અભિધર્મદીપ · શ્લોક 101-120

ત્રિદ્વીપનરકોત્પન્ના મિથ્યાત્વનિયતા અપિ ।
બહુભિઃ હ્યેકાન્નવિંશત્યા સ્વલ્પૈરષ્ટાભિરન્વિતાઃ

અન્તરાભવિકપ્રેતતિર્યક્શ્રદ્ધાનુસારિણઃ ।
ત્ર્યધિકૈર્દશભિર્યુક્તા દશભિર્વા નવાધિકૈઃ

સમ્યક્ત્વનિયતા યે તુ યે ચ શ્રદ્ધાધિમુક્તિકાઃ ।
ત એકાદશભિર્યુક્તા દશભિર્વા નવાધિકૈઃ

પ્રજ્ઞાવિમુક્તનામાર્હત્ કાયસાક્ષ્યુભયાહ્વયાઃ ।
અક્ષૈકાદશકોપેતા યદિ વાષ્ટાદશાન્વિતાઃ

કામદેવા મૃતાઃ સ્વલ્પૈર્દશભિઃ સપ્તકાધિકૈઃ ।
ત એવૈકોનવિંશત્યા યુક્તા બહુભિરિન્દ્રિયૈઃ

દ્વિર્ધ્યાન જાસ્તુ સર્વાલ્પૈર્દશભિઃ પઞ્ચકાધિકૈઃ ।
દશભિઃ સચતુષ્કૈસ્તુ શુભકૃત્સ્નાઃ સમન્વિતાઃ

બૃહત્ફલા હિ અત્યલ્પૈસ્ત્રયોદશભિરન્વિતાઃ ।
યુક્તાઃ ષોડશભિસ્ત્વેતે સર્વભૂરિભિન્દ્રિયૈઃ

અષ્ટાભિર્દશભિઃ સૈકૈરારૂપ્યાઃ સ્વલ્પભૂરિભિઃ ।
સદેવકૌરવાઃ સત્ત્વાસ્ત્રયોદશભિરન્વિતાઃ

અષ્ટાભિર્નિઃશુભો યુક્તો દશભિર્વા ત્રયાધિકૈઃ ।
દ્વિલિઙ્ગાઃ પશ્ચિમૈઃ સ્વલ્પૈર્વિશત્યાપ્યેકયા પરમ્

સપ્તદ્રવ્યાવિનિર્ભાગી પરમાણુર્બહિર્ગતઃ ।
કામેષ્વેકાધિકઃ કાયે દ્વ્યધિકશ્ચક્ષુરાદિષુ

એવં રૂપે ઽપિ વિજ્ઞેયો હિત્વા ગન્ધરસદ્વયમ્ ।
ચિત્તં ચૈતસિકૈઃ સાર્ધં સંસ્કૃતં તુ સ્વલક્ષણૈઃ

દશધર્મા મહાભૌમા વિત્સંજ્ઞાચેતનાસ્મૃતિઃ ।
છન્દઃ સ્પર્શો ઽધિમોક્ષશ્ચ ધીઃ સમાધિર્મનસ્કૃતિઃ

શ્રદ્ધાપેક્ષાપ્રમાદશ્ચ પ્રસ્રબ્ધિર્હ્રીરપત્રપા ।
મૂલવીર્યમહિંસા ચ શુભભૂકા દશસ્મૃતાઃ

સ્ત્યાનં પ્રમત્તિરાશ્રદ્ધ્યમાલસ્યં મૂઢિરુદ્ધતિઃ ।
ક્લિષ્ટે ષટ્ અશુભે તુ દ્વે આહ્રીક્યમનપત્રપા

માયાશાઠ્યમદક્રોધવિહિંસેર્ષ્યાપ્રદષ્ટયઃ ।
સૂક્ષ્મોપનાહમાત્સર્યાણ્યલ્પક્લેશભુવો દશ

પૃથિવ્યાદિ યથા દ્રવ્યં નીલાદિગુણયોગતઃ ।
તૈસ્તૈર્વિશેષ્યતે શબ્દૈશ્ચૈત્તયોગાન્મનસ્તથા

ભૂતભૌતિકનાનાત્વં સ્વરૂપેહાકૃતં યથા ।
તથૈવ ચિત્તચૈત્તાનાં પૃથક્ત્વમુપધાર્યતામ્

યથા સંબન્ધિસંબન્ધાદ્વિકારો ઽમ્ભસિ લક્ષ્યતે ।
તથા સંસર્ગિસંસર્ગાચ્ચેતોવિકૃતિરીક્ષ્યતામ્

ગુણો વિશેષણં ધર્મો માત્રાવૃત્તિસ્તથાશ્રયી ।
ઇત્યેવમાદયઃ શબ્દાઃ પ્રધાનાપેક્ષવૃત્તયઃ

ચિત્તં પ્રધાનમેતેષાં વસ્તુમાત્રગ્રહાદિભિઃ ।
બીજં ચૈતત્પ્રવૃત્તીનાં શુદ્ધિસંકરયોરપિ