108 Buddhist stotras · અધ્યાય 7

શ્રીમત્પોતલકે રમ્યે નાનાધાતુવિરાજિતે ।
નાનાદ્રુમલતાકીર્ણે નાનાપક્ષિનિકૂજિતે ॥

નાનાનિર્ઝરભાઙ્કારૈર્નાનામૃગસમાકુલે ।
નાનાકુસુમજાતીભિઃ સમન્તાદધિવાસિતે ॥

નાનાહૃદ્યફલોપેતષટ્પદોદ્ગીતનિઃસ્વનૈઃ ।
કિન્નરૈર્મધુરોદ્ગીતૈર્મત્તરવારણસંકુલૈઃ ॥

સિદ્ધવિદ્યાધરગણૈર્ગન્ધર્વૈશ્ચ નિનાદિતે ।
મુનિભિર્વીતરાગૈશ્ચ સતતં સુનિષેવિતે ॥

બોધિસત્ત્વગણૈશ્ચાન્યૈર્દશભૂમીશ્વરૈરપિ ।
આર્યતારાદિભિર્દેવૈર્વિદ્યારાજ્ઞીસહસ્રકૈઃ ॥

ક્રોધરાજગણૈશ્ચાન્યૈર્હયગ્રીવાદિભિર્વૃતે ।
સર્વસત્ત્વહિતે યુક્તો ભગવાનવલોકિતઃ ॥

વ્યાજહાર તતઃ શ્રીમાન્ પદ્મગર્ભાસને સ્થિતઃ ।
મહતા તપસા યુક્તો મૈત્ર્યા ચ કૃપયાન્વિતઃ ॥

ધર્મં દિદેશ તસ્યાં ચ મહત્યાં દેવપર્ષદિ ।
તત્રાપવિદ્ધમાગમ્ય વજ્રપાણિર્મહાબલઃ ॥

પરયા કૃપયા યુક્તઃ પપ્રચ્છ ચાવલોકિતમ્ ।
તસ્કરોરગસિંહોગ્રગજવ્યાઘ્રાદિસંકુલે ॥

સીદન્ત્યમી મુને સત્ત્વા મગ્નાઃ સંસારસાગરે ।
બદ્ધાઃ સાંસારિકૈઃ પાશૈ રાગદ્વેષતમોમયૈઃ ॥

મુચ્યન્તે યેન સત્ત્વાસ્તે તન્મે બ્રૂહિ મહામુને ।
એવમુક્તો જગન્નાથઃ સ શ્રીમાનવલોકિતઃ ॥

ઉવાચ મધુરાં વાણીં વજ્રપાણિં પ્રબોધિનીમ્ ।
શૃણુ ગુહ્યકરાજેન્દ્ર અમિતાભસ્ય તાયણીઃ(ણીમ્) ॥

પ્રણિધાનવશોત્પન્નાં મમાજ્ઞાં લોકમાતરમ્ ।
મહાકરુણયોપેતાં જગદુદ્ધરણોદ્ધૃતામ્ ॥

ઉદિતાદિત્યસંકાશાં પુર્ણેન્દુવદનપ્રભામ્ ।
ભાષયન્તીમિમાં તારાં સદેવાસુરમાનુષાન્ ॥

કમ્પયન્તીં ચ ત્રીન્ લોકાન્ ત્રાસયન્તીં યક્ષરાક્ષસાન્ ।
નીલોત્પલકરાં દેવીં મા ભૈર્મા ભૈરિતિ બ્રુવન્ ॥

જગત્સંરક્ષણાર્થયાહમુત્પાદિતા જિનૈઃ ।
કાન્તારે શસ્ત્રસંપાતે નાનાભયસમાકુલે ॥

સ્મરણાદેવ નામાનિ સત્ત્વાન્ રક્ષામ્યહં સદા ।
તારયિષ્યામ્યહં સત્ત્વાન્ નાનાભયમહાર્ણવાત્ ॥

તેન તારેતિ માં લોકે ગાયન્તિ મુનિપુંગવાઃ ।
કૃતાઞ્જલિપુટો ભૂત્વા તતઃ સાદરસાધ્વસઃ ॥

જ્વલયત્યન્તરિક્ષે તામિદં વચનમબ્રવીત્ ।
નામાષ્ટશતકં બ્રૂહિ યત્પુરા કીર્તિતં જનૈઃ ॥

