અભિસમયાલંકારવૃત્તિઃ સ્ફુટાર્થા · અધ્યાય 6

ઇતિ સંસ્કૃતાસંસ્કૃતધાત્વોરભાવત્વેન આલમ્બનોપપત્તૌ, સર્વથા નીરૂપત્વાદ્ આલમ્બનસ્વભાવાવધારણે, ભાવાભાવાનુપલમ્ભેન સર્વાકારજ્ઞતાજ્ઞાને, તથતાસ્વભાવત્વેન સંવૃતિપરમાર્થસત્યદ્વયે, દાનાદ્યનુપલમ્ભેન પ્રયોગે, બોદ્ધવ્યાભાવાદ્ બુદ્ધરત્ને, નામધેયમાત્રત્વાદ્ ધર્મરત્ને, રૂપાદ્યાલમ્બનપ્રતિષેધાત્ સંઘરત્ને, દાનાદ્યનુપલમ્ભેન ઉપાયકૌશલે, ભાવાભાવોભયરૂપાધિગમપ્રતિષેધાત્ તથાગતાભિસમયે, પ્રપઞ્ચવ્યવસ્થાપિતાનિત્યાદિત્વેન નિત્યાદિવિપર્યાસે, વિભાવિતમાર્ગફલાસાક્ષાત્કરણેન માર્ગે, હાનોપાદાનાભાવેન વિપક્ષે પ્રતિપક્ષે ચ, ધર્મ્યભાવાદ્ ધર્મલક્ષણે, સ્વસામાન્યલક્ષણાનુપપત્ત્યા ભાવનાયાઞ્ચ પરસ્પરવિરુદ્ધા ભાષાર્થાનુષ્ઠાનેન અયુજ્યમાનતયા સંશયરૂપાઃ ષોડશ વિપ્રતિપત્તીર્યથાનિર્દિષ્ટવિષયત્વેન સર્વાકારજ્ઞતાધિષ્ઠાનાઃ સર્વેષામેવ અવિદિતબોધિસત્ત્વોપાયકૌશલજનપ્રવાદિનાં યથાસમ્ભવમુભયસત્યાશ્રિતોપાયકૌશલેન નિરાકૃત્ય સમ્યક્ સર્વથા નિશ્ચયમુત્પાદ્ય કલ્યાણકામૈર્બોધિસત્ત્વૈરાનન્તર્યસમાધિરધિગમ્યત ઇતિ ।
ઇતિ અભિસમયાલઙ્કારે નામ પ્રજ્ઞાપારમિતોપદેશશાસ્ત્રે પઞ્ચમાધિકારવૃત્તિઃ ।
આનુપૂર્વિકાધિકારઃ ષષ્ઠઃ
પ્રાપ્તમૂર્ધા ઽભિસમયો વ્યસ્તસમસ્તત્વેન અધિગતાનર્થાન્ અનુપુર્વીકૃત્ય સ્થિરીકરણાય વિભાવયતીત્યનુપૂર્વાભિસમયમાહ -
દાનેન પ્રજ્ઞયા યાવદ્ બુદ્ધાદૌ સ્મૃતિભિશ્ચ સા ।
ધર્માભાવસ્વભાવેનેત્યનુપૂર્વક્રિયા મતા