108 Buddhist stotras · અધ્યાય 8

સુખદચક્રચારુચૂડામણિરુચિરમરીચિસંચય પ્રચુરશિખાપ્રચારપરિચુમ્બિતચર્ચિતચરણચન્દ્રકે ।
જગતિ ચરાચરે ઽપિ સાચીકૃતચકિતકૃપાલુલોચને સ્તુતિવચનોપચારમુચિતાચરતિં રચયામિ દેવિ તે ॥

નખરકઠોરકોટિકુટ્ટિતકરિકટતટપાટનોત્કટાઃ પ્રવિકટરુધિરપટલપટપાલિતા અટવીવિલુણ્ઠકાઃ ।
વિકટસટાટ્ટહાસઘટિતાવટતટઘટાનોદ્ભટાસ્ત્વજ્જુષિ ઝટિતિ યાન્તિ સટિનઃ કુણ્ઠાદપિ કુણ્ઠશક્તિતામ્ ॥

મલિનમહાકપોલતલવિગલિતમદજલમલનવિહ્વલાઃ સ્ખલદલિજાલબહલકોલાહલલિતવિલાસલાસિનઃ ।
વિચલિતકર્ણતાલપવનાહતલલિતવિલેપધૂલયઃ પથિ ન ગજાશ્ચલન્તિ કુલશૈલતુલાસ્તવ લા(ના)મલાલિતાઃ ॥

મારુતઘાતજાતરભસોચ્છલદનલશિખાકદમ્બક પ્રતિહતપુરપુરન્ધ્રિહાહારવત્વરિતદિગન્તભૈરવઃ ।
ઉદ્ધતધૂમ્રધૂમધૂલિધુતબદ્ધઘનાન્ધકારકં ત્વન્નતિનીતિગતિરેતિ શમં બહુશો હુતાશનઃ ॥

ચલિતલતાવિતાનકુટિલોદ્ગમદુર્ગમગહનવર્તિન સપદિ પુરો નરસ્ય તારેતિ મનાગપિ નામધારિણઃ ।
સ્ફીતફણૌઘઘોરફૂત્કારપરિસ્ફુરતાનલસ્ફુટ સ્ફુરદુરુવિસ્ફુલિઙ્ગવિસ્ફારિણિ ફણિનિ વિષં વિનશ્યતિ ॥

ક્ષણકૃતકોપકમ્પકરકર્ષિતખરકરવાલનિર્મલ વ્યતિકરકરકરવાલવિકરાલમહાબલભુજાર્ગલઃ ।
પ્રસ્થિતપથિકનિકટકટવિઘટનપટુરતિનિષ્ઠુરાશયો ભગવતિ ભક્તિવન્તુમુપસર્પતિ તવ ન વને ઽપિ તસ્કરઃ ॥

યો ઽપિ નરેન્દ્રવીરહુઙ્કારકચગ્રહનિગ્રહ્ ગ્રહગ્રસ્ત ઇવ રજ્જુહિઞ્જીરવજર્જરિતાઙ્ગપઞ્જરઃ ।
પ્રતિપદખનખનાયમાનમુખરીકૃતખરખરશૃઙ્ખલાવલિ સ્ત્વચ્ચરણારવિન્દમભિવન્દ્ય સ નન્દતિ મુક્તબન્ધનઃ ॥

કલકલકલિલલોલકલ્લોલજલોલ્લલત્કાલિકાનિલા સ્ફાલિતવિપુલબહલવેલાકુલકૂલતમાલપલ્લવાત્ ।
સરભસમકરનિકરખરનખરસુદુસ્તરતો ઽપિ સાગરાત્ તારિણિ તરલતારતરતારકમાતુરમેત્ય રક્ષસિ ॥

સૂક્ષ્મવિરાવસારસરઘોત્કરનિર્ભરઘોરઘર્ઘરઘ્રાણા ઘૃણાઙઘ્રિપાણ્યસ્રવિસ્રીકૃતક્વથિતશરીરપઞ્જરા ।
યત્ક્ષણમહાપ્રસાદાવેશત્વત્પ્રણતા તારિણિ કામરૂપિણા તત્ક્ષણલબ્ધલોલકિરણમણિકુણ્ડલમણ્ડિતગણ્ડમણ્ડલા ॥

યૂકવિકીર્ણશીર્ણપટકર્પટકટિતટવેષ્ટનોદ્ભટઃ સંકટપેટ્ટપૂરમાત્રાર્જનપરપુરપિણ્ડતર્કણઃ ।
યદિ તવ નામકં હૃદિ કરોતિ હિ રાક્ષસૈકકઃ પ્રૌઢવધૂવિધૂતચામીકરખચિતવિચિત્રચામરમ્ ॥