દશભૂમીશ્વરૈર્નાથૈર્બોધિસત્ત્વૈર્મહર્દ્ધિકૈઃ ।
સર્વપાપહરં પુણ્યં માઙ્ગલ્યં કીર્તિવર્દ્ધનમ્ ॥

ધનધાન્યકરં ચૈવ આરોગ્યં પુષ્ટિવર્ધનમ્ ।
આયુરારોગ્યજનકં સર્વસત્ત્વસુખાવહમ્ ॥

લક્ષ્મ્યાઃ શ્રિયઃ સ્થાપકં ચ સર્વસત્ત્વવિવર્દ્ધનમ્ ।
મૈત્રીમાલમ્બ્ય સત્ત્વાનાં તત્કીર્તય મહામુને ॥

એવમુક્તે જગન્નાથઃ પ્રહસન્નવલોકિતઃ ।
વ્યવલોક્ય દિશઃ સર્વા મૈત્રીસ્ફરણયા દૃશા ॥

દક્ષિણં કરમુદ્ધૃત્ય પુણ્યલક્ષણમણ્ડિતમ્ ।
તમુવાચ મહાપ્રાજ્ઞઃ સાધુ સાધુ મહાતપ ॥

નામાનિ શૃણુ મહાભાગ સર્વસત્ત્વૈકવત્સરે ।
યાનિ સંકીર્ત્ય મનુજા સમ્પદા સ્યુર્ધનેશ્વરાઃ ॥

સર્વવ્યાધિવિનિર્મુક્તાઃ સર્વૈશ્વર્યગુણાન્વિતાઃ ।
અકાલમૃત્યુનિર્દગ્ધાશ્ચ્યુતા યાન્તિ સુખાવતીમ્ ॥

તાન્યહં સમ્પ્રવક્ષ્યામિ દેવસંઘાઃ શૃણુત મે ।
અનુમોદધ્વમેતદ્વા ભવિષ્યધ્વં સુનિર્વૃતાઃ ॥

મૈત્રીહૃદયે નિર્મલે શ્યામે શ્યામરૂપિ મહાપ્રાજ્ઞે પ્રબલવરભૂષિતે ।
અપરાજિતા મહારૌદ્રી વિશ્વરૂપી મહાબલા । ઓમ્ સુશ્રિયે ॥

ઓમ્ કલ્યાણી મહાતેજા લોકધાત્રી મહાયશાઃ ।
સરસ્વતી વિશાલાક્ષી પ્રજ્ઞા શ્રીર્બુદ્ધિવર્ધિની ॥

ધૃતિદા પુષ્ટિદા સ્વાહા ઓમ્કારા કામરૂપિણી ।
સર્વસત્ત્વહિતોદ્યુક્તા સંગ્રામોત્તારિણી જયા ॥

પ્રજ્ઞાપારમિતા દેવી આર્યતારા મનોરમા ।
દુન્દુભી શઙ્ખિની પૂર્ણા વિદ્યારાજ્ઞી પ્રિયમ્વદા ॥

ચન્દ્રાનના મહાગૌરી અજિતા પીતવાસસા ।
મહામાયા મહાશ્વેતા મહાબલપરાક્રમા ॥

મહારૌદ્રી મહાચણ્ડી દુષ્ટસત્ત્વનિષૂદિની ।
પ્રશાન્તા શાન્તરૂપા ચ વિજયા જ્વલનપ્રભા ॥

વિદ્યુન્મારી ધ્વજી ખઙ્ગી ચક્રી ચાપોદ્યતાયુધા ।
જમ્ભનો સ્તમ્ભની કાલી કાલરાત્રિર્નિશાચરી ॥

રક્ષણી મોહની શાન્તા કાન્તારી દ્રાવણી શુભા ।
બ્રહ્માણી વેદમાતા ચ ગુહ્યા ચ ગુહ્યવાસિની ॥

માઙ્ગલ્યા શાઙ્કરી સૌમ્યા જાતવેદા મનોજવા ।
કપાલિની મહાવેગા સન્ધ્યા સત્યા ઽપરાજિતા ॥

સાર્થવાહકૃપાદૃષ્ટિર્નષ્ટમાર્ગપ્રદર્શિની ।
વરદા શાસની શાસ્ત્રી સુરૂપા ઽમૃતવિક્રમા ॥

