108 Buddhist stotras · અધ્યાય 68

વિમલશૂન્યકૃપાર્દ્રચિત્તં માર્ગજ્ઞતાપ્રથિતદેશનયાર્થવાચમ્ ।
સર્વજ્ઞતાદિપરિપૂર્ણવિશુદ્ધદેહં જ્ઞાનાધિકારલલિતં શિરસા નમામિ ॥

વૈનેયભેદવશતો બહુધાવભાસૈરેકો ઽપિ પાત્રગજલેષુ શશીવ યસ્માત્ ।
સંલક્ષસે પરહિતાનુગતૈવ તસ્માદ્ બુદ્ધિસ્ત્વહો પરમવિસ્મયનીયરૂપા ॥

સંપૂર્ણચન્દ્રવદને લલિતો લલાટદેશાદ્વિનિર્ગતમહેશ્વરદેવપુત્રઃ ।
વૈનેયશામ્ભવજનપ્રતિબોધનાર્થં દેવાધિદેવપ્રતિમાનુજ ઈશ્વરસ્ત્વમ્ ॥

વૈનેયકોમલભવપ્રતિબોધનાય કિં ધામ સંભૃત મહાશુભલક્ષણં તે ।
નિર્યાત એવ હિ પિતામહદેવપૂજાં લોકેશ્વરેશ્વરપરં શિરસા નમામિ ॥

વૈનેયવૈષ્ણવજનપ્રતિબોધનાય રાજીવપાણિહૃદયાત્ પ્રતિનિઃસૃતો ઽસૌ ।
નારાયણો ઽપિ ભુવનેશ્વર એવ તસ્માત્ પુંસાં ત્વમેવ પરમોત્તમ એવ નાન્યઃ ॥

ચન્દ્રાર્કસાદરબલાહિતભક્તિભાજાં સંદર્શનાર્થમિભનીલસુલોચનાભ્યામ્ ।
યન્નિઃસૃતૌ શશિરવી ભુવિ લોચનાભ્યાં ધ્વસ્તાન્તરાલતમસં તમહં નમામિ ॥

સારસ્વતીવિનયયોજિતભક્તિભાજાં બોધાય વૈ ભગવતીહ સરસ્વતીયમ્ ।
દૃષ્ટાગ્રતસ્તવ જિનાત્મજપપ્રસૂતા પ્રજ્ઞાભિલાષિફલદં તમહં નમામિ ॥

વૈનેયવાયુજનિતાક્ષરમાર્ગસિદ્ધ્યૈ યો લોકનાથ સુગતો ઽથ વિનિઃસૃતો ઽસૌ ।
દેવઃ સમીરણવરો ભુવિ જન્મભાજામીર્યાપથાર્થફલદં તમહં નમામિ ॥

વૈનેયવારુણશિવાયનમીપ્સિતાનાં સંબોધનાર્થમુદરાત્સુગતાત્મજાનામ્ ।
યન્નિઃસૃતો વરુણદેવવરો ઽપ્યકસ્માદૈશ્વર્યસિદ્ધિ ફલદં તમહં નમામિ ॥

વૈનેયસંમતફલાદ્યભિલાષિણો વૈ સંસિદ્ધયે પ્રવરલક્ષણપાદપદ્મે ।
યન્નિઃસૃતા ભગવતી ધરણી પ્રસિદ્ધા ત્રૈલોક્યનાથમસમં સતતં નમામિ ॥

સંસારમુક્તમપિ સુસ્થિતમેવ તત્ર કારુણ્યતશ્ચ ભવચારિણિ સત્ત્વવર્ગે ।
ભૂયાત્ સ્થિતિર્મમ સદાસ્થિરસા ભવન્તમેવં મહાશયવરં પરમં નમામિ ॥

એકેન પાદતલકેન ભવત્સ્વકેન ચક્રાન્તસંવરમનન્તરલોકધાતૌ ।
કલ્પાન્તદગ્ધભુવને જ્વલિતોગ્રવહ્નિર્નિઃશ્વાસવાયુબલતસ્તવ નિર્વૃતઃ સ્યાત્ ॥

