108 Buddhist stotras · અધ્યાય 82

પ્રણમામિ જિનં સુગતં સતતં તપનીયહિરણ્યશરીરચ્છવિમ્ ।
વરચક્રવિભૂષિતપાણિતલં સસુરાસુરમાનુષપાપહરમ્ ॥

પ્રણમામિ મુનીન્દ્રગુરું લલિતં સતતાકુલનિર્જિતમારબલમ્ ।
દશપારમિતાપ્રતિબોધકરં ચતુર્રાર્યવિબોધકરં સુકરમ્ ॥

પ્રણમામિ હિતઙ્કરદેવનરં સનરામરપૂજિતદેવવરમ્ ।
અમરાદિકષડ્ગતિહૈત્યકરં સજરાજનિમૃત્યુભયાદિહરમ્ ॥

પ્રણમામિ સુખાકરબોધિભરં સ્વસુખં પ્રદદૌ કરુણાશયતઃ ।
પરદુઃખમસહ્ય ચકાર જનુર્ગતદોષનિરાકુલશાક્યકુલે ॥

પ્રણમામિ ચ લોકહિતાય ગૃહં વિજહૌ પિતરં રમણીસહિતમ્ ।
હયકણ્ઠકછન્દકદેવવૃતો મુદિતો ઽભ્યગમત્ સુવને વિજને ॥

પ્રણમામિ તપોવનસુભ્રમિતં પ્રચકાર ચ યસ્તુ મહર્ષિગણાન્ ।
ચતુરાર્યકબ્રહ્મવિહારપરાન્ સુગતસ્મરણૈકતપોવ્રતિકાન્ ॥

પ્રણમામિ મહાદ્રુમમૂલવરે સુતૃણાસનસંશ્રિતવજ્રધરમ્ ।
શતકોટિસુમારબલાસ્ત્રહરં શતસંખ્યતથાગતપુત્રવૃતમ્ ॥

પ્રણમામિ ચ મલ્લિકપઞ્ચશતા વણિજઃ પ્રતિપાલનમેવ કૃતાઃ ।
વણિજાર્પિતપઞ્ચસુધાનયકં શુભપાયસભોજનભક્ષકૃતમ્ ॥

પ્રણમામિ સુવર્તિતધર્મવરં મૃગદાવવને ચતુરાસનકે ।
વિધિશક્રસુરાસુરલોકવૃતં સુશરીરમહોજ્જ્વલસર્વદિશમ્ ॥

ગુરુનિર્મિતકં સુગતસ્તવકં પઠનં કુરુતે કિલ યો મનુજઃ ।
ગ્રહરોગભયં નહિ તસ્ય સદા સ તુ યાસ્યતિ મોક્ષપુરે સુપુરે ॥