108 Buddhist stotras · અધ્યાય 64

નિર્વિકલ્પે નમસ્તુભ્યં પ્રજ્ઞાપારમિતે ઽમિતે ।
યા ત્વં સર્વાનવદ્યાઙ્ગિ નિરવદ્યૈર્નિરીક્ષ્યસે ॥

આકાશમિવ નિર્લેપાં નિષ્પ્રપઞ્ચાં નિરક્ષરામ્ ।
યસ્ત્વાં પશ્યતિ ભાવેન સ પશ્યતિ તથાગતમ્ ॥

તવ ચાર્યે ગુણાઢ્યાયા બુદ્ધસ્ય ચ જગદ્ગુરોઃ ।
ન પશ્યન્ત્યન્તરં સન્તશ્ચન્દ્રચન્દ્રિકયોરિવ ॥

કૃપાત્મકાં પ્રપદ્ય ત્વાં બુદ્ધધર્મપુરસ્સરામ્ ।
સુખેનાયાન્તિ માહાત્મ્યમતુલં ભક્તવત્સલે ॥

સકૃદપ્યાશયે શુદ્ધે યસ્ત્વાં વિધિવદીક્ષ્યતે ।
તેનાપિ નિયતં સિદ્ધિઃ પ્રાપ્યતે ઽમોઘદર્શને ॥

સર્વેષામપિ વીરાણાં પરાર્થે નિયતાત્મનામ્ ।
વ્યાપિકા જગતીમેનાં માતા ત્વમસિ વત્સલા ॥

યે બુદ્ધા લોકગુરવઃ પુત્રાસ્તવ કૃપાલવઃ ।
તેન ત્વમસિ કલ્યાણિ સર્વસત્ત્વપિતામહી ॥

સર્વપારમિતાભિસ્ત્વં નિર્મલાભિરનિન્દિતા ।
ચન્દ્રલેખેવ તારાભિરનુપ્રોતા ઽસિ સર્વતઃ ॥

વિનેયજનમાસાદ્ય તત્ર તત્ર તથાગતૈઃ ।
બહુરૂપા ત્વમેવૈકા નાનાનામભિરીક્ષ્યસે ॥

પ્રભાં પ્રાપ્યેવ દીપ્તાંશોરવશ્યાયોદવિન્દવઃ ।
ત્વાં પ્રાપ્ય પ્રલયં યાન્તિ દોષાવાદાશ્ચ વાદિનામ્ ॥

ત્વમેવ ત્રાસજનની બાલાનાં ભીમદર્શના ।
આશ્વાસજનની ચાપિ વિદુષાં સૌમ્યદર્શના ॥

યસ્ય ત્વય્યપ્યભિષ્વઙ્ગસ્ત્વન્નાથસ્ય ન વિદ્યતે ।
તસ્યામ્બ! કથમન્યત્ર રાગદ્વેષૌ ભવિષ્યતઃ ॥

નાગચ્છસિ કુતશ્ચિત્ત્વં કુત્રચિન્ન ચ ગચ્છસિ ।
સ્થાનેષ્વપિ ચ સર્વેષુ વિદ્વદ્ભિર્નોપલભ્યસે ॥

યે ત્વામેવ ન પશ્યન્તિ પ્રપદ્યન્તે ચ ભાવતઃ ।
પ્રપદ્ય ચ વિમુચ્યન્તે તદિદં મહદદ્ભુતમ્ ॥

ત્વામેવ બધ્યતે પશ્યન્નપશ્યન્ન વિબધ્યતે ।
ત્વામેવ મુચ્યતે પશ્યન્નપશ્યન્ન વિમુચ્યતે ॥

અહો વિસ્મયનીયાસિ ગમ્ભીરાસિ યશસ્વિની ।
સુદુર્બોધાસિ માયેવ દૃશ્યસે ન ચ દૃશ્યસે ॥

બુદ્ધૈઃ પ્રત્યેકબુદ્ધૈશ્ચ શ્રાવકૈશ્ચ નિષેવિતે ।
માર્ગસ્ત્વમેકો મોક્ષસ્ય નાસ્ત્યન્ય ઇતિ નિશ્ચયઃ ॥

વ્યવહારં પુરસ્કૃત્ય પ્રજ્ઞપ્ત્યર્થ શરીરિણામ્ ।
કૃપયા લોકનાથૈસ્ત્વમુચ્યસે ચ ન ચોચ્યસે ॥

શક્તઃ કસ્ત્વામિહ સ્તોતું નિર્નિમિત્તાં નિરઞ્જનામ્ ।
સર્વેષાં વિષયાતીતા યા ત્વં ક્વચિદનિશ્રિતા ॥

સત્યેવમપિ સંવૃત્યા વાક્યાર્થૈર્વયમીદૃશૈઃ ।
ત્વામસ્તુત્યામપિ સ્તુત્વા તુષ્ટુવન્તઃ સુનિર્વૃતાઃ ॥

પ્રજ્ઞાપારમિતાં સ્તુત્વા યન્મયોપચિતં શુભમ્ ।
તેનાસ્ત્વાશુ જગત્ કૃત્સ્નં પ્રજ્ઞાપારપરાયણમ્ ॥