સ્વાં તર્જનીં મુખધૃતો ઽહિતતર્જનેન સંચાલિતાશ્ચ બહુમેરુગણા નખસ્ય ।
કોષોદ્ધૃતં જલધિતોયમશેષતઃ સ્યાત્ સામર્થ્યમીદૃશમહો ભવતઃ કુતો ઽન્યત્ ॥

ક્વેદં ચ શૈશવપરં નનુ ચારુરુપં સંદર્શનીયવરકોમલબાલચન્દ્રમ્ ।
દુર્વારમારમથનં ચ મયૈકસહ્યં વિક્રાન્તદુઃસહપરં ક્વ ચ ચેષ્ટિતં તે ॥

એષા બતાઞ્જનનિભોરુજનાવલી સા કૌટિલ્યચારુવિકટા સ્વશિરોરુહાગ્રે ।
ક્લેશેન્ધને જ્વલિતવિસ્ફુરિતત્વવહ્નેર્ધૂમાવલીવ વિમલા નનુ લક્ષ્યતે તે ॥

ત્વત્કાન્તિલેશવિમલા દશદિક્પ્રતાનૈઃ પક્ષાસિતક્ષયકૃશા સકલા સુશોભા ।
પર્યન્ત ઇષ્ટશશિનો ભવનેષુ યત્તે મન્યે વિરાજિ નિખિલં તવ કાન્તિલેશાત્ ॥

બન્ધુર્હિ કો માર્ગિકસંમતં મતં નરો નરી સા સ ચ સત્પથં પથમ્ ।
પરાર્થસંપાદિતસંવરં વરં નમામિ ભૂમીશ્વરરાજિનં જિનમ્ ॥

અનિત્યનિર્વાણપદે સ્થિતં સ્થિતં પ્રભાસ્વરાધિષ્ઠિતસંહિતં હિતમ્ ।
શમીકૃતાશેષજનં શિવં શિવં નમામિ ભૂમીશ્વરરાજિનં જિનમ્ ॥

ગભસ્તિમાલામિતસંકુલં કુલં તત્ર સ્વપાણૌ ધૃતપઙ્કજં કજમ્ ।
રતાનુગાશોભિતસંરતં રતં નમામિ ભૂમીશ્વરરાજિનં જિનમ્ ॥

સ્વધર્મધાતું કરુણાપરં પરં શુભાદિસંભારસુસંભૃતં ભૃતમ્ ।
વિકલ્પહીનં ધ્વનિદેશકં શકં નમામિ ભૂમીશ્વરાજિનં જિનમ્ ॥

તથતાતથતાદ્વયશાતશતં સદસત્પરિપૂરિતધર્મકથમ્ ।
કથનીયવિરાજિતસત્યપરં પ્રણમે ધરણીશ્વરરાજવરમ્ ॥

વરવારિજરૂપિ જગત્પ્રસરં સરસીરુહલોચનચારુતરમ્ ।
તરસાપિ રસત્વવિશુદ્ધિપરં પ્રણમે ધરણીશ્ચરાજવરમ્ ॥

વરનિર્મિતભોગપરાર્થરતં રતશૂન્યનિરઞ્જનધર્મધરમ્ ।
ધરણીન્દ્રવિભૂષિતસિદ્ધિપરં પ્રણમે ધરણીશ્વરરાજવરમ્ ॥

વરસત્સહજોદધિચન્દ્રમુખં સુખભાષિતસત્ત્વવિમુક્તિપદમ્ ।
પદભૂષણલક્ષણતાનુપરં પ્રણમે ધરણીશ્વરરાજવરમ્ ॥

લોકેશ્વરેયં(માં) તવ રત્નમાલામચીકરચ્છ્રીવનરત્નપાદઃ ।
અવાપિ યત્તેન શુભપ્રવિષ્ટં તેનૈવ લોકો ઽસ્તુ સમન્તભદ્રઃ ॥