108 Buddhist stotras · અધ્યાય 89

સ્તુતમપિ સુરસઙ્ઘૈઃ સિદ્ધગન્ધર્વયક્ષૈર્ દિવિ ભુવિ સુવિચિત્રૈઃ સ્તોત્રવાગ્ભિર્યતીશૈઃ ।
અહમપિ કૃતશક્તિર્નૌમિ સંબુદ્ધમાર્યં નભસિ ગરુડયાતે કિં ન યાન્તિ દ્વિરેફાઃ ॥

ક્ષપિતદુરિતપક્ષઃ ક્ષીણનિઃશેષદોષો દ્રવિતકનકવર્ણઃ ફુલ્લપદ્માયતાક્ષઃ ।
સુરુચિરપરિવેષઃ સુપ્રભામણ્ડલશ્રીઃ દશબલ તવ નિત્યં સુપ્રભાતં પ્રભાતમ્ ॥

મદનબલવિજેતુઃ કાપથોચ્છેદકર્તુસ્ ત્રિભુવનહિતકર્તુઃ સ્ત્રીલતાજાલહર્તુઃ ।
સમસુખફલદાતુર્ભેત્તુરજ્ઞાનશૈલં દશબલ તવ નિત્યં સુપ્રભાતં પ્રભાતમ્ ॥

અસુરસુરનરાણાં યો ઽગ્રજન્માગ્રદેવઃ સકલભુવનધાતૌ લોકસૃષ્ટ્યૈકશબ્દઃ ।
સ્વપિતિ મનુજધાતા અબ્જયોનિઃ સ્વયમ્ભૂર્ દશબલ તવ નિત્યં સુપ્રભાતં પ્રભાતમ્ ॥

ઉદયગિરિતટસ્થો વિદ્રુમચ્છેદતામ્રસ્ તિમિરનિકરહન્તા ચક્ષુરેકં પ્રજાનામ્ ।
રવિરપિ મદલોલઃ સર્વથા સો ઽપિ સુપ્તો દશબલ તવ નિત્યં સુપ્રભાતં પ્રભાતમ્ ॥

દ્વિરદદશનપાણ્ડુઃ શીતરશ્મિઃ શશાઙ્કસ્ તિલક ઇવ રજન્યાઃ સર્વચૂડામણિર્યઃ ।
અવિગતમદરાગઃ સર્વથા સો ઽપિ સુપ્તો દશબલ તવ નિત્યં સુપ્રભાતં પ્રભાતમ્ ॥

પ્રબલભુજચતુષ્કઃ ષોડશાર્ધાર્ધવક્ત્રો જપનિયમવિધિજ્ઞઃ સામવેદપ્રવક્તા ।
અમલકમલયોનિઃ સો ઽપિ બ્રહ્મા પ્રસુપ્તો દશબલ તવ નિત્યં સુપ્રભાતં પ્રભાતમ્ ॥

હિમગિરિશિખરસ્થઃ સર્પયજ્ઞોપવીતી ત્રિપુરદહનદક્ષો વ્યાઘ્રચર્મોત્તરીયઃ ।
સહ ગિરિવરપુત્ર્યા સો ઽપિ સુપ્તસ્ત્રિશૂલી દશબલ તવ નિત્યં સુપ્રભાતં પ્રભાતમ્ ॥

જ્વલિતકુલિશપાણિર્દુર્જયો દાનવાનાં સુરપતિરપિ શચ્યા વિભ્રમે મૂઢચેતાઃ ।
અનિશિનિશિપ્રસુપ્તઃ કામપઙ્કે નિમગ્નો દશબલ તવ નિત્યં સુપ્રભાતં પ્રભાતમ્ ॥

કુવલયદલનીલઃ પુણ્ડરીકાયતાક્ષઃ સુરરિપુબલહન્તા વિશ્વકૃદ્વિશ્વરૂપી ।
હરિરપિ ચિરસુપ્તો ગર્ભવાસૈરમુક્તો દશબલ તવ નિત્યં સુપ્રભાતં પ્રભાતમ્ ॥

કપિલજટકલાપો રક્તતામ્રારુણાક્ષઃ પશુપતિરતિકાલે સઙ્ગભઙ્ગૈકદક્ષઃ ।
સ્મરશરદલિતાઙ્ગઃ સો ઽપિ સુપ્તો હુતાશો દશબલ તવ નિત્યં સુપ્રભાતં પ્રભાતમ્ ॥

