108 Buddhist stotras · અધ્યાય 78

સત્ત્વાર્થમેવ મયિ તિષ્ઠતિ સત્ત્વશ્રદ્ધા નાન્યત્ર સા, હ્યહમહો ઽધિગૃહીતસત્ત્વઃ ।
ચર્યા ઽધમા કરુણયા રહિતા ભવેદ્ યા સંભાવ્યતે કરુણયૈવ પ્રહાણમસ્યાઃ ॥

સત્ત્વેષુ યસ્ય નિતરાં કરુણાપ્રવૃત્તિરારાધકઃ સ મમ શાસનમર્મવેત્તા ।
શીલં શ્રુતિશ્ચ કરુણા ચ સુધોશ્ચ યસ્ય નિત્યં સ એવ સુગતાર્ચનકૃન્નિગદ્યતે ॥

કલ્યાણકારમધિકૃત્ય ગતો ઽસ્મિ સિદ્ધિં સત્ત્વાર્થમેવ તનુમેષ સમુદ્વહામિ ।
નૈવં ક્રિયેત યદિ સત્ત્વહિતં મયા ચેદ્ વ્યર્થં કરોમિ તનુપોષણમન્નપાનૈઃ ॥

સત્ત્વાન્ હિનસ્તિ મનસાપિ હિ યઃ સ કસ્માન્મામેવ સંશ્રયતિ યો મયિ નિર્વ્યપેક્ષઃ ।
પૂજા તુ સા ભવતિ સત્ત્વહિતેક્ષણાપિ પૂજ્યસ્ય યા મનસિ તુષ્ટિમુપાદદાતિ ॥

હિંસાત્મિકા પરવિહેઠનસમ્ભવા વા પૂજા ન પૂજ્યમનુગચ્છતિ સંસ્કૃતાપિ ।
દારાઃ સુતાશ્ચ વિભવશ્ચ મહત્ત્વ(ચ્ચ) રાજ્યં માંસં ચ શોણિતવસે નયતે શરીરમ્ ॥

યેષાં પ્રિયત્વમધિકૃત્ય મયોજ્ઝિતં યત્ યસ્તાન્ વિહેઠયતિ તેન વિહેઠિતો ઽહમ્ ।
સત્ત્વોપકારપરમા હિ મમાગ્રપૂજા સત્ત્વાપકારપરયા ચ પરાભવઃ સ્યાત્ ॥

સત્ત્વાન્ પ્રાપ્ય મયા કૃતાનિ કુશલાન્યારાધિતાસ્તાયિનઃ પ્રાપ્તાઃ પારમિતાશ્ચ સત્ત્વસમિતેરેવાર્થમાતિષ્ઠતા ।
સત્ત્વાર્થેન સમુદ્યતેન મનસા મારસ્ય ભગ્નં બલં સત્ત્વૈરેવ તથા તથા વિરચિતં યેનાસ્મિ બુદ્ધઃ કૃતઃ ॥

કસ્મિન્ વસ્તુનિ સિદ્ધ્યતામિહ કૃપા મૈત્રી ચ ક્વાલમ્બતાં ક્વોપેક્ષામુદિતાદિવસ્તુવિષયઃ કસ્મિન્ વિમોક્ષાદયઃ ।
કસ્યાર્થે કરુણાપરેણ મનસઃ ક્ષાન્તિશ્ચિરં ભાવિતા ન સ્યુર્જન્મનિ જન્મ(નિ) પ્રિયવિધૌ મિત્રં યદિ પ્રાણિનઃ ॥

સત્ત્વા એવ ગજાદિભાવગતયો દત્તા મયા ઽનેકશઃ સત્ત્વા એવ ચ પાત્રતામુપગતં દેયં મયા ગ્રાહિતાઃ ।
સત્ત્વૈરેવ વિચિત્રભાવગમનાદસ્મત્કૃપા વર્ધિતા સત્ત્વાનેવ ન પાલયામિ યદિ ચેત્ કસ્યાર્થમર્થઃ કૃતઃ ॥

સંસારે વ્યસનાભિઘાતબહુલે ન સ્યુર્યદિ પ્રાણિનો જન્માવર્તવિડમ્બનેન યમલોકં પ્રાપ્ય સાત્મીકૃતાઃ ।
સંસારાત્તરણં ચ સૌગતમિદં મહાત્મ્યમત્યદ્ભુતં કસ્યાર્થેન સમીહિતં યદિ ન મે સત્ત્વા ભવેયુઃ પ્રિયાઃ ॥

યાવચ્ચેદં જ્વલતિ જગતઃ શાસનં શાસનં મે તાવત્ સ્થેયં પરહિતપરૈરાત્મવદ્ભિર્ભવદ્ભિઃ ।
શ્રુત્વા શ્રુત્વા મમ વિરચિતં સત્ત્વહેતોરખિન્નૈઃ ખેદઃ કાર્યો ન ચ તનુમિમં મુક્તસારં ભવદ્ભિઃ ॥