108 Buddhist stotras · અધ્યાય 73

જગદ્ગુરું સુરનરલોકપૂજિતં કૃપાપટું પરહિતમોક્ષદેશકમ્ ।
વિપશ્યિનં ત્રિભવમહૌઘસારગં નમામિ તં સુગતગતિં તથાગતમ્ ॥

અનન્તપારે ભવસાગરે ઽસ્મિન્ નિમજ્યમાનં પ્રસમીક્ષ્ય લોકમ્ ।
પ્રકાશિતો યેન હિતાય ધર્મો નમો ઽસ્તુ તસ્મૈ શિખિને જિનાય ॥

વન્દે વિશ્વભુવં બુદ્ધં ચન્દ્રાર્કાધિકતેજસમ્ ।
સાગરૌઘમિવાગાઘં જ્ઞાનેન વિનયેન ચ ॥

યસ્યેન્દુરશ્મિપ્રતિમૈર્યશોભિરલંકૃતા ભાતિ વસુન્ધરેયમ્ ।
ઔદુમ્બરં પુષ્પમિવાદ્ભુતં તં વન્દે કકુપ્છન્દમહામુનીન્દ્રમ્ ॥

વિસારિણા વિગતમલેન ચેતસા વિરાગિણા સતતહિતાનુકારિણા ।
હતં તમો વિગતમલેન યેન તં સુરાર્ચિતં કનકમુનિં નમામ્યહમ્ ॥

પ્રતપ્તચામીકરરશ્મિગૌરં સહસ્રસૂર્યાધિકદીપ્તતેજસમ્ ।
લોકોત્તમં સર્વજનાભિવન્દ્યં વન્દામ્યહં કાશ્યપનામધેયમ્ ॥

વાક્યાંશુજાલૈઃ પ્રતિબોધ્ય લોકં સૂર્યાશુજાલૈરિવ પદ્મષણ્ડમ્ ।
યો નિર્વૃતઃ શાક્યમુનિપ્રદીપસ્તસ્મૈઃ નમઃ પરમકારુણિકાય શાસ્ત્રે ॥

મૈત્રેયનામા તુષિતાલયસ્થો યસ્યૈકજન્માન્તરિતા હિ બોધિઃ ।
ઉત્પત્સ્યતે યઃ સુગતઃ પૃથિવ્યાં સર્વાત્મના ઽહં પ્રણતો ઽસ્મિ તસ્મૈ ॥

સ્તુત્વા મયા સપ્તજિનાનતીતાનનાગતં ચાષ્ટમબોધિસત્ત્વમ્ ।
યત્પુણ્યમાસાદિતપ્રમેયં નિરામયાસ્તેન ભવન્તુ સત્ત્વાઃ ॥