108 Buddhist stotras · અધ્યાય 80

નમામિ તં ભિક્ષુગણૈરૂપેતં તથાગતૈર્વૃક્ષતલે નિષણ્ણમ્ ।
અનન્તરોદીરિતલક્ષ્મભાજૌ પાદૌ યદીયાવુપજાતયસ્તાઃ ॥

શાક્યેન્દ્રવંશાલલિતાવતંસમંશાધિકાભં કનકાધિકાભમ્ ।
નમામિ બુદ્ધં હ્યુપજાતિસિદ્ધં સર્વાર્થસિદ્ધાખ્યકુમારવર્યમ્ ॥

નમામિ નિત્યં નિરવદ્યવૃત્તં નિરંજનં નિર્મલદેહરૂપમ્ ।
નિઃશેષસત્ત્વોદ્ધરણૈકચિત્તં ચન્દ્રાનનં શુભ્રપદારવિન્દમ્ ॥

શૌદ્ધોદનિં ગૌતમિપાલનીયં માયાસુતં મારજિતં મહાન્તમ્ ।
મહેશ્વરાદ્યૈર્મહનીયમૂર્તિમમેયમાહાત્મ્યમમેયધર્મમ્ ॥

ભવોદધેસ્તીર્ણમનન્તપુણ્યં ભવાદિદેવૈરભિવન્દ્યપાદમ્ ।
અનન્તભવ્યાકૃતિભાવનીયં તં નૌમિ ભવ્યોજ્જ્વલભૂષિતાઙ્ગમ્ ॥

બભાણ વંશસ્થવિરો નૃપાધિપો જનાન્ પ્રતીત્યાહ્વયતાત્મજં મમ ।
કૃતારિભઙ્ગં જિનરાજમીશ્વરં ગતં ષડબ્દં ચ વિયોગભાવયોઃ ॥

ભજસ્વ વંશસ્થવિરં મુનીશ્વરં મહાવને વૃક્ષતલે શુચિસ્થલે ।
જગદ્ધિતં યજ્જનન જરાન્તકં જગજ્જનન્યા વરદક્ષપાર્શ્વજમ્ ॥

શાક્યેન્દ્રવંશોદધિચન્દ્રમુદ્ગતં શ્રીશાક્યસિંહં ચતુરાનનૈઃ સ્તુવન્ ।
પ્રાશિષ્ટ બ્રહ્મા ચતુરાનનં સ્વકં ચતુર્ગુણં પુણ્યમવાપ્તમિત્યહો ॥

દૈત્યેન્દ્રવંશાગ્નિરસૌ જનાર્દનો દ્વાભ્યાં વિધાયાઞ્જલિમમ્બુજાસનમ્ ।
દોષ્ણામમંસચ્ચતુરશ્ચતુર્ભુજાદ્ દ્વૈગુણ્યમાપ્તં સુકૃતં મયેતિ ॥