108 Buddhist stotras · અધ્યાય 90

નમસ્તે વિશ્વરૂપાય જ્યોતીરૂપાય તે નમઃ ।
નમઃ સ્વયંભવે નિત્યં જગદુદ્ધારહેતવે ॥

ત્વં બુદ્ધસ્ત્વં ચ ધર્મો દશબલતનયસ્ત્વં તથા બોધિસત્ત્વ સ્ત્વં ભિક્ષુઃ શ્રાવકસ્ત્વં કુલિશવરધરસ્ત્વં તથા ધર્મધાતુઃ ।
ત્વં બ્રહ્મા ત્વં ચ વિષ્ણુઃ પ્રમથગણપતિસ્ત્વં મહેન્દ્રો યમસ્ત્વં ત્વં પાશી ત્વં ધનેશસ્ત્વમનલપવનૌ નૈરૃતસ્ત્વં મહેશઃ ॥

ભૂતાઃ પ્રેતાશ્ચતિર્યક્ ત્વમમરમદિતિમાર્નવાસ્ત્વં વયં ચ ચાતુર્યોનિસ્ત્વમેવ ત્રિગુણવરતનુઃ પઞ્ચજ્ઞાનૈકમૂર્તિઃ ।
વર્ણાસ્ત્વં કાલમાસા દિનમપિ રજની પઞ્ચભૂતાસ્ત્વમેવ અન્નં રત્નં ચ સર્વં મતિરતિ મહતી નઃ સદા ત્વાં નતાઃ સ્મઃ ॥

પઞ્ચજ્ઞાનેન બુદ્ધાન્ સૃજસિ સ્વયમથો બોધિસત્ત્વાંશ્ચ પઞ્ચ ભૂતાનેતાન્ ગુણાંસ્ત્રીનજહરિગિરિશાન્ સ્થાવરાઞ્જઙ્ગમાંશ્ચ ।
સર્વેષાં ચેતસિ સ્થો નટયસિ સકલં સર્વતો રક્ષકો ઽસિ ત્વં બીજં ચાઙ્કુરસ્ત્વં ફલમપિ વિટપી સર્વદા ત્વાં નતાઃ સ્મઃ ॥

શ્રેષ્ઠં ક્ષત્રં ત્વમસ્મિન્ પ્રભવસિ ભગવાન્ સર્વતઃ સર્વદેવાન્ ગ્રામાંસ્તીર્થાનિ દેશાન્ નૃપસહિતનરાન્ નૈગમાંશ્ચાપિ સર્વાન્ ।
દ્વીપેષ્વન્યેષ્વપિ ત્વં વિભજસિ સકલં જ્યોતિષાં સંવિભાગમ્ બીજીભૂતૈકદીપો ઽસ્યખિલમપિ જગદ્વયાપકસ્ત્વાં નતાઃ સ્મઃ ॥

જ્યોતિસ્ત્વદીયં પરિતો વિસારિ સિતારુણશ્યામકપીતરક્તં ।
દૃષ્ટં તતઃ સર્વમિદં ભવન્તં મન્યામહે ત્વાં પ્રણતાઃ સ્મ નિત્યમ્ ॥

નુતિં મહારાજકૃતાં યે પઠિષ્યન્તિ માનવાઃ ।
ચક્રવર્તિપદં પ્રાપ્ય તે હિ મુક્તિમવાપ્નુયુઃ ॥