108 Buddhist stotras · અધ્યાય 72

ઉત્પન્નો વન્ધુમત્યાં નૃપતિવરકુલે યો વિપશ્યીતિનામ્ના યસ્યાશીતિસહસ્રાણ્યમરનરગુરોરાયુરાસીદ્ ગતાનામ્ ।
યેન પ્રાપ્તં જિનત્વં દશબલબલિના પોતલાવૃક્ષમૂલે તં વન્દે જ્ઞાનવારિ પ્રણમિતસકલં ક્લેશવહ્નિં જિનેન્દ્રમ્ ॥

વંશે પૃથ્વીશ્વરાણાં મહતિ પુરવરે યઃ પ્રજાતો ઽરૂણાક્ષો વર્ષાણામાયુરાસીત્ સકલગુણનિધેર્યસ્ય સપ્તાયુતાનામ્ ।
સંપ્રાપ્તા યેન બોધિઃ પરહિતપટુના પુણ્ડરીકસ્ય મૂલે તં વન્દે જ્ઞાનરાશિં શિખિનમૃષિવરં પ્રાપ્તસંસારપારમ્ ॥

યો જાતો નોપમાયાં સુપ્રથિતયશસામન્વયે પાર્થિવાના માયુઃ ષષ્ટિસહસ્રાદભવદુરુમતેર્યસ્ય સંવત્સરાણામ્ ।
જિત્વા ક્લેશાનશેષાનમૃતમધિગતં યેન શાલસ્ય મૂલે તં વન્દે ધર્મરાજં ભુવનહિતકરં વિશ્વભૂનામધેયમ્ ॥

ક્ષેમાવત્યાં પ્રજાતો મનુજપતિસમે યો વશી વિપ્રવંશે આયુર્વર્ષાયુતાનિ પ્રવરગુણનિધેરષ્ટચત્વારિ ચૈવ ।
જૈનેન્દ્રં યેન લબ્ધં ત્રિભવવધકરં જ્ઞાનખડ્ગેશ્વરેણ વન્દે ઽહં સિંહકાયં સુગતમનુપમં કકુપ્છન્દં મુનીન્દ્રમ્ ॥

શોભાવત્યાં દ્વિજાનાં નરપતિમહિતે યો ઽન્વયે સંપ્રસૂતસ્ તસ્યામાયુઃ સહસ્રાણ્યતિશયવપુષસ્ત્રિંશદેવં બભૂવ ।
બુદ્ધત્વં યેન રત્નાચલવરગુરુણૌદુમ્બરે પ્રાપ્તમાસીદ્ તં વન્દે શાસિતારં કનકમુનિમૃષિં ધ્વસ્તમોહાન્ધકારમ્ ॥

વારાણસ્યાં કૃષીશક્ષિતિપતિમહિતે વિપ્રવંશે ઽભિજાતો યસ્યામાયુઃ સહસ્રાણ્યતિશયમહિતં વિંશતિર્વત્સરાણામ્ ।
યેન ન્યગ્રોધમૂલે ત્રિભવજલનિધિઃ પોષિતો દિવ્યગત્યા તં વન્દે વન્દનીયં મુનિવરમનઘં કાશ્યપં લોકનાથમ્ ॥

યો જાતઃ શ્રીવિશાલે કપિલપુરવરે શાક્યરાજેન્દ્રવંશે યસ્યાસીદાયુરેકંશતમિહ શરદાં સર્વલોકૈકબન્ધોઃ ।
નિર્ગત્યાશ્વત્થમૂલે નમુચિમપિ સતા ઽનુત્તરા યેન બોધિસ્ તં વન્દે શાક્યસિંહં સુરનરનમિતં બુદ્ધમાદિત્યબન્ધુમ્ ॥

જાતિં વિપ્રેતિવંશે નૃપવરમહિતે કેતુમત્યાં ગૃહીત્વા બુદ્ધત્વં યેન લબ્ધમતિગુણનિધિના નાગવૃક્ષસ્ય મૂલે ।
અષ્ટાવબ્દાયુતાનિ ક્ષપિતભગવતો ભાવિ યસ્યાગ્રમાયુર્ વન્દે મૈત્રેયનાથં તુષિતપુરવરે ભાવિનં લોકનાથમ્ ॥

સ્તુત્વા વૈ સપ્તબુદ્ધાન્ સકલમુપગતાન્ સપ્તસપ્તાર્કભાસો મૈત્રેયં ચ સ્તુવન્ વૈ તુષિતપુરગતં ભાવિનં લોકનાથમ્ ।
યત્પુણ્યં સંપ્રસૂતં શુભગતિફલદં દેહિનામેવ સર્વં છિત્વા સંક્લેશપાશાન્ મુનય ઇવ ચરન્ નિર્વૃતિં સ પ્રયાતુ ॥