108 Buddhist stotras · અધ્યાય 93

સરસ્વતીં નમસ્યામિ ચેતનાં હૃદિ સંસ્થિતામ્ ।
કણ્ઠસ્થાં પદ્મયોનિં ચ હ્રીંકારસુપ્રિયાં સદા ॥

મતિદાં વરદાં ચૈવ સર્વકામપ્રદાયિનીમ્ ।
કેશવસ્ય પ્રિયાં દેવીં વીણાહસ્તાં વરપ્રદામ્ ॥

ઐં હ્રીં મન્ત્રપ્રિયાં ચૈવ કુમતિધ્વંસકારિણીમ્ ।
સ્વપ્રકાશાં નિરાલમ્બામજ્ઞાનતિમિરાપહામ્ ॥

મોક્ષપ્રદાં સુનિત્યાં સુવરદાં શોધનપ્રિયામ્ ।
આદિત્યમણ્ડલે લીનાં પ્રણમામિ જિનપ્રિયામ્ ॥

જ્ઞાનાકારાં જગદ્દીપાં ભક્તપાશવિનાશિનીમ્ ।
ઇતિ સમ્યક્ સ્તુતા દેવી વાગીશેન મહાત્મના ॥

આત્માનં દર્શયામાસ શરદિન્દુસમપ્રભા ।
સરસ્વત્યુવાચ વરં વૃણીષ્વ ભદન્ત યત્તે મનસિ વર્તતે ॥

બૃહસ્પતિરુવાચ પ્રસન્ના યદિ મે દેવી દિવ્યં જ્ઞાનં પ્રદીયતામ્ ।
સરસ્વત્યુવાચ સ્તોત્રેણાનેન યે ભક્ત્યા માં સ્તુવન્તિ સદા નરાઃ ॥

લભન્તે પરમં જ્ઞાનં મમ તુલ્યપરાક્રમમ્ ।
કવિત્વં મત્પ્રસાદેન તથા ચ વિપુલં યશઃ ॥

ત્રિસન્ધ્યં પ્રયતો ભૂત્વા યઃ સ્તોત્રં પઠતે નરઃ ।
તસ્ય કણ્ઠે સદા વાસં કરિષ્યામિ ન સંશયઃ ॥