108 Buddhist stotras · અધ્યાય 77

શ્રીસંવરં મહાવીરં વારાહીં ચાપિ યોગિનીમ્ ।
નમામિ સર્વભાવેન યોગિનીજાલનાયકમ્ ॥

ડાકિનીં ચ તથા લામાં ખણ્ડરોહાં ચ રૂપિણીમ્ ।
ચતુરો ઽમૃતભાણ્ડાંશ્ચ બોધિચિત્તેન પૂરિતાન્ ॥

પુલ્લીરમલયોદ્ભૂતં ખણ્ડકપાલસંવરમ્ ।
પ્રચણ્ડાલિઙ્ગણં વીરં નમામિ શિરસિ સ્થિતમ્ ॥

જાલન્ધરાત્સમુત્પન્નં મહાકંકાલસંવરમ્ ।
ચણ્ડાલ્યાલિઙ્ગણં વીરં શિખાદેશે સ્થિતં નમે ॥

ઓડિયાનાત્સમુદ્ભૂતં કંકાલનામ સંવરમ્ ।
પ્રભાવતીસમાપન્નં સવ્યકર્ણસ્થિતં નમે ॥

અર્બુદપીઠમધ્યસ્થં સંવરં વિકટદંષ્ટ્રિણમ્ ।
મહાનાસાસમાપન્નં પૃષ્ઠદેશે સ્થિતં નમે ॥

ગોદાવરીસમુદ્ભૂતં સુરાવીરિણસંવરમ્ ।
સંપુટં વીરમત્યાખ્યા વામકર્ણસ્થિતં નમે ॥

રામેશ્વરોદ્ભવં વીરં અમિતાભાખ્યસંવરમ્ ।
ખર્વરોસંપુટં નાથં ભ્રુવોર્મધ્યસ્થિતં નમે ॥

દેવીકોટોદ્ભવં નાથં વજ્રપ્રભાખ્યસંવરમ્ ।
લઙ્કેશ્વરીસમાપન્નં નમામિ નેત્રકોણગમ્ ॥

મારવાખ્યાત્સમુત્પન્નં વજ્રદેહાખ્યસંવરમ્ ।
દ્રુમચ્છાયાસમાપન્નં નમામિ સ્કન્ધદેશગમ્ ॥

