108 Buddhist stotras · અધ્યાય 79

નમો ઽસ્તુ લોકાધિપ શાક્યરાજ સદ્ધર્મપઙ્કેરુહભાસ્કરાય ।
ક્લેશારિવર્ગાભિહતાય તુભ્યં સંબોધિદીપૈર્હતમોહજાલ ॥

બ્રહ્મર્ષિરાજર્ષિસુરર્ષિસઙ્ઘૈઃ પ્રાપ્તું ન યચ્છક્યમનેકરત્નૈઃ ।
પ્રાપ્તં ત્વયા જ્ઞાનમનન્તધર્મં યેનાકરિષ્યઃ સકલસ્ય હૈત્યમ્ ॥

પ્રવર્તિતં યેન સુધર્મચક્રં યસ્મિન્ મહી સોદધિશૈલરાજા ।
આનન્દિતેવ ચલિતા હ્યજસ્રં નમો ઽસ્તુ તુભ્યં ત્રિભવાધિપાય ॥

યસ્મિંશ્ચ વાતાસ્ત્રિગુણેન યુક્તા વવુર્નભસ્તો નિપતન્તિ વસ્ત્રાઃ(ર્ષાઃ) ।
વિચિત્રપુષ્પાણિ સુગન્ધિ વારિ નમો ઽસ્તુ તુભ્યં જગદેકનાથ ॥

અનન્યજેયો નમુચિર્વરિષ્ઠૈઃ સૈન્યૈર્વૃતઃ કોટિશતપ્રમાણૈઃ ।
જિતં ત્વયૈકેન નિરાયુધેન નમો ઽસ્તુ તુભ્યં બલવર્તનાય ॥

યેન ત્રિલોકીં પ્રતિપાલિતું તન્માયાસુકજ્જાજ્વલયન્(?) પ્રજાતમ્ ।
સ્વભાવતો જન્મજરાન્તકારિણે નમો ઽસ્તુ તુભ્યં જગદેકનાથ ॥

ત્રૈધાતુલોકેષુ વિકાસિતું તાં સંબોધિચર્યામપવર્ગસેતુમ્ ।
તુષિતાયુતો જન્મ ચકાર મર્ત્યે નમો ઽસ્તુ તુભ્યં વરબોધિરાજ ॥

સમ્યક્ પ્રતિજ્ઞાં પ્રતિકૃત્ય યેન સંપ્રેષ્યતે મોક્ષપુરે જનૌઘઃ ।
તદર્થમાયાસિ ચ મર્ત્યલોકે નમો ઽસ્તુ તુભ્યં સુમહત્પ્રતિજ્ઞ ॥

યશ્ચાષ્ટકં બ્રહ્મકૃતં સુપુણ્યં પઠિષ્યતિ શાક્યવરાગ્રતઃ સ્થઃ ।
દુઃખં મહાપાપભયં ચ હિત્વા શ્રીશ્રીઘને યાસ્યતિ પત્તને મુદા ॥