108 Buddhist stotras · અધ્યાય 84

નૌભિ શ્રીશાક્યસિંહં સકલહિતકરં ધર્મરાજં મહેશં સર્વજ્ઞં જ્ઞાનકાયં ત્રિમલવિરહિતં સૌગતં બોધિરાજમ્ ।
ધર્માધારં મુનીન્દ્રં દશબલબલિનં શ્રીઘનં વિશ્વરૂપં સંબુદ્ધં લોકનાથં સકલભયહરં સંસ્થિતં મર્ત્યલોકે ॥

યસ્ત્વં ધર્માધિમેશં(પેશઃ) સકલજિનસુતૈઃ સંશ્રિતઃ શ્વેતકેતુ રિત્યાખ્યાં બોધિહેતુસ્તદનુ ચ તુષિતા ચાગતા બોધિરાજ ।
મૈત્રેયં સ્થાપયિત્વા પ્રમુદિતમનસં સ્વાસને ચાભિષિઞ્ચ્ય માયાગર્ભે પવિત્રે ઽશુચિમલરહિતે રત્નવ્યૂહે નિવેશ ॥

ગર્ભે સ્થિત્વા ઽપિ યસ્ત્વં સકલહિતકરીં ધર્મવ્યાખ્યાં કરોષિ કાલે માતુઃ સુકક્ષાત્સકલનિજકરૈઃ કાશયત્ સંપ્રજાતઃ ।
લોકાચારં ચ કૃત્વા વિહિતદશવિધિં વૈ વિવાહાદિ તત્તત્ ત્યક્ત્વા સર્વાંશ્ચ રાજ્યં સકલજનહિતે નિર્ગતં ત્વાં નમે ઽહમ્ ॥

ઊર્ણાકોશાચ્ચ યસ્ય પ્રતિદિનમસકૃત્ દક્ષિણાવર્તરોચિઃ પ્રોદ્યદ્દેદીપ્યમાનત્રિભુવનકુહરધ્વસ્તમોહાન્ધકારમ્ ।
ચત્વારિંશત્સુદન્તોદ્ગલિતકરચયૈર્ભાપયન્નારકીયાન્ પ્રોદ્ધૃત્વા સ્વર્ગલોકે સુરતરુકલિતે સ્થાપિતા યેન વન્દે ॥

યત્પાણી ચક્રચિહ્નાવભિમતફલદૌ દાનપારંગતત્વો દ્યત્કાન્તા ભૂમિદેવી સ્વગણપરિવૃતા ભેદયિત્વા ઽવનિં તામ્ ।
સ્થિત્વાગ્રે પૂજયિત્વા નમુચિમભિગતં ભર્ત્સયિત્વા દ્વિષન્તં સાક્ષીભૂતા નિલીના પ્રણમિતશિરસા ત્વાં નમે ઽહં જિનેન્દ્રમ્ ॥

યસ્યોદ્ગ્રીવસ્ય ચાગ્રે વિધિહરમધુહૃલ્લોકસંસ્થૈઃ પ્રવીણૈર્ દ્રષ્ટું નૈવાભિશક્ત્યા કિમુ મનુજપુરે વાસિતૈર્માદૃશૈશ્ચ ।
બ્રહ્માણ્ડં લઙ્ઘયિત્વા તરણિશશધરૌ દ્યૌશ્ચ નક્ષત્રલોકં ઊર્ધ્વં લોકોત્તરાખ્યે નિજભુવનવરે ભાસિતં ત્વાં નમે ઽહમ્ ॥

યદ્વક્ત્રં પઙ્કજાભં સુરદનવસનાકર્ણિકાકેસરાઢ્યં બ્રહ્માણ્ડં જૂમ્ભતે ઽસ્મિન્ ભુવનગણવૃત્તં સંશ્રિતં કર્ણિકાવત્ ।
દૃષ્ટ્વા સંમૂર્ચ્છિતો ઽભૂન્નમુચિરનુચરૈસ્ત્રાસિ સર્વજ્ઞનાથ કૃત્વા કેચિત્પ્રયાતાઃ શરણમભિમતં શ્રીઘનં ત્વાં નમે ઽહમ્ ॥

સંખ્યાજ્ઞાનપ્રવીણાસ્ત્રિભુવનસદને પણ્ડિતા યે વસન્તિ તૈઃ સર્વૈર્મીલયિત્વા યદિ તવ મહિમા વર્ણ્યતે કલ્પકાલમ્ ।
પારં ગન્તું સમર્થા નહિ નિખિલગુણક્ષીરસિન્ધોઃ કથઞ્ચિદ્ એકાકી કિં સમર્થાસ્તદપિ મમ મનો બોધનાર્થં નમે ત્વામ્ ॥

પઠ્યન્તે સ્તોત્રમેતત્સુરપતિરચિતં સ્રગ્ધરાવૃત્તસંજ્ઞં શક્રાદ્યા લોકપાલાઃ પ્રતિપદનુચરાઃ સંકરિષ્યન્તિ રક્ષામ્ ।
સૌખ્યં ભુક્ત્વેહ લોકે તદનુ સુરપતેઃ કલ્પવૃક્ષાભિકીર્ણે સ્થિત્વા ગચ્છન્તિ ચાન્તે સુગતસુતમહીં સર્વલૌકૈકગમ્યામ્ ॥