શર્વરી યોગિની સિદ્ધા ચણ્ડારી(લી)અમૃતા ધ્રુવા ।
ધન્યા પુણ્યા મહાભાગા શુભગા પ્રિયદર્શના ॥

કૃતાન્તત્રાસિની ભીમા ઉગ્રા ઉગ્રમહાતપા ।
જગદ્ધિતે સદોદ્યુક્તા શરણ્યા ભક્તવત્સલા ॥

વાગીશ્વરી શિવા સૂક્ષ્મા નિત્યા સર્વક્રમાનુગા ।
સર્વાર્થસાધની ભદ્રા ગોપ્ત્રી ધાત્રી ધનપ્રદા ॥

અભયા ગૌતમી પુણ્યા શ્રીમલ્લોકેશ્વરાત્મજા ।
તારાનામગુણાનન્તા સર્વાશાપરિપૂરકા ॥

ઓમ્ તારે કૃપાવરે શ્રીક્લેશશ્રવણીયે સ્વાહા ।
નામ્નામષ્ટોત્તરશતં હ્યેતદ્યત્કીર્તિતં મયા ।
રહસ્યભૂતં ગુહ્યં ચ દેવાનામપિ દુર્લભમ્ ॥

સૌભાગ્યભોગકરણં સર્વકિલ્વિષનાશનમ્ ।
સર્વવ્યાધિપ્રશમનં સર્વસત્ત્વસુખાવહમ્ ॥

ત્રિકાલં યઃ પઠેદ્ધીમાન્ શુચિસ્થાને સમાહિતઃ ।
સો ઽચિરેણૈવ કાલેન રાજ્યશ્રિયમવાપ્નુયાત્ ॥

દુઃખી સ્યાત્તુ સુખી નિત્યં દરિદ્રો ધનવાન્ ભવેત્ ।
પુત્રો ભવેન્મહાપ્રાજ્ઞો મેધાવી ચ ન સંશયઃ ॥

બન્ધનાન્મુચ્યતે બદ્ધો વ્યવહારે જયોઅ ભવેત્ ।
શત્રવો મિત્રતાં યાન્તિ શૃઙ્ગિણઃ શુનકા અપિ ॥

સંગ્રામે સંકટે દુર્ગે નાનાભયસમુચ્છ્રિતે ।
સ્મરણાદેવ નામાનિ સર્વાન્ભયાનપોહતિ ॥

નાકાલમૃત્યુર્ભવતિ પ્રાપ્નોતિ વિપુલાશયમ્ ।
માનુષ્યે સફલં જન્મ તસ્યૈકસ્ય મહાત્મનઃ ॥

યશ્ચેદં પ્રાતરુત્થાય માનવઃ કીર્તયિષ્યતિ ।
સ દીર્ઘકાલમાયુષ્માન્ શ્રિયં ચ લભતે નરઃ ॥

દેવા નાગાસ્તથા યક્ષા ગન્ધર્વા કઠપૂતનાઃ ।
પિશાચા રાક્ષસા ભૂતા માતરો રૌદ્રતેજસાઃ ॥

ડાકિન્યસ્તારકાઃ પ્રેતાઃ સ્કન્દોમાદ્યા મહાગ્રહાઃ ।
છાયાપસ્મારકાશ્ચૈવ ખેટકા ખાર્દકાદયઃ ॥

વેતાલાશ્ચિંચકા પ્રેષ્યા યે ચાન્યે દુષ્ટચેતસઃ ।
છાયામપિ ન લઙ્ઘન્તિ કિં પુનસ્તસ્ય વિગ્રહમ્ ॥

દુષ્ટસત્ત્વા ન બાધન્તે વ્યાધયો નાક્રમન્તિ ચ ।
સર્વૈશ્વર્યગુણૈર્યુક્તો વંશવૃદ્ધિશ્ચ જાયતે ॥

જાતિસ્મરો ભવેદ્ ધીમાન્ કુલીનઃ પ્રિયદર્શનઃ ।
પ્રીતિમાંશ્ચ મહાવાગ્મી સર્વશાસ્ત્રવિશારદઃ ॥

કલ્યાણમિત્રસંસેવી બોધિચિત્તવિભૂષિતઃ ।
સદા ઽવિરહિતો બુદ્ધૈર્યત્ર યત્રોપપદ્યતે ॥