હુમશશિકુમુદાભો મદ્યપાનારુણાક્ષો દૃઢકઠિનભુજાઙ્ગો લાઙ્ગલી શક્તિહસ્તઃ ।
બલ ઇહ શયિતો ઽસૌ રેવતીકણ્ઠલગ્નો દશબલ તવ નિત્યં સુપ્રભાતં પ્રભાતમ્ ॥

ગજમુખદશનૈકઃ સર્વતો વિઘ્નહન્તા વિગલિતમદવારિઃ ષટ્પદાકીર્ણગણ્ડઃ ।
ગણપતિરપિ સુપ્તો વારુણીપાનમત્તો દશબલ તવ નિત્યં સુપ્રભાતં પ્રભાતમ્ ॥

અતસિકુસુમનીલો યસ્ય શક્તિઃ કરાગ્રે નવકમલવપુષ્માન્ ષણ્મુખઃ ક્રૌઞ્ચહન્તા ।
ત્રિનયનતનયો ઽસૌ નિત્યસુપ્તઃ કુમારો દશબલ તવ નિત્યં સુપ્રભાતં પ્રભાતમ્ ॥

અશનવસનહીના ભાવ્યમાના વિરૂપા અલમખિલવિઘાતૈઃ પ્રેતવદ્દગ્ધદેહાઃ ।
ઉભયગતિવિહીનાસ્તે ઽપિ નગ્નાઃ પ્રસુપ્તા દશબલ તવ નિત્યં સુપ્રભાતં પ્રભાતમ્ ॥

ઋષય ઇહ મહાન્તો વત્સભૃગ્વઙ્ગિરાદ્યાઃ ક્રતુપુલહવસિષ્ઠા વ્યાસવાલ્મીકિગર્ગાઃ ।
પરયુવતિવિલાસૈર્મોહિતાસ્તે ઽપિ સુપ્તાઃ દશબલ તવ નિત્યં સુપ્રભાતં પ્રભાતમ્ ॥

યમવરુણકુબેરા યક્ષદૈત્યોરગેન્દ્રાઃ દિવિ ભુવિ ગગને વા લોકપાલાસ્તથાન્યે ।
યુવતિમદકટાક્ષૈર્વીંક્ષિતાસ્તે ઽપિ સુપ્તા દશબલ તવ નિત્યં સુપ્રભાતં પ્રભાતમ્ ॥

ભવજલનિધિમગ્ના મોહજાલાવૃતાઙ્ગા મનુકપિલકણાદા ભ્રામિતા મૂઢચિત્તાઃ ।
સમસુખપરિહીના વાલિશાસ્તે ઽપિ સુપ્તા દશબલ તવ નિત્યં સુપ્રભાતં પ્રભાતમ્ ॥

અજ્ઞાનનિદ્રરજનીતમસિ પ્રસુપ્તા તૃષ્ણાવિશાલશયને વિષયોપધાને ।
કાલે શુભાશુભફલં પરિકીર્યમાણે જાગર્તિ યઃ સતતમેવ નમો ઽસ્તુ તસ્મૈ ॥

તીર્થેષુ ગોકુલશતાનિ પિબન્તિ તોયં તૃપ્તિં વ્રજન્તિ ન ચ તત્ક્ષયમભ્યુપૈતિ ।
તદ્વન્મુને કવિશતૈરપિ સંસ્તુતસ્ય ન ક્ષીયતે ગુણનિધિર્ગુણસાગરસ્ય ॥

સુપ્રભાતં તવૈકસ્ય જ્ઞાનોન્મીલિતચક્ષુષઃ ।
અજ્ઞાનતિમિરાન્ધાનાં નિત્યમસ્તમિતો રવિઃ ॥

પુનઃ પ્રભાતં પુનરુત્થિતો રવિઃ પુનઃ શશાઙ્કઃ પુનરેવ શર્વરી ।
મૃત્યુર્જરા જન્મ તથૈવ હે મુને ગતાગતં મૂઢજનો ન બુદ્ધ્યતે ॥

સુપ્રભાતં સુનક્ષત્રં શ્રિયા પ્રત્યભિનન્દિતમ્ ।
બુદ્ધં ધર્મં ચ સઙ્ઘં વ પ્રણમામિ દિને દિને ॥

સ્તુત્વા લોકગુરું મહામુનિવરં સદ્ધર્મપુણ્યોદ્ગમં નિર્દ્વન્દ્વં હતરાગદ્વેષતિમિરં શાન્તેન્દ્રિયં નિસ્પૃહમ્ ।
યત્પુણ્યં સમુપાર્જિતં ખલુ મયા તેનૈવ લોકો ઽખિલં પ્રત્યૂષસ્તુતિહર્ષિતો દશબલે શ્રદ્ધાં પરાં વિન્દતામ્ ॥