḥ>
vakṣyate mantrarājo'yaṃ sarvasiddhipradāyakaḥ

aiṃ hrīṃ śrīṃ klīṃ sauḥ amṛteśvarabhairava amṛtaṃ kuru amṛteśvarabhairavāya huṃ /
sauḥ klīṃ śrīṃ hrīṃ aiṃ huṃ phaṭ svāhā /
sauḥ klīṃ śrīṃ hrīṃ aiṃ /
pumānanena mantreṇa śīghraṃ siddhimavāpnuyāt