108 Buddhist stotras · અધ્યાય 49

યેન પુણ્યાટવીસ્થેનાનેકે શાસનવર્તિનઃ ।
દિવોદાસાદયો ભૂપાઃ સ નો રક્ષતુ મારજિત્ ॥

લોકાનાં ગ્રહબદ્ધાનાં રક્ષાર્થં પુણ્યકાનને ।
ગ્રહાનદમયદ્ યો વૈ સ નો રક્ષતુ તદ્ભયાત્ ॥

કાશ્યપાદ્યાન્ મહર્ષીંસ્તાન્ આનન્દાદ્યાંશ્ચ બ્રાહ્મણાન્ ।
પ્રાવ્રાજયત્ સુમુક્ત્યર્થં સ નો રક્ષતુ મુક્તિદઃ ॥

સૌવર્ણધાન્યદાનેન દીનં વિપ્રમપાલયત્ ।
દુર્ભિક્ષભયતો નિત્યં સ નો રક્ષતુ શાક્યરાટ્ ॥

યો મૈત્રકન્યકો ભૂત્વા માતૃદ્રોહિણમત્યગાત્ ।
ચક્રં દૂરીકૃતં યેન સ નો રક્ષતુ માતૃવાન્ ॥

સુપ્રિયો બદરદ્વીપયાત્રાપ્તમણિવૃષ્ટિભિઃ ।
કાશીયાન્ પ્રાકરોદાઢ્યાન્ સ નો રક્ષતુ કાઞ્ચનૈઃ ॥

ભૂત્વા યઃ સુધનો નામ નિધાનં સમદર્શયત્ ।
દારિદ્રયદુઃખતો નિત્યં સ નો રક્ષતુ સર્વવિત્ ॥

કુષ્ઠાદિરોગહરણે રાજગૃહમુપાવિશત્ ।
તત્તદ્રોગભયાન્નિત્યં સ નો રક્ષતુ ધર્મરાટ્ ॥

યઃ કુશો ભૂપતિર્ભૂત્વા ઽષ્ટમીમાહાત્મ્યમુત્તમમ્ ।
પ્રકાશયન્નિજે દેહે સ નો રક્ષતુ ધર્મવિત્ ॥

સૌદાસં સત્યવચસા કાશ્યામસ્થાપયન્નૃપાન્ ।
બન્ધનાન્મોચયામાસ સ નો રક્ષતુ સર્વવિત્ ॥

ગોપાન્ રરક્ષ યો દેવ્યાઃ પ્રભાવં સંપ્રકાશયન્ ।
વહ્નિદાહારિભયતઃ સ નો રક્ષતુ ભીતિહા ॥

યો ઽન્ધીભૂતાં માતરં સ્વાં ચૂડારત્નં જલે વ્યધાત્ ।
દિવ્યનેત્રાન્ જનાન્ કૃત્વા સ નો રક્ષતુ નેત્રદઃ ॥

વિરૂપં પ્રાકરોત્ પુત્રં છાયાસીનં સુસુન્દરમ્ ।
સર્વલક્ષણસમ્પન્નં સ નો રક્ષતુ સર્વદઃ ॥

સકલાનન્દનામાનં રાજ્યે યઃ પ્રાભ્યષેચયત્ ।
સન્તતિસ્થિતિકુર્વાણઃ સ નો રક્ષતુ સ્થૈર્યકૃત્ ॥

વિષદં ભ્રાતરં યશ્ચાક્ષમદ્ ભિક્ષુન્ વિષાશિનઃ ।
રરક્ષ ધારણીવિજ્ઞઃ સ નો રક્ષતુ નિર્વિષઃ ॥

શ્રીસ્વયંભુદર્શનાય નૈપાલીયાન્ પ્રયાસિતુમ્ ।
કપિલાન્ પ્રસ્થિતો યો ઽસૌ સ નો રક્ષતુ સન્તતમ્ ॥