કામરૂપોદ્ભવં વીરં અઙ્ગુલિકાખ્યસંવરમ્ ।
ઐરાવતીસમાપન્નં નમામિ કક્ષદેશગમ્ ॥

ઓકારસ્થાનસંજાતં વજ્રજટિલસંવરમ્ ।
ભૈરવાલિઙ્ગણં વીરં તનુયુગોદ્ભવં નમે ॥

ત્રિશકુન્યદ્ભવં નાથં મહાવીરાખ્યસંવરમ્ ।
વાયુવેગાસમાપન્નં નાભિદેશસ્થિતં નમે ॥

કૌશલાયાં સમુદ્ભૂતં વજ્રહૂંકારસંવરમ્ ।
સુરાભક્ષીસમાપન્નં નમામિ નાસિકાગ્રજમ્ ॥

કલિઙ્ગપીઠસંજાતં સુપ્રભાનામ સંવરમ્ ।
શ્યામાદેવી સમાપન્નં નમામિ મુખભાગજમ્ ॥

લમ્પાકસ્થાનસંભૂતં વજ્રપ્રભાખ્યસંવરમ્ ।
સુભદ્રાલિઙ્ગણં વીરં કણ્ઠદેશોદ્ભવં નમે ॥

કાઞ્ચ્યાખ્યપીઠસંજાતં મહાભૈરવસંવરમ્ ।
હયકર્ણાસમાપન્નં નમામિ હૃદિમધ્યગમ્ ॥

હિમાલયોદ્ભવં વીરં વિરૂપાક્ષાખ્યસંવરમ્ ।
ખગાનનાસમાપન્નં મેઢ્રસ્થાનગતં નમે ॥

પ્રેતપુર્યાં સમુદ્ભૂતં મહાબલાખ્યસંવરમ્ ।
ચક્રવેગાસમાપન્નં લિઙ્ગસ્થાનગતં નમે ॥

ગુહદેશાત્સમુદ્ભૂતં રત્નવજ્રાખ્યસંવરમ્ ।
ખણ્ડરોહાસમાપન્નં નમામિ ગુદમધ્યગમ્ ॥

સૌરાષ્ટ્રદેશસંભૂતં હયગ્રીવાખ્યસંવરમ્ ।
શૌણ્ડિન્યાલિઙ્ગણં વીરં નમામિ ઉરુમધ્યગમ્ ॥

સુવર્ણદ્વીપસંજાતમ્ આકાશગર્ભસંવરમ્ ।
ચક્રવર્મિણીસમાપન્નં જઙ્ઘામધ્યગતં નમે ॥

નગરપીઠમધ્યસ્થં શ્રીહેરુકાખ્યસંવરમ્ ।
સુવીરાલિઙ્ગણં વીરં નમામ્યઙ્ગુલિવર્તિનમ્ ॥

સિન્ધુદેશસમુદ્ભૂતં પદ્મનૃત્યાખ્યસંવરમ્ ।
મહાબલાસમાપન્નં પાદપૃષ્ઠગતં નમે ॥

મરુતીપીઠસંજાતં વૈરોચનાખ્યસંવરમ્ ।
ચક્રવર્તિનીસમાપન્નં નમામ્યઙ્ગુષ્ઠમધ્યગમ્ ॥

કુલતાયાઃ સમુદ્ભૂતં વજ્રસત્ત્વાખ્યસંવરમ્ ।
મહાવીર્યાસમાપન્નં જાનુદ્વયગત નમે ॥

પૂર્વદ્વારે સ્થિતં વીરં વજ્રચણ્ડાખ્યસંવરમ્ ।
કાકાસ્યાલિઙ્ગણં વીરં નમામિ સુરનાયકમ્ ॥

ઉત્તરદ્વારમધ્યસ્થં વજ્રાનલાખ્યસંવરમ્ ।
ઉલૂકાસ્યાસમાપન્નં નમામિ યક્ષનાયકમ્ ॥

પશ્ચિમદ્વારમધ્યસ્થં વજ્રોષ્ણીષાખ્યસંવરમ્ ।
શ્વાનાસ્યાસમ્પુટં વીરં નમામિ પન્નગાધિપમ્ ॥

દક્ષિણદ્વારમધ્યસ્થં વજ્રકુણ્ડલિસંવરમ્ ।
શૂકરાસ્યાસમાપન્નં નમામિ યમનાયકમ્ ॥

આગ્નેયદિગ્વિમાત્રસ્થં વજ્રયક્ષાખ્યસંવરમ્ ।
યમદાઢીસમાપન્નં નમામિ વહ્નિનાયકમ્ ॥

નૈરૃત્યદિગ્વિભાષસ્થં વજ્રકીલાખ્યસંવરમ્ ।
યમદૂતીસમાપન્નં નમામિ રાક્ષસાધિપમ્ ॥

વાયવ્યદિગ્વિભાગસ્થં વજ્રમહાબલાહ્વયમ્ ।
યમદંષ્ટ્રીસમાપન્નં નમામિ પવનાધિપમ્ ॥

ઈશાનદિગ્વિભાગસ્થં વજ્રભીષણસંવરમ્ ।
યમમથનીસમાપન્નં નમામિ ભૂતનાયકમ્ ॥

એતાન્દેવાન્ નમસ્યામિ દિગ્વિદિક્ષુ સુસંસ્થિતાન્ ।
વીરાન્ વીરેશ્વરીઃ સર્વા હેરુકં પરમેશ્વરમ્ ॥

સહજાનન્દાત્મકં દેવં વિશુદ્ધં તાણ્ડવાન્વિતમ્ ।
ડાકિનીજાલમધ્યસ્થં પ્રત્યાત્મવેદ્યગોચરમ્ ॥

સ્તુત્વેદં દેવતીચક્રં યન્મયોપાર્જિતં શુભમ્ ।
તેન પુણ્યેન લોકો ઽસ્તુ વજ્રડાકપરાયણઃ ॥