108 Buddhist stotras · અધ્યાય 86

એષો હિ ભવતસ્તાતો જન્મમૃત્યુજરાન્તકઃ ।
સર્વાર્થસિદ્ધનામ્નેતિ શાક્યસિંહો ઽધુના સુત ॥

યસ્ય છાયામુપાશ્રિત્ય દિવ્યાતિસુન્દરો ભવેઃ ।
દ્વાત્રિંશલ્લક્ષણધરં પિતરં દર્શયાધુના ॥

ચતુરશીતિસાહસ્રં સ્ત્રીણાં વિહાય નિર્મદઃ ।
તપોવનમગાદ્ યો ઽસૌ વન્દયૈનં મહર્દ્ધિકમ્ ॥

સપ્તરત્નાનિ રાજ્યં ચ મહૈશ્વર્યપદં વરમ્ ।
હિત્વા પ્રવ્રજિતો યો ઽસૌ તં દર્શય જગદ્ગુરુમ્ ॥

માયાખ્યાયાઃ પિતામહ્યા યો ઽજનદ્દક્ષકુક્ષિતઃ ।
લુમ્બિન્યામુદયાત્ સૂર્ય ઇવ તં પિતરં નમ ॥

અભયાયાઃ કુલેશ્વર્યા યેન પાદામ્બુજે નતમ્ ।
ત્રૈધાતુકાધિપં દેવં પિતરં ત્વં સદા નમ ॥

વિશ્વામિત્રમુપાધ્યાયં યો ઽયોજયત્ સુસંવરે ।
બાલક્રીડાભિરક્તાત્મા તાતમેનં સદા નમ ॥

જમ્બૂતરુસમાસીનં પઞ્ચર્ષયો હતત્વિષઃ ।
નિર્માનિનઃ પ્રાભજન્ યમેનં તાતં સદા નમ ॥

પિતરં બોધયિત્વા યો ઽત્યાજયત્તુ ષડંશકમ્ ।
દયાકરં જગદ્વન્દ્યં જનકં પ્રણમાત્મજ ॥

યો ઽજયદ્દેવદત્તાદીન્ માનિનઃ સર્વવિત્ સુધીઃ ।
સર્વફલાદિદં વિજ્ઞં સુધિયં જનકં ભજ ॥

યાત્રાયામાતુરં જીર્ણં મૃતં દૃષ્ટિવિવર્જિતમ્ ।
સ્વયં વિજ્ઞો ઽપિ પપ્રચ્છ સદા તં જનકં ભજ ॥

કામાગ્નિર્નાહરદ્યસ્ય ચિત્તં પ્રમદવાસિનઃ ।
નિરઞ્જનં નિર્વિકલ્પં સુત તં જનકં ભજ ॥

કનકાશ્વં સમારુહ્ય છન્દકેન બહિર્યયૌ ।
દેશાન્નિશીથે ત્રિદશૈઃ સ્તૂયમાનં મુદા ભજ ॥

હયં નિવર્તયામાસ છન્દકં ચ તપોવનાત્ ।
સુકણ્ઠાભરણં દત્ત્વા ભણૈનં વનચારિણમ્ ॥

નૈરઞ્જનામુપાસૃત્ય પ્રાકરોદ્ યસ્તપોવ્રતમ્ ।
જગદ્ધિતાર્થં ષડ્વર્ષમેનં ભજ તપઃપરમ્ ॥

બોધિદ્રુમસમાસીનો જિત્વા મારં સુદુઃસહમ્ ।
પ્રાલભદ્બોધિરત્નં યો દર્શયૈનં તથાગતમ્ ॥

મૃગદાવસ્થિતઃ કાશ્યાં ધર્મચર્ક્ર પ્રવર્તયન્ ।
બ્રહ્માદિભિર્વૃતો યો ઽસૌ દર્શયૈનં ગુરું સુત ॥

ઇતિ માત્રોદિતં શ્રુત્વા રાહુલઃ સો ઽતિવિસ્મિતઃ ।
પ્રણમ્ય પિતરં પશ્યન્ મુદમાપ સ્મિતાનનઃ ॥